ЦIыхухэр щагъэгъуазэ

Аруан районым и къалащхьэ Нарткъалэ          дэт курыт школ №4-м узыфэ зэрыцIалэхэм зэрыпэщIэт вакцинэр зыхебгъэлъхьэным, и чэзум уи узыншагъэр къебгъэпщытэным мы­хьэнэшхуэ зэриIэм теухуа зэIущIэ щекIуэ-кIащ.

ЕджапIэм и пщIантIэм щагъэуват медици­-нэ мобильнэ комплексхэр. Къалэдэсхэм Iэмал яIащ абдежым я узыншагъэр къыщрагъэпщы­тэну, ЩIыналъэхэм зэдай, узыфэ зэмылIэу­жьыгъуэхэр зыпкърытхэм щеIэзэ сымаджэ-щым и IэщIагъэлIхэм я чэнджэщхэм щIэдэIуну. АдэкIэ КъБР-м Узыншагъэр хъумэнымкIэ и министерствэм и лIыкIуэхэр яIущIащ район администрацэм и лэжьакIуэхэмрэ IэнатIэ зэхуэмы­-дэ­хэм я лIыкIуэхэмрэ.
КъБР-м узыншагъэр хъумэнымкIэ и министр Къалэбатэ Рустам тепсэлъыхьащ и чэзум къахута узым куэдым узэрыщихъумэм, лышх узы­фэхэр хэмытIасэу къащIэнымкIэ ирагъэкIуэкI Iуэхугъуэхэм. Апхуэдэу абы и гугъу ищIащ узы-фэ зэрыцIалэхэм сымаджэхэр щытыкIэ хьэлъэ­хэм зэрырагъэувэм, абыхэм зэрапэщIэт мастэр зыхрагъалъхьэмэ, я узыншагъэр куэдкIэ нэхъ ­хъума зэрыхъунум. 
ЗэIущIэм кърихьэлIахэр ирагъэплъащ узы-    фэ зэрыцIалэм зэрыпэщIэт мастэхэм я мы­хьэнэр нэсу щызэпкърыха, ар зыхезыгъэлъ- хьэн зымыдэхэр зыIууа гугъуехьхэр къыщы­гъэлъэ­гъуа «Вакцинация: жизнь или смерть» документальнэ фильмым. Абы гурыIуэгъуэ дыдэу жылагъуэм я деж нехьэс фэгъазэ, щIы­фэкъикI, полиомиелит, нэгъуэщI узыфэ зэ­рыцIалэ шынагъуэхэр мыятэнымкIэ абыхэм зэрапэщIэт мастэр шэсыпIэ нэхъыщхьэу зэ­рыщытыр, вакцинэм теухуауэ кърахьэкI хъыбарыпцIхэр зэрылъабжьэншэр. 
ЗэIущIэм кърихьэлIахэм я упщIэхэм жэуап иратащ КъБР-м Узыншагъэр хъумэнымкIэ и ­министерствэм и иммунолог-аллерголог нэхъыщхьэ Щоджэн Мадинэ, КИФЩI-м штатым хэмыт и инфекционист нэхъыщхьэ Иуан Маринэ, республикэм Гигиенэмрэ эпидемиоло­гиемкIэ и центрым и къудамэм и унафэщI Пет­ровэ Мединэ сымэ.
КъБР-м и Iэтащхьэ КIуэкIуэ Казбек и унафэкIэ ап­хуэдэ зэIущIэхэр республикэм и район псоми щрагъэкIуэкIынущ, узыншагъэмкIэ щхьэпагъ зыпылъ Iуэхухэр цIыху нэхъыбэм я деж нахьэ-сын папщIэ.
ЩхьэщэмыщI  Изэ.