Сэр нэхъ дахи уэ бгъуэтынщ

Сыт цIыхубзхэм я нэхъыбэр зыщIэхъуэпсыр? Псом нэхърэ нэхъ дахэу щытыным. Ар хъарзынэщ уи дахагъэр фIым гъуэгу игъуэтын папщIэ къэбгъэщхьэпэмэ. Ауэ теплъэ нэIурытым укъызэфIигъэщIыжмэ, къыпщыщIынур пщIэнукъым. Феджэт «псом нэхърэ нэхъ дахэ хъуам» къыщыщIам.

IисраIил и бынхэм диным и гур етауэ зы цIыху яхэтт, фIы дыдэу илъагъуу щхьэгъусэ иIэу. ЛIым къыхуэарэзы Алыхьталэм абы мелыIыч къыхуигъэкIуащ, лъэIуищкIэ зыхуигъазэмэ, къызэрыхуищIэнумкIэ къигъэгугъэу.

Арати, лIым ар и щхьэгъусэм хуиIуэтэжащ, сызэрелъэIунур сщIэркъым, жыхуиIэу. «ИIэ, зы лъэIур сысейуэ, адрей тIур ууейуэ дыгъэщI», - жеIэ цIыхубзым. «СыткIэ сыпхуелъэIун?» - йоупщI лIыр и щхьэгъусэм. «Псом нэхърэ нэхъ дахэ сыхъуну схуелъэIу», - жеIэ модрейм.

ЛIым духьэ ищIри, и щхьэгъусэр пхуэмыIуэтэну тхьэIухуд хъуащ.

Махуэ гуэрым цIыхубзым дэкIыну зыкърихати, и лIыр къоупщI: «Дэнэ уздэкIуэр?» «Пащэм деж сокIуэ. Сыт сэ си дахагъэр уэ пхуэдэ цIыхум щIытезгъэкIуэдэнур?» - жэуап кърет и щхьэгъусэм. ЛIым ар къигъэувыIэну хэтащ, арщхьэкIэ хузэфIэкIакъым.

Ауэрэ цIыхубзым и дахагъэм и хъыбар сулътIан гуэрым зэхех, и пщылIхэр къегъакIуэри, лIым и щхьэгъусэр щхьэхуимыту сэрейм яшэ. Сыт ищIэжынт лIым? «Ялыхь дэ ди Тхьэ! Сэ иджыри лъэIуитI къысхуэнэжащ, къысхуэпщIэну сыкъэбгъэгугъауэ. Ялыхь! Си щхьэгъусэр номин щIы!» - зыхуигъэзащ абы Алыхьталэм. Арати, цIыхубзыр номин щыхъум, сулътIаным ар къыщIихужащ, мори и лIым деж къэкIуэжащ. «Ялыхь, си щхьэгъусэр зэрыта теплъэм игъэувэж», - лIым ещанэу Алыхьталэм зыхуегъазэ. ЦIыхубзыр зэрыщытам хуэдэу хъужащ. Абдежым тIуми къагурыIуащ я лъэIуищыр пщIэншэу зэрагъэкIуэдар.

ЦIыхум зыхуей псори Алыхьталэм къыщIыхуимыщIэр языныкъуэхэм деж и щхьэм и зэран зэрекIыжыр армырауэ пIэрэ?

Дауи, мы хъыбарым къикIыркъым уи теплъэм укIэлъыплъыж мыхъуну. Ауэ сыт и лъэныкъуэкIи хъийм уикIмэ, насыпым уибгынэнкIэ шынагъуэщ.