Iуащхьэмахуэ лъапэ зрагъэужь

16 декабря, 2025 - 06:00
Къэбэрдей-Балъкъэрым и туризм IэнатIэм 2025 гъэм къыхилъхьа инвестицэ пэхуэщIэхэм ахъшэу къыхашам и куэдагъыр сом меларди 2,6-рэ хъуащ, щыжаIащ КъБР-м Туризмэмрэ курортхэмкIэ и министерствэм. 
«ЗэрыгурыIуэгъуэщи, зы илъэскIэ пэхуэщIэхэр ягъэзащIэркъым, атIэ ахэр пIалъэкIэ шэщIа мэхъу. Абы къыхэкIуи, ахъшэр нэхъыбэу къыдошалIэ икIи 2024 гъэм елъытауэ мы гъэм нэхъ куэд тхузэфIэкIащ», - къыщыхагъэщащ министерствэм. 
Инвестицэ пэхуэщIэ нэхъ ин дыдэхэм щыщу, Къэбэрдей-Балъкъэрым и пэш фондым дызыхуэкIуэ илъэсхэм фIыуэ къыхэзыгъэхъуэнухэм ящыщу къалъытэ, Iуащхьэмахуэ лъапэ и ипщэ лъэныкъуэмкIэ щаухуэ - «Sky Alliance Elbrus» фIэщыгъэр зезыхьэ, спорт-адаптивнэ комплекс ехьэжьар. Абы хыхьэнущ хьэщIэщ пэшу 64-рэ цIыху 200 зэуэ зыщIэхуэ шхапIэ хэплъыхьамрэ. Инвестицэ ахъшэу пэхуэщIэм къыхашар сом мелуан 760-рэ мэхъу икIи 2026 гъэм и дыгъэгъазэм лажьэн щIидзэнущ.
«АЗАУ СОК» IуэхущIапIэм ахъшэу сом меларди 2,1-рэ хилъэхьэнущ Азау хуейм щаухуэну спорт-узыншагъэр щызэтрагъэувэж комплексым. Инвестицэ пэхуэщIэм хохьэ вагъуиплI зиIэ хьэщIэщ, шхапIэ, коттеджу щы, хьэмэм комплекс, подъемник, нэгъуэщIхэри. Апхуэдэуи, 2028 гъэм а щIыпIэм къыщызэIуахынущ туристу 120-рэ зэуэ щIэхуэ, вагъуиплI зиIэ хьэщIэщыр. Инвестицэ ахъшэр мыбдеж сом мелардитIым щыноблагъэ.
Абыхэм нэмыщI, Iуэхугъуэ куэдым хуэунэтIауэ Терскол къуажэм щаухуэнущ «Iуащхьэмахуэ. Азау хуей» фIэщыгъэр зезыхьэну турист комплексыр. Абы хыхьэнущ вагъуитху зиIэ, зэуэ цIыху мини 2,2-м нэблагъэ зыщIэхуэну хьэщIэщ ехьэжьар, администрацэм и хэщIапIэр, псыхущхъуэ-термальнэ комплексыр, цIыху 700-м нэблагъэ зэуэ зыщIэхуэну шхапIэр, нэгъуэщI ухуэныгъэхэри. 
Инвестицэ ахъшэу абы къыхашэнум и куэдагъыр сом мелард 18,2-рэ хъунущ. Комплексым и япэ Iыхьэм 2026 гъэм, етIуанэм - 2027 гъэм, ещанэм - 2028 гъэм я щэкIуэгъуэ мазэхэм лэжьэн щIадзэнущ.
«Iуащхьэмахуэ ГК» IуэхущIапIэм сом меларди I0-м щIигъу хилъхьэнущ Iуэхугъуэ куэдым хуэунэтIа, иджырей хьэщIэщ ехьэжьа хэту Азау хуейм щаухуэну комплексым. ХьэщIэщым вагъуиплI иIэнущ икIи пэшу 600 абы хэтынущ. Ар къыщызэIуахынур 2028 гъэм и щэкIуэгъуэрщ. 
Мыдрейуэ, министерствэм къызэритамкIэ, республикэм хьэщIэщ зэхуэмыдэу 62I-рэ нобэ иIэщ икIи нэгъабэрей бжыгъэхэм нэхърэ процент 51-кIэ ар нэхъыбэщ. 
ИпэIуэкIэ хъыбар зэрыщыIамкIэ, 2025 гъэм и щIышылэм – фокIадэм къриубыдэу Къэбэрдей-Балъкъэрым хьэщIапIэ къэкIуащ цIыху мелуан 1-рэ мин 557-рэ икIи нэгъабэ и апхуэдэ пIалъэм щыIа бжыгъэхэм нэхърэ проценти 9,4-кIэ ар нэхъыбэщ. 
ХЬЭЩОКЪУЭ Алыдж.
  • 23 просмотра
Поделиться: