Хабзэ яхуэхъуну мэгугъэ

Iуащхьэмахуэ лъапэ и джабэ нэкIухэм лыжэкIэ мы гъэм къыщажыхьыну щрагъажьа махуэм, дыгъэгъазэм и 6-м, иращIылIа гуфIэгъуэ зэхыхьэм турист мини 6,6-рэ кърихьэлIащ. Ар зытIэкIукIэ нэхъ мащIэщ 2024 гъэм щIышылэм и 2-м щыIахэм елъытауэ. Абы щыгъуэ Iуащхьэмахуэ и джабэ нэкIухэм къыщажыхьащ е я нэгу зыщрагъэужьащ цIыху мини 7,2-м. 
«Мы гъэм дыхущIэкъуащ а махуэр хэIэтыкIауэ дгъэлъэпIа зэрыхъуным. Псоми зэращIэщи, Iуащхьэмахуэ дуней псом щыцIэрыIуэщ, ди къэралми, Европэми щынэхъ лъагэ дыдэщ. НэщэнэфIщ лыжэкIэ бгым къыщажыхь зэманыр гуфIэгъуэкIэ абы къызэрыщызэIутхар. Сыту жыпIэмэ, бгы лыжэм, сноубордым, езы къуршым дихьэххэр Iуащхьэмахуэ куэду зыIэпешэ, а бжыгъэми къыхэхъуэ зэпытщ. Си гугъэщ нобэрей жэрдэмыр хабзэ тхуэхъуну, бгыхэр фIыуэ зылъагъухэр илъэс къэс нэхъыбэу мыбы щызэхуэсыну», - жиIащ «Урысейм и бгыхэр» экосистемэм и унафэщI Виноградов Илья. 
Фигу къэдгъэкIыжынщи, Iуащхьэмахуэ лъапэ деж щызэхаша гуфIэгъуэ зэхуэсыр къызэригъэпэщащ «Урысейм и къуршхэр» экосистемэм, УФ-м Экономикэ зыужьыныгъэмкIэ и министерствэр, Кавказ.РФ-р, КъБР-м и Правительствэр къадэIэпыкъуу.