|
ПОСЛЕДНЕЕСАЙТЫ ПОРТАЛА СМИ КБР | ||
ПэхуэщIэхэр мэлажьэ 2026 гъэм Бахъсэн щIыналъэм и курыт еджапIэрэ сабий саду 7 къызыхуэтыншэу зэрагъэпэщыжынущ. Лэжьыгъэхэр ирагъэкIуэкIынущ «Егъэджэныгъэм зегъэужьын» къэрал программэм ипкъ иткIэ.Абыхэм хиубыдэнущ Жанхъуэтэкъуэ къуажэм и сабий садыр, ХьэтIохъущыкъуей жылэм и курыт еджапIэу тIу, Бахъсэненкэм и школ №1-р, Ислъэмейм и курыт еджапIэ №1-р, Зеикъуэ къуажэм и курыт еджапIитI. Лэжьыгъэхэр зэфIэкIа нэужь абыхэм щIагъэувэнущ егъэджэныгъэм къыщагъэсэбэп иджырей оборудованэхэмрэ техникэхэмрэ.
Къыхэдгъэщынщи, Бахъсэн районым хыхьэ Куба къуажэм школыщIэ нэгъабэ къыщызэIуахащ, Кыщпэкым и курыт еджапIэр къызыхуэтыншэу зэрагъэпэщыжащ.
Лэжьыгъэхэм зрагъэубгъу
«Унагъуэ» лъэпкъ пэхуэщIэм ипкъ иткIэ Къэбэрдей-Балъкъэрым сабий саду щы щаухуэнущ дызыхыхьа илъэсым. Ахэр къыщызэIуахынущ Бахъсэн къалэмрэ Гундэлэн, Шэрэдж Ищхъэрэ къуажэхэмрэ.
Апхуэдэуи, «Къуажэхэм сыт и лъэныкъуэкIи зегъэужьын» къэрал программэм ипкъ иткIэ Бахъсэненкэ къуажэм сабийуэ 140-рэ зэуэ зыщIэхуэн сабий сад иджыпсту щаухуэ. Ахэр иджырей мардэм къитIасэу щытынущ икIи зыхуей-зыхуэфIхэмкIэ зэпэщ ящIынущ.
Абыхэм нэмыщI, мы гъэм республикэм и сабий саду 6-м зэгъэпэщыжыныгъэ лэжьыгъэхэр щрагъэкIуэкIынущ.
Иджырей еджапIэхэр
2025 гъэм Къэбэрдей-Балъкъэрым и егъэджэныгъэ IэнатIэр егъэфIэкIуэным хуэунэтIауэ пэхуэщIэшхуэхэр щагъэзэщIащ ди республикэм. ЖыпIэнурамэ, «ЩIалэгъуалэмрэ сабийхэмрэ» лъэпкъ пэхуэщIэм ипкъ иткIэ щIыналъэм и курыт еджапIэу 15 къызыхуэтыншэу зэрагъэпэщыжащ нэгъабэ.
Лэжьыгъэ нэхъ инхэр щекIуэкIар Налшык къалэрщ. Мыбы, зэрагъэпэщыжа нэужь, школи 6 къыщызэIуахыжащ, псоми зэхэту еджакIуэ тIысыпIэу 4900-рэ яIэу.
Абыхэм нэмыщI, зыхуей хуагъэзащ Шэрэдж районым и школищ, Прохладнэ щIыналъэмрэ Прохладнэ къалэмрэ я тIурытI, Бахъсэн, Тэрч къалэхэм я зырыз.
Апхуэдэ лэжьыгъэ екIуэкIахэм я фIыгъэкIэ республикэм и сабий 10 500-м щIигъум Iэмал ягъуэтащ я шынагъуэншагъэмрэ тыншыпIэмрэ къыщызэгъэпэща, иджырей мардэм хуэкIуэ школ зэпэщхэм щеджэну.
Школ зэпэщ яIэ хъуащ
«ЩIалэгъуалэмрэ сабийхэмрэ» лъэпкъ пэхуэщIэмрэ къэрал программэмрэ япкъ иткIэ Бахъсэн къалэм Цагъуэ Нурий и цIэр зезыхьэ и курыт еджапIэ №9-р къызыхуэтыншэу зэрагъэпэщыжащ. Лэжьыгъэхэр ирагъэжьат нэгъабэ и мэлыжьыхьым икIи а илъэсым и дыгъэгъазэм и кIэхэм зэфIагъэкIащ.
Школыр щаухуауэ щытар 1980 гъэрщ икIи абы лъандэрэ иджы хуэдэу ар зэи зыхуей хуагъэзакъым. Лэжьыгъэхэм хыхьэу унащхьэр, бжэ-щхьэгъубжэхэр, инженер коммуникацэхэр зэрахъуэкIащ. Пэш блынхэр къагъэкъэбзащ, лъэгухэм плиткэхэмрэ ламинатхэмрэ иралъхьащ.
ЕджапIэр зыхуей-зыхуэфIхэмкIэ нэсу къызэрагъэпэщащ, псом хуэмыдэу, абы и шхапIэр. Мыбы щагъэуващ хьэкущIэхэр, щIыIалъэхэр, лыхьэжхэр, унэлъащIэ къекIухэр икIи сабийуэ 100 зэуэ абы щахуэгъэшхэнущ.
Иджы, къэрал программэм и фIыгъэкIэ, еджакIуэхэрэ егъэджакIуэу 600-м щIигъум сыт и лъэныкъуэкIи зэпэща школ яIэ хъуащ.
Узыншагъэр нэхъапэщ
«ГъащIэ кIыхь икIи жыджэр» лъэпкъ пэхуэщIэм ипкъ иткIэ сабийхэм папщIэ Шэджэм къалэм иджырей мардэм къитIасэ поликлиникэ щаухуэнущ мы гъэм.
Медицинэ IуэхущIапIэр къатитIу зэтетынущ икIи псори зэхэту метр зэбгъузэнатIэ I400-рэ иубыдынущ. Ар хэтынущ Шэджэм къалэм и сымаджэщ «къалэ цIыкIум». Поликлиникэм щIагъэувэнущ сабийхэм я узыншагъэр къызэрапщытэ иджырей диагностикэ, медицинэ обрудованэхэмрэ техникэхэмрэ.
Тырныауз къалэм и поликлиникэми зэгъэпэщыжыныгъэ лэжьыгъэхэр щрагъэкIуэкI «ГъащIэ кIыхь икIи жыджэр» лъэпкъ пэхуэщIэм ипкъ иткIэ.
Къалэдэсу мин 21-м щIигъум медицинэ Iуэхутхьэбзэхэр щыхуащIэ мы ухуэныгъэм илъэс 42-рэ хъуауэ мыпхуэдэ лэжьыгъэхэр япэу щызэхаублауэ аращ, ари къэрал бюджетым къыхэкIа мылъкукIэ.
НобэкIэ поликлиникэм и бжэ-щхьэгъубжэхэр зэрахъуэкIащ, пэшхэр нэхъ ин ящIащ, иджыпсту ахэр къращIыкI, унэ IуплъапIэри зыхуей хуагъазэ. Лэжьыгъэхэр зэрызэфIэкIыу иджырей медицинэ техникэхэмрэ обрудованэхэмрэ абыи щIагъэувэнущ.
КъищынэмыщIауэ, Тырныауз къалэм и сымаджэщым корпусыщIэ мы гъэм къыгуащIыхьынущ. Нэгъабэ цIыху 3000-м нэблагъэм медицинэ Iуэхутхьэбзэ зэхуэмыдэхэр щыхуащIащ абы.
Поделиться:
Читать также:
13.02.2026 - 16:35 →
ЩIэблэм нэхъапэ щыIэкъым
13.02.2026 - 12:55 →
ГъащIэ щыIамэ арат
12.02.2026 - 18:39 →
Гъуэгу лэжьыгъэхэр
12.02.2026 - 12:26 →
Радиом и Iэмалхэр
12.02.2026 - 11:11 →
ЗэгурыIуэныгъэр япэ ирагъэщу
| ||
