Кавказ Ищхъэрэм и щIыналъэхэм ящыщу нэхъ тыншу IэнатIэ къыщыбгъуэтыну Iэмал нэхъыбэ здэщыIэр Къэбэрдей-Балъкъэрырщ. Ар иджыблагъэ наIуэ къащIащ лэжьыгъэ къэзылъыхъуэхэм щхьэкIэ щыIэ, УФ-м и сайт нэхъ инхэм ящыщ «hh.ru»-м и экспертхэм, 2025 гъэм и бадзэуэгъуэм – фокIадэм ирагъэкIуэкIа къэпщытэныгъэхэм кърикIуахэр я тегъэщIапIэу.
Къэпщытэныгъэхэм унэтIыныгъэ нэхъыщхьэу плIы къыхагъэщхьэхукIащ: щIыналъэхэм ику иту щат улахуэм и куэдагъыр, лэжьапIэ Iутыр псэун папщIэ зы мазэм нэхъ мащIэ дыдэу зыхуеину ахъшэмрэ абырэ зэрызэхуэкIуэр, IэнатIэншэу Росстатым щатхам я куэдагъыр, нэгъуэщI щIыналъэхэмкIэ емыплъэкIыу, зыщыпсэу щIыпIэм IэнатIэ къыщызылъыхъуэхэм я бжыгъэр зэрыхъур. КъэпщытакIуэхэм къызэрыхагъэщымкIэ, иужьрей унэтIыныгъэр и щыхьэтщ щIыналъэм лэжьапIэ къыщыгъуэтыным пыщIа гугъуехьыр зэрыщымащIэм.
Къыхэдгъэщынщи, урысейпсо рейтингым хэт щIыналъэ 78-м я деж Къэбэрдей-Балъкъэрым 58-нэ увыпIэр щиубыдащ, баллу 63,4-рэ иIэу. Республикэм, лэжьакIуэ къэзылъыхъуэ IуэхущIапIэхэм нэхъ мащIэ дыдэу къагъэлъагъуэ улахуэмрэ нэхъыбэ дыдэмрэ зэхэплъхьэмэ, ику иту сом мин 92,5-рэ ар мэхъу икIи цIыху лэжьапIэ Iутыр псэун папщIэ зы мазэм нэхъ мащIэ дыдэу зыхуеину ахъшэу щIыналъэм щагъэувам нэхърэ (сом мин 18,9-рэ) фIыуэ нэхъыбэщ. Абы нэмыщI, лэжьапIэншэу къэралым зыщезыгъэтхахэм я бжыгъэмкIэ ди республикэр нэхъ цIыкIу дыдэхэм яхохьэ – проценти 2,6-рэ. Мыдрейуэ, лэжьыгъэ IэнатIэ хуэныкъуэхэм я процент 9I-м нэблагъэм ар езыхэр щыпсэу щIыналъэм къыщалъыхъуэ, нэгъуэщI щIыпIэхэмкIэ зыщамыплъыхьу.
КИФЩI-м и щIыналъэхэм ящыщу КъБР-м къыкIэлъыкIуэу Ставрополь крайр 64-нэ увыпIэм щытщ, балл 59,5-рэ рейтингым щиIэу. Мыбы ику иту цIыхухэм хуагъэлъагъуэ улахуэр сом мин 70,7-рэ мэхъу икIи лэжьыгъэ IэнатIэ къэзылъыхъуэхэм я проценти 2,8-рщ нэгъуэщI щIыналъэхэм Iэпхъуэну хьэзырыр.
«ЛэжьапIэ хуэныкъуэхэм я нэхъыбэр нобэ зэплъыр къыхуагъэлъагъуэ улахуэм и инагъыну къудейракъым, атIэ, коммунальнэ, ерыскъы, щыгъын, транспорт, медицинэ, н.къ. Iуэхутхьэбзэ уасэхэр хэкIыжа иужь, къахуэнэжыну ахъшэмрэ IуэхущIапIэ къыхахам щIыналъэ экономикэм щиубыд увыпIэр зыхуэдэмрэщ», - къыхагъэщащ къэпщытэныгъэхэр езыгъэкIуэкIахэм.
Апхуэдэуи, абыхэм жаIащ Кавказ Ищхъэрэм и щIыналъэхэр къэралым щынэхъыфIхэм адэкIи яхэхуэн папщIэ, зызыужь щIыналъэ экономикэм къыдэкIуэу, цIыхухэм я псэукIэри ефIакIуэ зэпыту щытын хуейщ.
