Налшык классикэ макъамэ щоIу

Къэрал концерт гъэлъэгъуапIэм и пэIущIэ пэшым щагъэуват Темыркъан Юрэ и лэжьэгъухэм, и ныбжьэгъухэм, и унагъуэм я гъусэу зытригъэха сурэтхэр. 

«440 герц» саугъэт иным и тхыдэм уриплъэжмэ, ар 2022 гъэм япэу ирагъэжьащ. Iуэхур и жэрдэмщ Петербург и макъамэ критик, эксперт, гъуазджэ щIэныгъэхэмкIэ доктор, профессор Маркарян Надеждэ. И гупым и гъусэу, абы зэхьэзэхуэр зыхуэдэнур къигъэлъагъуэри, фIэщыгъи иритыжащ. Оркестр щэнхабзэм и дамыгъэу дуней псом щокIуэкI симфоние концертхэр щыщIидзэкIэ Iэмэпсымэхэр иризэтраухуэу кърагъауэ «ля» нотэр. «440 герц» хъужри а нотэращ. Саугъэтым и дамыгъэу ягъэуващ мылым къыхэщIыкIа, килограмми 100 зи хьэлъагъ камертоныр. Ар сыхьэтийм и кIуэцIкIэ ткIужыфынущ икIи скульптурэмрэ макъамэмрэ зэзышалIэщ.

Зэхыхьэр Налшык щрагъэкIуэкIащ икIи абы зэхуишэсащ къэрал псом щыIэ гъуазджэм и IэщIагъэлI нэхъыфIхэмрэ классикэ макъамэр фIыуэ зылъагъухэмрэ. Концертыр иригъэкIуэкIащ УФ-м и цIыхубэ артист, Санкт-Петербург и филармонием и Академическэ симфоническэ оркестр Темыркъан Юрэ и цIэр зезыхьэм и концертмейстер Клычков Лев (скрипкэ).

Мыгъэрей зэпеуэм хэтащ Урысейм и щIыналъэхэм щыщ уэрэджыIакIуэ, симфоние гуп 45-рэ. Абы хэтыну къыщIэлъэIуат Мурманск щыщIэдзауэ Белгород нэс, КъухьэпIэ Ищхъэрэм щыщIэдзауэ Якутием нэс я артист куэд. Къэбгъэлъагъуэмэ, гъэ къэси зэхьэзэхуэм зэхуешэс къэралым и щIыналъэхэм я симфоние оркестрхэр, концертмейстерхэр, уэрэджыIакIуэхэр, гупхэм я унафэщIхэр.

Къэрал концерт гъэлъэгъуапIэ Темыркъан Юрэ и цIэр зезыхьэм къэпщытакIуэ гупым хэтхэр лэжьыгъэхэм сыхьэтийкIэ хэплъа нэужь, къагъэнэIуащ зэпеуэм и еплIанэ Iыхьэм щытекIуахэм я цIэхэр. «Дирижёр» Iыхьэм пашэ щыхъуащ Лазарев Александр. «Оркестровая программа» унэтIыныгъэм щытекIуащ Уралым и филармоние оркестр Лисса Дмитрий зи унафэщIыр. АбыкIэ ехъулIэныгъэфI иIэу зи цIэ ираIуахэм ящыщщ Москва и Musica viva камернэ гуп Рудин Александр зи пашэр. Лауреат хъуахэу къагъэлъэгъуащ Тэтэрстанымрэ Башкортостанымрэ я Академическэ симфоние оркестрхэр, иужьрейм и дирижёр нэхъыщхьэ Крюков Дмитрий, флейтэ еуэнымкIэ дуней псом щыцIэрыIуэ, Москва МузыкэмкIэ и къэрал институт Шнитке А. Г. и цIэр зезыхьэм флейтэм щыхуезыгъаджэ Стачинская Иринэ. 

- Симфоние оркестрхэм я зэпеуэм теухуа мы саугъэтыр Урысей псом зыхуэбгъадэ хъун щымыIэ и зэхыхьэщ, - жиIащ «440 герц» оркестр саугъэт иным и унафэщI Маркарян Надеждэ. - А саугъэтыр щыдубзыхум абы и япэ унафэщIу щытар Темыркъан Юрэти, ар къытхэмытыжми, зэпеуэм пщIэ зиIэ и президенту къэдгъэнэжащ дирижёр цIэрыIуэр. 

  А махуэм и пщыхьэщхьэм Къэрал концерт гъэлъэгъуапIэм щекIуэкIащ Къэбэрдей-Балъкъэр филармоние Темыркъан Борис и цIэр зезыхьэм и симфоние оркестрым и концерт. Гупым и художественнэ унафэщIыр, дирижёрыр УФ-м щIыхь зиIэ и артист Темыркъан Пётрщ. Музыкантхэм ягъэзэщIащ Сен-Санс К., Чайковский П., Мендельсон З., Массне Ж., ХьэIупэ ДжэбрэIил, Растеряев Игорь сымэ я IэдакъэщIэкIхэм щыщ. 

Пэшым цIыхушхуэ зэрыщызэхуэсар и щыхьэтт мы макъамэхэм цIыхухэр зэрыдахьэхым. Пшыхьыр и кIэм щынэблагъэм, музыкантхэр яутIыпщыжыну ягу зэрыпымыкIым къыхэкIыу, Клычков Лев игъэзэщIащ Чайковский Пётр и «Лебединое озеро» лэжьыгъэм щыщ Iыхьэ. Абы къыхигъэщащ Темыркъан Юрэ илъэс 35-кIэ зэрыдэлэжьар, и егъэджакIуэр дапщэщи и дэIэпыкъуэгъуу зэрыщытамкIэ и насып къызэрикIар, Налшык зыхилъхьэ зэрыщымыIэр, къалэм къыщыкIуэкIэ бгыхэмрэ псыежэххэмрэ я къарур зэрызыхищIэр. 

Урысейм симфоние щэнхабзэр къыщыIэтыным, оркестрхэмрэ дирижёрхэмрэ нэхъыбэм къегъэцIыхуным, зэхьэзэхуэм хэтхэм нэхъри заужьыныр зи лъабжьэ мы зэпеуэр Налшык ехъулIэныгъэ иIэу щекIуэкIащ. Маркарян Надеждэ зэрыжиIамкIэ, 2025 гъэм Налшык щэнхабзэм и къалэу щытауэ къэплъытэ хъунущ.