Нэхъ лъэщхэр наIуэ мэхъу

20 января, 2026 - 08:18
Къэбэрдей-Балъкъэрым боксымкIэ пашэныгъэр къыщыхьыным хуэунэтIа зэхьэзэхуэ Бахъсэн къалэм ЩэнхабзэмкIэ и уардэунэм иджыблагъэ щекIуэкIащ. Абы щызэпеуащ республикэм и щIыналъэхэм я спортсмену 120-рэ, я ныбжькIэ илъэс 15-16 хъухэу. Ахэр щIэбэнащ медаль комплекту 13-м. 
Зэхьэзэхуэр къызэрагъэпэщащ КъБР-м СпортымкIэ и министерствэм, КъБР-м БоксымкIэ и федерацэм, республикэм боксымкIэ и спорт еджапIэм, Бахъсэн къалэ администрацэр щIэгъэкъуэн къахуэхъуу. 
ГъэщIэгъуэну екIуэкIа зэпэщIэтыныгъэхэм къыщыхэжаныкIахэм кубокхэр, медалхэр, щIыхь тхылъхэр иратащ. Абы нэмыщI, япэ увыпIэр къэзыхьахэм Iэмал ягъуэтащ Къэбэрдей-Балъкъэрым и щIыхьыр яIэту Кавказ Ищхъэрэм пашэныгъэр къыщыхьыным хуэунэтIауэ мы гъэм зэхэтыну зэпеуэм я зэфIэкIхэр щагъэлъэгъуэну. 
 
Армрестлинг
ПлIым медалхэр къахь
Къэбэрдей-Балъкъэрым и лIыкIуэхэм медалиплI къыщахьащ Кавказ Ищхъэрэм армрестлингымкIэ и чемпионату Владикавказ къалэм иджыблагъэ щекIуэкIам. Абы хэтащ КИФЩI-м и спортсмену I20-м щIигъу, я ныбжькIэ илъэс I6-м щIигъуахэу. 
Ди республикэм и гъэсэну чемпионатым цIыхуих щыIащ икIи абыхэм ящыщу Беслъэней Аслъэнрэ Бейтыгъуэн Iэминрэ етIуанэ увыпIэхэр къахьащ, Шыхъуэ Ислъамрэ Къэрэгъул Хьэутийрэ ещанэ хъуахэщ.
Зэхьэзэхуэм къыщыхэжаныкIахэр, КъБР-м армрестлингымкIэ и федерацэм и унафэщI ТхьэмлIокъуэ Ислъам ягъусэу, хэтынущ УФ-м и чемпионату мы гъэм мэлыжьыхьым Орел къалэм щызэхашэну зэпеуэм. 
КЪУЭЖЕЙ Алим.
  • 33 просмотра
Поделиться: