Ипотекэр куэдым къагъэсэбэп

2025 гъэм и дыгъэгъазэм къриубыдэу Урысей Федерацэм и щIыналъэхэм ящыщу ипотекэкIэ фэтэр нэхъыбэ къыщызыщэхуахэм Къэбэрдей-Балъкъэрыр яхэтщ.

«Авито Недвижимость» сервисым иджыблагъэ къызэритамкIэ, ипотекэр къагъэсэбэпу республикэм унэщIэ щаухуэхэм фэтэрыщIэхэр къыщызыщэхуахэм я бжыгъэр процент 92-м щIигъуащ. Тыва (процент 97-рэ) иужькIэ КъБР-р етIуанэщ. АдэкIэ къыкIэлъокIуэ Сахалин областымрэ Адыгеймрэ (процент 88-рэ яIэу). Пензэ областыр (процент 87-рэ), Красноярск крайр (поцент 86-рэ), Оренбург, Саратов областхэмрэ Хакасиемрэ (процент 85-рэ).

Экспертхэм зэрыжаIэмкIэ, цIыхухэм ипотекэкIэ фэтэрхэр къащэхуным тезыгъэгушхуэри апхуэдэхэм я бжыгъэм къыщIыхэхъуэри къэрал дэIэпыкъуныгъэ зыхэт «Унагъуэ ипотекэ», «КъуэкIыпIэ Жыжьэ», «Арктикэ» программэхэр зэрыщыIэрщ.

Аналитикхэм къызэратымкIэ, Мэзкуу областым ипотекэкIэ фэтэрыщIэхэр къыщызыщэхухэм я бжыгъэр процент 73-рэ хъууэ аращ, Мэзкуу къалэм – процент 61-рэ. Ленинград областым ар процент 60 щохъу, Санкт-Петербург къалэм процент 54-рэ.

Апхуэдэуи, ухуакIуэхэм къагъэсэбэп унэ уасэр Iыхьэ-Iыхьэу хэплъэхьэж зэрыхъуну Iэмалыр.

Къэбгъэлъагъуэмэ, 2025 гъэм и дыгъэгъазэм ипотекэкIэ фэтэрыщIэхэр ди къэралым къыщызыщэхуахэм процент 77-кIэ хэхъуащ, ар пунктищкIэ нэхъыбэщ щэкIуэгъуэм щыIа бжыгъэхэм нэхърэ икIи пункт 26-кIэ щхьэщокI илъэсым и япэ мазэхэм щыIахэм елъытауэ.

Мыдрейуэ, Къэбэрдей-Балъкъэрым и ухуэныгъэ IэнатIэм зэфIэкIыфIхэр къигъэлъэгъуащ нэгъабэ икIи республикэм псэупIэу щаухуар псори зэхэту метр зэбгъузэнатIэ мин 611-м щIигъуащ.