КIыщ Аслъэнбэч етIуанэщ

СпортымкIэ зэпеуэхэр

Урысейм и Кубокыр бэнэкIэ хуитымрэ алыдж-урым бэнэкIэмкIэ къэхьыным хуэунэтIауэ тэмэму зэхэзымых спортсменхэм я зэхьэзэхуэхэр Новосибирск областым и Бердск къалэм иджыблагъэ щекIуэкIащ. Абы щызэпеуащ ди къэралым и щIыналъэхэм ящыщу 23-м я бэнакIуэу 100-м щIигъу.
Къэбэрдей-Балъкъэрым и щIыхьыр иIэту зэхьэзэхуэм щыIащ КIыщ Аслъэнбэч икIи алыдж-урым бэнэкIэмкIэ и хьэлъагъ елъытауэ зыхэта гупым (кг 72-рэ) етIуанэ увыпIэр къыщихьащ. Финалым ди щIалэр къыщыхигъэщIащ Ульяновск областым и спортсмен Глушенков Кирилл. 
Аслъэнбэч и тренерхэр КIыщ Муратрэ Къардэн Анзоррэщ.
 

Урысей зэхьэзэхуэм хэтынухэр къыхах

Кавказ Ищхъэрэм самбэмкIэ пашэныгъэр къыщыхьыным хуэунэтIа зэхьэзэхуэ Шэшэным и Шали къалэм щекIуэкIащ. Абы щызэпеуащ КИФЩI-м и щIыналъэхэм я спортсмен, щIалэхэри хъыджэбзхэри зэхэту, 250-м нэблагъэ, я ныбжькIэ илъэс 18-м щIимыгъуауэ. 
Къэбэрдей-Балъкъэрым и командэм зэхьэзэхуэм ехъулIэныгъэфIхэр щызыIэригъэхьащ икIи щIалэхэм ящыщу зыхэта гупхэм дыщэ медалхэр къыщахьащ Къудей Ислъам (кг 53-рэ), Къудей Беслъэн (кг 58-рэ), Мэш Амир (кг 64-рэ) сымэ. 
Килограмм 49-рэ зи хьэлъагъхэм я деж етIуанэ щыхъуащ Къумыкъу Ренат.
Зэхьэзэхуэм и домбеякъ медалхэр къахьащ Ажахъуэ Iэмин (кг 58-рэ), Къанщауэ Темырлан (кг 64-рэ), Борэн Инал (кг 71-рэ), Щоджэн Къантемыр (кг 79-рэ) сымэ. 
 Хъыджэбзхэм я зэхьэзэхуэм ещанэ увыпIэр щиубыдащ Поздняковэ Анастасие (кг 65-рэ).
Зэзауэ зыхэт самбэ лIэужьыгъуэмкIэ Къудей Ислъам (кг 53-рэ), Ажахъуэ Iэмин (кг 58-рэ), Къанщауэ Темырлан (кг 64-рэ) сымэ зыхэта гупхэм щытекIуащ. 
Кудзаев Беслъэн килограмм 58-рэ зи хьэлъагъхэм я деж етIуанэ щыхъуащ. Рябич Александррэ (кг 98-рэ) БатI Тигранрэ (кг+98-рэ) ещанэ увыпIэхэр къахьащ.
Ди командэм дэлажьэр ПшынащIэ Мурат, Къарэмышэ СулътIан, Ким Руслан, ГъущIапщэ Самир, Павел Иван сымэщ.
Иджырей зэхьэзэхуэр къызэрыхахыу щытащ. Абы щытекIуахэр хэтынущ УФ-м самбэмкIэ пашэныгъэр къыщыхьыным хуэунэтIауэ етIанэгъэ щIышылэм и 29-м – мазаем и 3-хэм Краснодар къалэм щызэхэтыну зэпеуэм.