«Сыринэм» и зэфIэкIыр

Анэдэлъхубзэр, лъэпкъ щэнхабзэмрэ хабзэмрэ хъумэным хуэгъэп­сауэ «Адыгэ дуней» жылагъуэ фондым илъэситху ипэкIэ къызэригъэ­пэ­ща «Сыринэ» адыгэ ныбжьыщIэ театрым ехъулIэныгъэфIхэр иIэщ. Абы щыджэгу ныбжьыщIэхэм зэ­фIэкI хъарзынэхэр къагъэлъагъуэ, утыку итыкIэм деж щегъэжьауэ лъэп­къыбзэр зэрагъэбзэрабзэм деж щы­щIэ­кIыжу. Гупым утыку ­кърихьэ лэжьыгъэхэм цIыхухэр яфIэ­фIу йоплъ. 

- Япэу гупыр щызэхэтшэм ныбжьыщIэхэм нэхъ яхуэгъэза, зи гъэ­сэныгъэр иджыри мыпсыхьыпахэм щIэгъэкъуэн яхуэхъун хуэдэу къы­зэд­гъэ­пэщу арат, - къыджиIащ театрым и унафэщI, КъБР-м щIалэгъуалэ Iуэху­хэмкIэ и министерствэм и къудамэм и унафэщI Гугъуэтыж Ахьмэд. - Япэу дызыIууар щIалэгъуалэм яхуэгъэза пьесэ дызэримыIэрщ. АбыкIэ щIэгъэкъуэнышхуэ къытхуэхъуащ усакIуэ, драматург, «Горянка» газетым и редактор нэхъыщхьэ Къаныкъуэ Заринэ. Абы тхуитх пьесэхэмкIэ спектакль ­тхуигъэувыну Горький Максим и цIэр зезыхьэ Урыс драмэ театрым абы щыгъуэ щылэжьа Къанкъул Ислъам дыщелъэIум, дигъэщIэхъуакъым, нобэми ныбжьыщIэхэм аращ ядэлажьэр. Театру къежьа гупыр зэман дэкIри ­студие тщIащ, утыку итыкIэм зэры­хуеджамкIэ щыхьэт тхылъхэр ядот иджы. 
Iуэхум гурэ псэкIэ бгъэдэт цIыхухэр и щIэгъэкъуэнщ «Адыгэ дуней» лъэпкъ фондым и «Сыринэ» ныбжьыщIэ театрым. Ар фондым и унафэщI Хьэ­цIыкIу Рае, гупым и унафэщI ­Гугъуэтыж Артур, мылъкукIи, IуэхукIи, чэнджэщкIи гупыр къызэзыгъэпэщ Шыкъ Гуп­сэ, Хасащхьэм хэт Аскэр Атилэ, режиссёр Къанкъул Ислъам сымэщ, нэгъуэщIхэри.  
ИлъэситIкIэ щеджэу, «Адыгэ дунейм» и мыхъурыр зытелъ дэфтэрыр ирата иужь, гупым хэкIыжыну хуитщ дэтхэнэри, апхуэдэущ зэрыщытын ­хуейри. Ауэ театрыр щызэхэша япэ махуэм къыщыщIэдзауэ зигу пымыкIыу абы хэтхэр яIэщ – ар узыщыгуфIыкI ­хъунщ. 
- Япэ дыдэу «Сыринэм» игъэуващ Заринэ и «Унащхьэ» спектаклыр, абы къыкIэлъыкIуащ «МафIэгу», «Къе­жэкI» жыхуиIэхэр. ЕплIанэр тхуитхащ Аброкъуэ Аслъэн. «Къуажэ» зи фIэщыгъэ ныбжьыщIэ спектаклыр и кIэм нагъэблагъэ, илъэсыщIэм дызэрытехьэу утыку къитхьэну ди мурадщ, - къы­джиIащ Ахьмэд. – НэгъуэщI зыгуэрым гупыж ищIрэ итхми, ди гуапэу ды­хэплъэнущ, дигу ирихьмэ, къэтщтэнущ.  
«Театральная завалинка» урысей­псо фестиваль-зэхьэзэхуэм япэ увы­пIэм­рэ «Анэдэлъхубзэр зэрахъумэм папщIэ» и дипломымымрэ къыщы­хуа­гъэфэщауэ щытащ театрым. Къы­хэгъэщыпхъэщ а зэхьэзэхуэм гупи 150-рэ зэрыхэтар. «Сыринэм» игъэ­лъэ­гъуат и лэжьыгъэр зытещIыхьа Заринэ и «КъежэкI» пьесэмкIэ Къанкъул Ислъам игъэува спектаклыр. Илъэс щэщI хъуауэ ирагъэкIуэкI мы зэпеуэм иджы япэу щагъэлъагъуэу арат лъэп­къыбзэкIэ ягъэува лэжьыгъэ.
Мы гъэм «Сыринэр» хэтащ Анкара щекIуэкIа дунейпсо фестивалым. Абы иужькIэ Къайсэр Хасэр къыкIэлъы­джэ­ри, абыи махуэ зыбжанэкIэ щы­Iащ, зыкъыщагъэлъэгъуащ. А къэралым щыпсэу адыгэхэм хуабжьу яфIэгъэ­щIэгъуэнащ щIалэгъуалэм я теат­рыр, абыхэм я утыку итыкIэр. Ис­­там­был Хасэри къеджащ «Сыри­нэм», зэман гъунэгъум абыи кIуэну я гу­рылъщ. 
«ПщIэншэу зыкъэдгъэлъагъуэ щхьэ­кIэ, ди пшыхьхэр гукъинэжу зэ­ры­щытым къыхэкIыу, цIыхухэр куэду ­къокIуалIэ, лъэIукIэ къешэлIэн хуей мыхъуу. Псалъэм и хьэтыркIэ, Дзэлыкъуэ районым щыщ Шордакъ къуа­жэм драгъэблагъэу дыщыкIуам, тIы­сыпIэ имыIэжым и закъуэтэкъым, щы­ту къы­дэплъхэри гъунэжт. Апхуэдащ Тэрч, Аруан, нэгъуэщI районхэри», - жеIэ Ахьмэд. 
Мазэ зы-тIу ипэкIэ Налшык и Киноконцерт гъэлъэгъуапIэ Темыркъан Юрэ и цIэр зезыхьэм и пэшышхуэм «Сы­ринэр» илъэситху зэрыхъур Iэтауэ щагъэлъэпIащ. Абы министерствэ­хэмрэ ведомствэхэмрэ я къулыкъу­щIэ­хэри кърагъэблэгъащ, и спектаклхэри щагъэлъэгъуащ, Заринэрэ Ислъамрэ щIыхь тхылъхэр хуагъэфэщащ. Апхуэ­дэуи ЩIалэгъуалэ Iуэху­хэмкIэ министерствэм илъэсищ хъуауэ театрым ­хухех грант. Спектаклхэр пщIэншэу зэрагъэ­лъагъуэр, мылъку къызэ­ры­хэмыхъуэр къэплъытэмэ, а ахъшэ сау­гъэтыр куэд и уасэщ театрым и дежкIэ.  
Къэрэшей-Шэрджэсым зыкъыщигъэлъэгъуащ, Къэбэрдей-Балъкъэ­рым и район псоми щыIахэщ, иджыри къуажэ псоми кIуэну я гугъэщ. Мурадхэм щыщщ Адыгей Республикэм я лъэр нахусыныр. Налшык мазэ къэ­сы­х­укIэ зэ зыкъыщагъэлъэгъуэну, Къэ­рал киноконцерт гъэлъэгъуапIэм  и пэш цIыкIур ЩэнхабзэмкIэ министерствэм хуит къахуищIауэ щытщ. Илъэс лэжьыгъэр иризыхуащIыжу ­ды­зэрыт дыгъэгъазэ мазэм театрым зыкъыщигъэлъэгъуэнущ Искож хьэб­лэм дэт Щэнхабзэ зыужьыныгъэмкIэ IуэхущIапIэм.
- Мурадрэ хъуэпсапIэу диIэр куэдщи, къыдэхъулIэну, абы щхьэкIэ дызы­хуэныкъуэ псомкIи дызэпэщыну сы­хуейщ. Ди лъэныкъуэкIэ тлъэкI къэдгъэнэнукъым щIэблэр гъуазджэм, дахагъэм дегъэхьэхынымкIэ, анэдэлъ­хубзэр, къыщалъхуа лъахэр фIыуэ илъагъуу къэгъэтэджынымкIэ, - жеIэ Ахьмэди, афэрым, фигу ифлъхьэ псори къывдэхъуну!