КIэрэфхэ я щIалэ жан

КIэрэф Тимур Къэбэрдей-Балъкъэр гуманитар-техникэ колледжым и студентщ. Ар зэрыцIыкIурэ спортым дехьэх, псом хуэмыдэу фIэфIщ псым есынымрэ волейболымрэ. ИужьреймкIэ щIалэр щIэх-щIэ­хыурэ хэтщ Кавказ Ищхъэрэ, Ипщэ федеральнэ щIыналъэхэм, ди республикэм щекIуэкI зэпеуэхэм, студентхэм я спорт зэхьэзэхуэхэм. А спорт Iуэхухэм абы ехъкулIэныгъэ­хэр щызыIэрегъэхьэ, и зэфIэкIым щыхегъахъуэ. 
Тимур и япэ тренер Мамрэш ­Къамболэтщ волейболыр фIыуэ ­езы­гъэ­лъэгъуар, чэнджэщэгъуи, гъуэ­гу­гъэлъагъуи, щапхъэфIи хуэ­хъуар. Иджыпсту кIэрэфыр я гъэ­сэнщ Коноплёвэ Аннэрэ Гъэнокъуэ Русланрэ. 
Мы гъэм жэпуэгъуэм щегъэжьауэ дыгъэгъазэм пщIондэ спортымкIэ республикэм щекIуэкIа «Путь чемпионов» студент зэпеуэм жыджэру хэтащ Тимур. МазиплIым къриубыдэу колледжи 8-м я студентхэр тхьэмахуэ къэс зэхьэзэхуащ спорт лIэужьыгъуэ зэхуэмыдэхэмкIэ. Къэбэрдей-Балъкъэр гуманитар-техникэ колледжым и гупым а зэпеуэхэм волейболымкIэ бжьыпэр щаубыдащ, езы Тимур къыфIащащ «Турнирым и джэгуакIуэ нэхъыфI» цIэр.
Зы хъуэпсапIэр зыIэригъэхьэрэ, нэгъуэщIым зезыпщыт спортсменым мурадыщIэхэр и куэдщ.