Къуажэ уэрамхэр ягъэтэмэм

Къэбэрдей-Балъкъэрым и щIыналъэхэм я автомобиль гъуэгухэр щыIэ мардэм хуэгъэкIуэным ехьэлIауэ республикэм щекIуэкI лэжьыгъэхэм етIанэгъи пащэнущ икIи, хабзэ зэрыхъуауэ, нэхъыбэу гулъытэ зыхуащIынур егъэджэныгъэм, узыншагъэр хъумэным, спортымрэ щэнхабзэм пыщIа IуэхущIапIэхэм уахуэзэшэхэрщ. 
Псалъэм къыдэкIуэу, дызыхыхьэ илъэсым къызыхуэтыншэу зэрагъэпэщыжынущ республикэм и къуажэ зыбжанэм я уэрам нэхъыщхьэхэр. Абыхэм хохьэ Бэтэх жылэм и Депутатскэ, Ташлы-Таларэ Аруанымрэ Лениным и цIэр зезыхьэ, Гундэлэн къуажэм Атмурзаевым, Бапинаевым, Мокаевым я цIэхэр зезыхьэ, Щхьэлыкъуэм и Береговая, Джэрыджэхэ я цIэр зезыхьэ я уэрамхэр. 
Апхуэдэ лэжьыгъэхэр щрагъэкIуэкIынущ КъБР-м и щIыналъэхэм я къалэ, къуажэ нэхъ инхэм я уэрамхэми. Псалъэм папщIэ, абыхэм къызэщIаубыдэнущ Тэрч, Нарткъалэ, Майскэ, Бахъсэн къалэхэр, Къэщкъэтау поселкэр. 
Лэжьыгъэр ирагъэкIуэкIынущ «ГъащIэм хуэщIа инфраструктурэ» лъэпкъ пэхуэщIэм ипкъ иткIэ. 
 

Хабзэ яхуэхъуну мэгугъэ

Iуащхьэмахуэ лъапэ и джабэ нэкIухэм мы гъэм лыжэкIэ къыщажыхьыну щрагъэжьа махуэм, дыгъэгъазэм и 6-м, иращIылIа гуфIэгъуэ зэхыхьэм турист мини 6,6-рэ кърихьэлIащ. 2024 гъэм щIышылэм и 2-м щыIа бжыгъэхэм нэхърэ ар тIэкIу нэхъ мащIэщ - абы щыгъуэ Iуащхьэмахуэ и джабэ нэкIухэм къыщажыхьащ е я нэгу зыщрагъэужьащ цIыху мини 7,2-м. 
«Мы гъэм дыхущIэкъуащ а махуэр хэIэтыкIауэ дгъэлъэпIа зэрыхъуным. ЗэрыфщIэщи, Iуащхьэмахуэ къуршыр дуней псом щыцIэрыIуэщ: ди къэралми Европэми щынэхъ лъагэщ. НэщэнэфIщ лыжэ къэжыхьыгъуэр щрагъэжьа махуэр гуфIэгъуэкIэ абы къызэрыщызэIутхар. Сыту жыпIэмэ, бгы лыжэм, сноубордым, езы къуршым дихьэххэр куэду зыIэпешэ, а бжыгъэми къыхэхъуэ зэпытщ. Си гугъэщ нобэрей жэрдэмыр хабзэ тхуэхъуну, бгыхэр фIыуэ зылъагъухэр илъэс къэс нэхъыбэу мыбы щызэхуэсыну», - жиIащ «Урысейм и къуршхэр» экосистемэм и унафэщI Виноградов Илья. 
Фигу къэдгъэкIыжынщи, Iуащхьэмахуэ лъапэ деж щызэхаша гуфIэгъуэ зэхуэсыр къызэригъэпэщащ «Урысейм и къуршхэр» экосистемэм, УФ-м Экономикэ зыужьыныгъэмкIэ и министерствэр, Кавказ.РФ-р, КъБР-м и Правительствэр къыдэIэпыкъуу.
 
 

Унагъуэхэрщ бжыгъэхэр къыдэзыщIейр

2025 гъэм и щIышылэм – жэпуэгъуэм къриубыдэу Къэбэрдей-Балъкъэрым и мэкъумэш, фермер, уней IуэхущIапIэхэмрэ унагъуэхэмрэ зэхэту джэдыкIэу мелуан 31,6-рэ кърахащ икIи нэгъабэ и апхуэдэ пIалъэм щыIа бжыгъэхэм нэхърэ проценти 4,4-кIэ ар нэхъыбэщ.
Апхуэдэуи, а IуэхущIапIэм зэбгригъэха хъыбарым къызэрыщыхэщымкIэ, къапщытэж пIалъэм къриубыдэу мэкъумэш, фермер, уней IуэхущIапIэхэм зы джэдым хуэзэу ику иту джэдыкIи 181-рэ къыщIахащ. Нэгъабэ и апхуэдэ пIалъэм а бжыгъэр зэрыхъуар 177-рэщ. Ауэ, къыхэгъэщыпхъэщи, джэдыкIэу псори зэхэту республикэм щызэщIакъуам и процент 16-р абыхэм къалъысу аращ. Мыбдежым, бжыгъэхэр къыдэзыщIейр унагъуэхэрщ – процент 80-м щIигъу яIэу.