IэмалыщIэхэм нэхъ трагъащIэ

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Къэбэрдей-Балъкъэр Республикэм бжыгъэхэр зи лъабжьэ зыужьыныгъэмкIэ, связымрэ цIыхубэ зэпы­щIэныгъэхэмкIэ и министр Бозий Аскэр.

ЗэIущIэм щытепсэлъыхьащ кIэ­рыху­бжьэрыху быдэхэм ехьэлIа къалэнхэр гъэзэщIэным бжыгъэхэр зи тегъэщIапIэ Iэмалхэр сэбэпынагъ нэхъыбэ къахьу къыщыгъэсэбэпа зэрыхъуну щIыкIэхэм. Республикэм и Уна­фэщIым гулъытэ хэха хуищIащ кIэрыхубжьэрыху быдэхэр щызэхуа­хьэс щIыпIэхэмрэ ахэр зэрыдаш щIыкIэмрэ зэракIэлъыплъ Iэмалы­щIэхэр хэпщэн зэрыхуейм.
«Мыхьэнэ нэхъ мащIэ иIэкъым республикэм щыпсэухэм щытыкIэр зы­хуэдэр ягурыгъэIуэным, хъыбар егъэщIэным, абыхэм быдэу япыщIауэ щытыным теухуа лэжьыгъэми, - жиIащ КIуэкIуэ Казбек. - Къыхэзгъэ­щынщи,  нобэ республикэм щыIэщ кIэрыхубжьэрыху быдэхэр щызэхуа­хьэс щIыпIэ минитхум щIигъу, уней лъапсэхэр зиIэхэмрэ IуэхущIапIэхэмрэ ейхэр хэмыту. Ар мащIэкъым икIи зыхуэфащэ IэнатIэхэм я лэжьыгъэр зэблэмыууэ къызэгъэ­пэщын хуейщ».
Республикэм и Iэтащхьэм министрым пщэрылъ щищIащ, а Iуэхур зэхьэлIа адрей министерствэхэм, IуэхущIапIэхэмрэ муниципальнэ администрацэхэмрэ щIыгъуу,  кIэрыху­бжьэрыхухэм епха щытыкIэм унафэ ­тещIыхьыным бжыгъэхэр зи лъабжьэ Iэмалхэр хузэщIэгъэуIуэным теухуа чэнджэщхэр ягъэхьэзырыну.