Налшык и уэрамхэр къагъэщIэрэщIэж

КъБР-м и Iэтащхьэ КIуэ­кIуэ Казбек зригъэлъэгъуащ «ГъащIэм папщIэ ухуэ­ныгъэхэр» лъэпкъ про­ектым хыхьэу мы илъэсым зы­хуей хуагъэ­зэжа гъуэгу­хэр. ЩIыналъэм и Уна­фэ­щIым и гъу­сэу щIыпIэхэм щыIащ республикэм транспортымрэ гъуэгу хозяйствэмкIэ и ­ми­нистр ДыщэкI Аслъэнрэ Налшык къалэ админист­рацэм и унафэщI Ахъуэхъу Таймуразрэ.

Республикэм и къалащхьэм сыт и лъэныкъуэкIи зыхуей хуэзэу щы­зэра­гъэ­пэщыжащ Нэгумэм и цIэр зезыхьэ уэрамыр. Мыбы ­лэжьыгъэшхуэ щрагъэкIуэкIащ - псы зэрыкIуэ бжьамийхэр щIэкIэ яхъуэжащ, ­гъуэгум ­телъ асфальтыр къа­гъэ­щIэрэ­щIэжащ, унэ­хэм я пщIантIэхэр, лъэс ­лъагъуэхэр, гъуэгуры­гъуа­зэхэр, тран­с­порт къэувы­IэпIэхэр зыхуей хуа­гъэ­зэ­жащ, уэздыгъэ пкъохэр зэ­ра­хъуэкIащ, «Уафэ къабзэ» программэмкIэ кIапсэхэр псори щIы щIагъым щIалъ­хьащ. 
Апхуэдэ дыдэ лэжьыгъэр щагъэ­защIэ КIыщокъуэм и цIэр зезыхьэ уэрамми. Мы­гувэу а Iуэхухэри и кIэм нагъэсынущ.
НэгъуэщI ухуэныгъэхэри зэ­рагъэ­пэщыжащ. Мы илъэ­сым Налшык зыхуей щы­хуагъэзэжащ Балъкъэ­рым, Головком, Каменскэм, Къэ­рэ­шейм, КIы­щокъуэм, Нэгу­мэм, Щорсым я цIэ­хэр зе­зыхьэ уэрамхэм километ­рипщI хъу я гъуэгу Iыхьэхэр. 
Ахъуэхъу Таймураз зэрыжиIамкIэ, етIанэгъэ я му­-радщ Тэрчокъуэм, Къэ­рэ­шейм, Байсултановым, ПащIэм, Абыдэм я цIэхэр зезыхьэ, Калинин­радскэ уэ­рамхэр сыт и лъэныкъуэкIи зэпэщ ящIыну. Апхуэдэу хьэблэхэр кварталкIэ зэ­пы­зыуд уэрамхэр зэгъэпэ­щы­жыным хуэунэтIауэ къалэ проектышхуэр гъэзэщIэн щIа­дзэнущ. Налшык къалэ администрацэм и унафэ­щIым къызэрыхигъэщамкIэ, а Iуэхур щрагъэжьэнущ Кэнжэ и уэрам зыбжанэм (км  6,5-рэ), адэкIэ къы­щыпащэнущ Александровкэ (км 9-м ­щIигъу), Стрелкэ (км 5-м нэблагъэ) хьэб­лэ­хэм, Хьэсэней жылэм и уэрам зыбжанэм. Проектым хэхуэнур илъэсипщI бжыгъэкIэ зэгъэ­пэщыжы­ны­гъэ­хэр щрамыгъэкIуэкIа уэ­рам­хэрщ. 
КIуэкIуэ Казбек яхуэзащ ­гъуэгу ухуэныгъэхэр езыгъэкIуэкI, инженер коммуникацэхэр зэзыхъуэкI, щIы­пIэхэр зэIузэпэщ зыщI IуэхущIапIэхэм я лIыкIуэхэм икIи я лэжьыгъэр нэ­гъэсауэ зэ­рагъэзащIэм папщIэ фIы­щIэ яхуищIащ, адэкIи ехъу­лIэ­ныгъэхэр яIэу я IэнатIэм пэрытыну ехъуэ­хъуащ. 
Республикэм и Iэтащхьэм жиIащ 2030 гъэ пщIондэ лэжьыгъэшхуэхэр зэраубзы­хуар, Президентым, Гъуэгу фондым, къэралым я дэIэ­пыкъуныгъэкIэ гъуэгухэр егъэ­фIэкIуэным хуэунэтIа лэ­жьыгъэм адэкIи къызэ­ры­пащэнур. «Шэч къытес­хьэркъым дызэгъусэу сыт хуэдэ къалэнми дызэры­пэ­лъэщынум», - къыхигъэщащ КIуэкIуэ Казбек. 
Апхуэдэу щIыналъэм и УнафэщIыр епсэлъащ Налшык къалэ администрацэм и архитектор нэхъыщхьэ Бы­-дэ Аслъэн. И гугъу ящIащ Налшык и къалэкум щыIэ ухуэныгъэхэр зэгъэпэ­щы­жы­нымкIэ щыIэ проект зэ­мы­лIэужьыгъуэхэм, къалэ ад­министрацэм и унэм и щIы­быр къызэрагъэщIэрэ­щIэ­жы­нум.