Узыншэу псэуным хуаузэщI

2026 гъэм щIышылэм и 1 - 11-хэм Урысей Федерацэм и щIыналъэхэм щызэхэтащ хабзэ хъуа, Спортымрэ узыншагъэмрэ я декадэ Iуэхугъуэ щхьэпэр. Илъэс къэс ар къызэрегъэпэщ УФ-м СпортымкIэ и министерствэм, щIыналъэхэм физкультурэмрэ спортымкIэ я IэнатIэхэр и гъусэу.

А Iуэхугъуэхэм хыхьэу Налшык къалэ администрацэм Физкультурэмрэ спортымкIэ и управленэм и нэIэ щIэт спорт еджапIэхэр декадэм жыджэру хэтащ.

ЖыпIэнурамэ, къалащхьэм бэнэкIэ хуитымрэ боксымкIэ и спорт еджапIэ №3-м ныбжьыщIэхэм бэнэкIэ хуитымкIэ я зэхьэзэхуэ щекIуэкIащ, футбол цIыкIумкIэ зэпеуэ щызэхашащ курыт еджапIэ №33-м и топджэгу губгъуэм.

ЩIышылэм и 6-м, декадэм ипкъ иткIэ, гимназие №29-м и спорт залым щекIуэкIащ хъыджэбз цIыкIухэм волейболымкIэ я зэхьэзэхуэ. Абы щытекIуащ къалэ администрацэм и спорт еджапIэ №1-м и гъэсэнхэр. ЕтIуанэ увыпIэр къихьащ курыт еджапIэ №25-м и командэм, ещанэ хъуащ хэгъэрейхэр. Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр, саугъэт лъапIэхэр иратащ. Апхуэдэуи, а зэпеуэм спортсмен нэхъыфIу къыщалъытащ Бейтыгъуэн Ланэ.

А махуэ дыдэм «Кристалл» спорт комплексым щекIуэкIащ баскетболымкIэ зэхьэзэхуэ. Абы щызэпеуащ 2012 - 2013 гъэхэм къалъхуа щIалэхэмрэ хъыджэбзхэмрэ. Зэхьэзэхуэм хэтащ Прохладнэ, Бахъсэн, Налшык къалэхэм я спортсмен ныбжьыщIэхэр. Хъыджэбзхэм я деж нэхъ нэхъ лъэщу къыщыщIэкIащ налшыкдэсхэр, щIалэхэм я деж - Бахъсэн къикIахэр.

ЩIышылэм и 8 - 10-хэм Налшык къалэм шахматымрэ шашкэмкIэ и «Ладья» спорт еджапIэм шахматымкIэ зэхьэзэхуэ иригъэкIуэкIащ. Ар щызэхэтар «Каисса» клубырщ икIи абы щызэпеуащ республикэм и щIыналъэхэм я лIыкIуэу 100-м щIигъу.

Удэзыхьэхыу икIи гъэщIэгъуэну екIуэкIа зэхьэзэхуэхэм япэ увыпIэхэр къыщахьащ ТекIуий Эмир, Хьэмжу Беслъэн, Николаевэ Вероникэ, Щоджэн Рэхьим, Джыназ Ритэ, Щэуей Тимур, Бозий ЖэбрэIил, Бабаев Алий, Джатэгъэжь Марат, Ерыстау Амир сымэ.

ЕтIуанэ хъуахэщ Алэкъей Сэлэдин, Жэмбей Артур, Шэрий Камеллэ, Бахъсэн ФатIимэ, Бауаевэ Наиля, Абазэ Исмэхьил, ЦокIыл Альтаир, Увыж Аурикэ, Ногеров Малик сымэ.

Чылар Динур, Шэрджэс Къантемыр, Урысмамбэт Раметэ, Лу Темырлан, Щоджэн Элинэ, Тау Владимир, Бесчокъуэ Щыхьмырзэ, Амщокъуэ Ибрэхьим, Дудар Сэлим сымэ ещанэ увыпIэр къахьащ.

Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр иратащ.

Фигу къэдгъэкIыжынщи, Спортымрэ узыншагъэмрэ я декадэм и къалэн нэхъыщхьэу щытыр къэралым и цIыхухэр, псом хуэмыдэу сабийхэмрэ щIалэгъуалэмрэ, спортымрэ физкультурэмрэ дегъэхьэхынырщ, абыхэм я узыншагъэр егъэфIэкIуэнырщ, узыншэу псэуным хуэузэщIынырщ.