ПэхуэщIэхэм пащэ

«Къуажэхэм сыт и лъэныкъуэкIи зегъэужьын» къэ­рал программэм ипкъ иткIэ Къэбэрдей-Балкъэрым и жылэхэр зэIузэпэщ щIы­ным хуэунэтIауэ мыхьэнэшхуэ зиIэ пэхуэщIэу 5 республикэм щагъэзэщIэнущ дызыхуэкIуэ илъэсым.
 
Абыхэм ящыщу тIур Прохладнэ районым щыIэщ. Ахэр Солдатскэ жылэм дэт, щIы­налъэ-щэнхабзэ мыхьэ-нэ зиIэ, Хэку зауэшхуэм хэ­кIуэдахэм я фэплъым къе-дза щIыпIэр зыхуей хуэгъэ­зэнымрэ Алътуд къуажэм ХьэхъупащIэм и цIэр зезы-хьэ и уэрамым и лъэс лъа­гъуэхэр, аллеер, лъакъуэрыгъажэкIэ щызекIуэ гъуэгухэр щыухуэнымрэщ.
Дзэлыкъуэ щIыналъэм и Псынэдахэ къуажэмрэ Май районым и Александровскэ жылэмрэ сабийхэм я джэгупIэхэр щащIынущ, зы­хуей- зыхуэфIхэмкIэ ахэр къызэ­рагъэпэщынущ, унагъуэхэм зыщагъэпсэхун, я нэгу зыщ­ра­гъэужьын щIыпIэхэри  хэту.
Бахъсэн къалэм хыхьэ ­Дыгулыбгъуей къуажэм ­КъБР-м и Япэ Президент КIуэ­кIуэ Валерэ и цIэр зе­зыхьэ утыкум баскетболым хуэщIа губгъуэрэ сабий ­джэгупIэрэ дызыхуэкIуэ илъэ­­сым гъатхэм ухуэн щы­щIадзэнущ икIи гъэмахуэм ипэхэм ирихьэлIэу ар и кIэм нагъэсын мурад щыIэщ. Лэ­жьыгъэхэр щрагъэкIуэкIыну щIыпIэр псори зэхэту метр зэбгъузэнатIэ мин 1,5-рэ мэхъу. 
«Дыгулыбгъуей къуажэм цIыху мин 20-м щIигъу щопсэу икIи мыпхуэдэ щIыпIэм ахэр икъукIэ хуэныкъуэщ», - жиIащ Бахъсэн къалэ администрацэм и унафэщI Мам­хэгъ Хьэчим. 
Къэрал, республикэ бюд­жетхэм къыхэкIыу ищхьэ­IуэкIэ зи гугъу щытщIа пэхуэ­щIэхэм сом мелуан 12,8-рэ трагъэкIуэдэнущ.