Зи нэтынхэр куэдым фIыуэ ялъэгъуа

УФ-м и Журналистхэм я зэгухьэныгъэм хэт, КъБР-м щIыхь зиIэ и журналист, зи IэщIагъэм хуэIэижь Мыз Майе ящыщщ зи радионэтынхэр куэдым фIыуэ ялъэгъуахэм.

Мыз (Сыжажэ) Майе Бахъсэн районым хыхьэ Зеикъуэ къуажэм къыщалъхуащ. Абы и адэ Сыжажэ Талий ящыщщ жылэм нэхъ пщIэ щызиIахэм. Хэку зауэшхуэми лэжьыгъэми я ветерану, лэжьакIуэжьу, Зеикъуэ колхозым и пхъэщхьэмыщхьэ жыг хадэр IэщIэлъу икIи хъерышхуэ колхозым къахуихьу лэжьащ икIи хуабжьу цIыху жумарту зеикъуэдэсхэм ар ягу къинэжащ. Абы хуэдэ цIыху уигъэлъыхъуэнт, куэд къимыгъэщIами, и цIэфI дунейм къытринащ.

1974 гъэм КъБКъУ-р къиуха нэужь, Майе япэщIыкIэ и зэфIэкI щеплъыжащ егъэджакIуэ, библиотекэм и лэжьакIуэ IэнатIэхэм. 1977 гъэм радиом и диктору лэжьэн щIидзащ. Абы лъандэрэ илъэс 40-м щIигъуами, ар диктор, редактор, нэтынхэр езыгъэкIуэкI лэжьыгъэхэм нобэр къыздэсым хуэпэжщ. Мы зэманым ар Къэбэрдей-Балъкъэрым и радиом и хъыбарегъащIэ редакцэм и редакторщ икIи категорие нэхъыщхьэ зиIэ и дикторщ, нэтынхэр ирегъэкIуэкI.

Къэбэрдей-Балъкъэрым щыпсэу, радио едаIуэ цIыху мин бжыгъэхэм Мыз Майе и нэтын купщIафIэхэмкIэ къацIыхуауэ фIы дыдэу ялъагъу и макъыр. И лэжьэгъу нэхъыщIэхэм яхэткъым абы и псалъэ гуапэхэр, и чэнджэщ щхьэпэхэр зэхэзымыха. Сытым дежи ар хьэзырщ и лэжьэгъухэм и дамэр ящIигъэкъуэну, чэнджэщ щхьэпэхэр яритыну. Лэжьыгъэм теухуауэ ар гумызагъэщ, жэуаплыныгъэ ин зыхэлъщ. И лэжьэгъухэм зэрыжаIэмкIэ, Майе хьэл-щэн дахэ хэлъщ, цIыху Iэдэбщ. Лэжьыгъэм зыпыIузымыдз а цIыху жаным и дуней тетыкIэр щапхъэщ а IэнатIэм пэрыт щIалэгъуалэм я дежкIэ. И лэжьэгъухэри, и ныбжьэгъухэри, Iыхьлы-благъэхэри ирогушхуэ Майе.

- Нэхъ ипэIуэкIэ хъыбарыщIэхэр эфир занщIэу щекIуэкIым, зы медан Майе теплъэкъукIыртэкъым, япэ итыр къыщIэкIмэ, езыр студием зэрыщIыхьэнум пэплъэу. КъыкIэрыхуу е «си макъыр нобэ хъуркъым» щIыжиIэн щхьэусыгъуэ Майе къигъэхъуауэ тщIэжыркъым, - жеIэ КъБР-м щIыхь зиIэ и журналист МахуэлI Хъаджэт. - Радиом лэжьэн щIидзэрэ дикторым и макъ шэщIар къыщыIукIэ, къедаIуэхэм я фIэщ хъурт дунейм псори зэрыщытэмэмыр. Мис апхуэдэ арэзыныгъэ къишэу Майе илъэс куэд лъандэрэ мы радиом щолажьэ.

Зи нэгур зэлъыIуха бзылъхугъэ зэпIэзэрытыр гуп хыхьэкIи къыхэкIыжыкIи зыщIэщ, унагъуэ дахэм я жьауэщ. Iуэху зэIумыбзхэм сыт щыгъуи хэкIыпIэ къахуегъуэтыф. Майе нобэ иринасыпыфIэщ и къуэ Заурбэч бынищ, ипхъу Залинэ бынитху къазэрыщIэхъуам. И щхьэгъусэ Мыз Мухьэмэд «ЦIыхубэм щIэныгъэ егъэгъуэтынымкIэ УФ-м и отличник», «КъБР-м егъэджэныгъэмкIэ щIыхь зиIэ и лэжьакIуэ» цIэ лъапIэхэр къыхуагъэфэщат, филологие щIэныгъэхэмкIэ кандидатт. ТIури зэхуэфащэ дыдэу зэрихьэлIат. Мухьэмэд пасэу дунейм ехыжами, Майе и бынитIми щIэныгъэ нэхъыщхьэ яригъэгъуэтащ. Ахэр фIыуэ ялъагъу лэжьыгъэм пэрытхэщ, я адэ-анэр я щапхъэу мэпсэухэр. Дунейм зы адэ-ани тету къыщIэкIынкъым и щIэблэм я ехъулIэныгъэм щымыгуфIыкIрэ абы иримыгушхуэрэ. Майе дамэ къытезыгъакIэ и къуэрылъху-пхъурылъхухэм мы зэманым Москварэ Налшыкрэ я еджапIэ нэхъыщхьэхэм щIэныгъэ щызрагъэгъуэт.

Радиом и лэжьыгъэм Мызыр хуэIэзэщ, а IэнатIэм къыхуигъэщIам хуэдэу. «Уи пщэдджыжь фIыуэ, Къэбэрдей-Балъкъэр» нэтыным хыхьэу абы эфир занщIэкIэ цIыху куэд къигъэпсэлъащ, цIыхубзхэм папщIэ «Мэлычыпхъу» радиожурналыр иригъэкIуэкIащ. Мы зэманым и къалэн нэхъыщхьэр хъыбарыщIэхэр игъэхьэзырынращи, а Iуэхур Майе фIы дыдэу къохъулIэ, адыгэбзэ къабзэкIэ къэхъукъащIэхэм республикэм исхэр дыщегъэгъуазэ. Майе зыпэмылъэщын къудамэ радиом иIэкъым. КъедаIуэхэм абы и нэтынхэр ягу зэрыдыхьэм и щыхьэтщ псалъэ гуапэ куэд къызэрыхуатхар, усэ нэгъунэ зэрыхуаусар.

- Дызэрыстудентрэ Майерэ сэрэ дызэроцIыху. Абы лъандэрэ зэман дэкIами, ар иджыри жанщ, псоми гу лъитэу набдзэгубдзаплъэщ. Мы дунейм цIыху дахэ тетмэ, Майе абыхэм ящыщщ. И теплъэм хуэдэу, абы и псэри дахэщ. ГъащIэм сыт щыгъуи щыгуфIыкI цIыхущ. Абы дапщэщи и гур лэжьыгъэм хуэкъабзэщ. ЖыпIэнурамэ, Майе и гъащIэр къыгуэхыпIэ имыIэу радиом ирипхащ. Ар къыщыкIэрыхуа е и лэжьыгъэр и пIалъэм щимыгъэзэщIа къэхъуауэ сщIэжыркъым. Сыт щыгъуи и лэжьыгъэр и щхьэ Iуэхум япэ изыгъэщщ ар. Республикэм исхэм ящыщу ар здынэмысрэ къимыгъэпсалъэрэ къэгъуэтыгъуейщ. Дэтхэнэ зыми бгъэдыхьэкIэ зырыз къыхуегъуэтыф, мывэр къыхуэмыгъэпсэлъэну пIэрэ хужыпIэну. Ар куэд и уасэщ. Гупым къызэрытхэтым и гугъу пщIымэ, ари щапхъэщ. КъыпхуэмыIуэтэну абы цIыхугъэшхуэ дыболъагъу. Дэтхэнэми бгъэдыхьэкIэ дахэ къыхуегъуэтыф. Майе журналист гъуэзэджэщ, пщIэ зыхуащI цIыхущ. Нэхъыщхьэращи, радиом едаIуэхэр зэпымыууэ абы и псалъэм, и нэтынхэм къыпоплъэ. Сэ срогушхуэ Майе и лэжьэкIэмрэ и дуней тетыкIэмрэ. Тхьэм тхуигъэпсэу! - жеIэ радиом и адыгэ редакцэм и редактор нэхъыщхьэ Тэтрокъуэ Астемыр.

- Майе лъэпкъым къызэрытхыхьэрэ дигъэгушхуэу, дигъэдахэу, нэмыс къытхуищIу, гу зылъыдмытэм лъыдигъатэу къыддогъуэгурыкIуэ. Ар цIыхугъэшхуэ зыхэлъщ, ди лъэпкъым и пщIэ къэзылэжьа, еш зымыщIэ цIыхущ. И лэжьыгъэм и гугъу пщIымэ, цIыхуищым зэфIагъэкIыфынур абы и закъуэу илэжьыфынущ. ЦIыху щыпкъэщ, нэхъыжьым пщIэ, нэмыс хуэзыщIщ, дыхуэарэзыщ, - жеIэ КъБР-м щIыхь зиIэ и журналист Мыз Ахьмэд.

Къэралым, республикэм и журналистикэм хуищIа хэлъхьэныгъэфIхэр къалъытэри, абы къыхуагъэфэщащ УФ-ми КъБР-ми щэнхабзэм и лэжьакIуэхэм я Профсоюзым я рескомым, СССР-м и Къэралтелерадиом, УФ-м щэнхабзэмрэ цIыхубэ коммуникацэхэмкIэ и министерствэм я щIыхь, фIыщIэ тхылъхэр. Майе и дежкIэ, дауи, кърата дамыгъэ лъапIэхэм нэхърэ, нэхъ лъапIэжщ къедаIуэхэм кърагъэз дзыхьыр, и макъым къызэрыхуэзэшыр.

Майе узыншагъэ быдэ иIэу иджыри илъэс куэдкIэ фIыуэ илъагъу IэнатIэм пэрытыну, гуфIэгъуэрэ дэрэжэгъуэрэ щымыщIэну ди гуапэщ.