Лъэс лъагъуэхэр ирагъэфIакIуэ

Къэбэрдей-Балъкъэрым и къалэхэмрэ къуажэхэмрэ я лъэс лъагъуэхэр егъэфIэкIуэным ехьэлIауэ лэжьыгъэшхуэ республикэм 2025 гъэм щрагъэкIуэкIащ. ЖыпIэнурамэ, «ГъащIэм хуэщIа инфраструктурэ» лъэпкъ пэхуэщIэм ипкъ иткIэ тротуаррэ лъэс лъагъуэ цIыкIуу псори зэхэту километр 50-м щIигъу зыхуей хуагъэзащ е щIэуэ яухуащ.

ПэхуэщIэм къыщыгъэлъэгъуа Iуэхугъуэхэр зэрагъэзэщIам и фIыгъэкIэ социальнэ мыхьэнэ зиIэ ухуэныгъэхэм: еджапIэхэм, сымаджэщхэм, сабий садхэм, спорт комплексхэм, щэнхабзэмкIэ унэхэм, нэгъуэщIхэми екIуалIэ лъэс лъагъуэхэр зэпэщ ящIащ, цIыхухэм я тыншыпIэмрэ шынагъуэншагъэмрэ къызэгъэпэща хъуащ. Псалъэм къыдэкIуэу, тротуарыщIэхэр щаухуащ Дей, Малкэ, Ташлы-Тала, Каменкэ, Нейтринэ, Александровскэ жылэхэм я уэрамхэм икIи уэздыгъэхэмкIэ ахэр къызэщIагъэнэхуащ.

Апхуэдэ лэжьыгъэхэр щекIуэкIащ Налшык къалэм Нэгумэмрэ КIыщокъуэмрэ я цIэхэр зезыхьэ и уэрамхэми икIи ахэр къызыхуэтыншэу зэрагъэпэщыжащ. Ауэ мы щIыпIэхэм, асфальт мыхъуу, тротуар плиткэхэр щралъхьащ. Ислъэмей, Нартан, Зэрэгъыж къуажэхэми лъэс лъагъуэщIэхэр щаукъуэдиящ.

Лэжьыгъэхэр щIыпIэ псоми щрагъэкIуэкIащ щыIэ мардэхэм тету, цIыхухэм я шынагъуэншагъэмрэ тыншыпIэмрэ къызэгъэпэщыным, пIалъэ жыжьэкIэ ахэр зэрызекIуэным хуэунэтIауэ икIи 2026 гъэм абыхэм пащэнущ.