Биткаш Давид зэкIэ етIуанэщ

Японием и къалащхьэ Токио щэкIуэгъуэм и 22 - 23-хэм щекIуэкIащ киокусинкаймкIэ дунейпсо чемпионатрэ пашэныгъэр къэхьыным хуэунэтIа зэхьэзэхуэрэ. Абы щызэпеуащ къэрал 41-м я спортсмен, щIалэхэри хъыджэбзхэри зэхэту, 850-рэ. 
Урысей Федерацэм и щIыхьыр иIэту зэхьэзэхуэм щыIащ Къэбэрдей-Балъкъэрым и бэнакIуэ Биткаш Давид икIи, и хьэлъагъ елъытауэ зыхэта гупым (кг 90) чемпионатым и дыжьын медалыр къыщихьащ. Ди лъахэгъум зэIущIищ абы щригъэкIуэкIати, япитIым щытекIуащ, абыхэм хухаха зэманхэр и кIэм нимыгъэсу. Финалым ар щыхуэзащ УФ-м и командэм щыщ нэгъуэщI спортсмен Абугу Стивен икIи зэIущIэр абы фIихьащ.
Биткаш Давид апхуэдэуи КъБР-м СпортымкIэ и министерствэм Олимп джэгухэм хэмыхьэ спорт лIэужьыгъуэхэмкIэ и еджапIэм тренеру щолажьэ. Езы щIалэр зыгъасэр Биткаш Емельянщ. 
Иджы екIуэкIа зэхьэзэхуэхэм УФ-м и командэм дыщэ медалу 11, дыжьыну 11, домбеякъыу 2 къыщихьащ.