Дамир Европэм и вице-чемпионщ

Олимп джэгухэм хыхьэ тхэквондо лIэужьыгъуэмкIэ (ВТФ) Европэм пашэныгъэр къыщыхьыным хуэунэтIа зэхьэзэхуэ дыгъэгъазэм и 11 - 14-хэм Косовэм и къалащхьэ Приштинэ щекIуэкIащ. Абы щызэпеуащ къэрал куэдым я спортсмен лъэщ-       хэр, щIалэхэри хъыджэбзхэри зэхэту, 500-м нэб­лагъэ, я ныбжькIэ илъэс 21-м щIимыгъуауэ.

УФ-м и командэ къыхэхам хэту зэхьэзэхуэм щыIащ Къэбэрдей-Балъкъэрым и спортсмен, Кэнжэ къуа­жэм дэт «Пять колец» спорт академием и гъэсэн Iусен Дамир икIи, ди гуапэ зэрыхъущи, дыжьын ме­даль абы къыщихьащ.
Килограмм 58-рэ зи хьэлъагъхэм я деж ди щIалэм зэIущIих щригъэкIуэкIати, тхум щытекIуащ, ауэ фи­налым абы къыщыпэщIэта, Тыркум щыщ спортсмен Бадем Исуф мызыгъуэгукIэ нэхъ лъэщу къыщIэкIащ. 
Iусен Дамир дэлажьэр УФ-м щIыхь зиIэ и тренер Ахъмэт Амирщ.