Уэтэр Анатолэ ящыгъупщэркъым

КъБАССР-м и цIыхубэ артист, уэрэджыIакIуэ цIэрыIуэ Уэтэр Анатолэ къызэралъхурэ илъэс 85-рэ ирокъу.

Уэтэр Анатолэ Прохладнэ щIыналъэм хыхьэ Къэрэгъэш къуажэм 1941 гъэм щIышылэм и 14-м къыщалъхуащ. 1960 гъэм курыт еджапIэр къуажэм къыщиухри, Налшык и Музыкэ училищэм щIэтIысхьащ, ауэ ар къиухакъым, хуабжьу дэзыхьэх атлетикэ хьэлъэм фэбжь къызэрыхихам къыхэкIыу. ЕтIуанэ курсым щыщIэсым, Калининградскэ областым ягъэкIуащ, и узыншагъэр иригъэфIэкIуэну. Илъэсрэ ныкъуэкIэ абы щыIауэ, къигъэзэжри, Къэрэгъэш къуажэм ЩэнхабзэмкIэ и унэм и унафэщIу лэжьащ. «Уэрэдымрэ къафэмкIэ» къэрал ансамблым и хорым ар ирагъэблэгъащ 1963 гъэм. КъБАССР-м и Къэралтелерадиом 1965 гъэм лэжьэн щыщIидзащ.

Мейкъуапэ къалэм и Адыгей къэрал пединститутым 1975 гъэм щIэтIысхьащ Уэтэр Анатолэ. 1980 гъэм ар къиухащ, музыкэмрэ уэрэд жыIэнымкIэ егъэджакIуэ IэщIагъэр иIэу.

 Уэтэр Анатолэ и уэрэдхэр зэхэзымыха, ахэр фIыуэ зымылъагъу ди республикэми адыгэ щыпсэу нэгъуэщI щIыналъэхэми щыIэу фIэщщIыгъуейщ. Ар лэжьыгъэр фIыуэ зылъагъу, гукIи псэкIи абы пэрыт, хьэл-щэн, гъэсэныгъэ дахэ, жэуаплыныгъэ ин зыхэлъ цIыхут. Хорым хэтми, и IэнатIэри ныкъусаныгъэншэу абы ирихьэкIырт. КъинэмыщIауэ, и закъуэу уэрэдхэр жиIэрт, цIыхубэм ягу дыхьэу. Къэбэрдей-Балъкъэр къэрал филармонием ирагъэблэгъа нэужь, абы Iэмал нэхъыбэ иIэ хъуащ утыку ихьэну, и макъыр цIыхубэм зэхахыну.  

1970 гъэм Уэтэр Анатолэ къыхуагъэфэщащ «И лэжьыгъэфIым папщIэ» медалыр, «КъБАССР-м щIыхь зиIэ и артист» цIэ лъапIэр 1973 гъэм къыфIащащ.

УэрэджыIакIуэ цIэрыIуэ, щIэиныфI къэзыгъэна Уэтэр Анатолэ 1988 гъэм дунейм ехыжащ, и ныбжьыр илъэс 48-м иту. Ар цIыхубэм ящыгъупщэркъым, и уэрэдхэм ноби йодаIуэ, радиомрэ телевиденэмкIэ къат. Абыхэм ящыщщ цIыхухэм фIыуэ ялъэгъуа «Си нанэ дыщэ», «Гум и уэрэд», «Адыгэ пшынэ», «Маринэ», «Люсенэ», «Лъагъуныгъэм и хьэтыркIэ», «МамытIэ» жыхуиIэхэр.

ТЕКIУЖЬ Заретэ.