МурадыфIхэм хуэгъэпса зэхуэсыпIэщIэ

Урысейм щыяпэу ди республикэм щы­зэхэтащ социальнэ архитектурэм, жылагъуэм дежкIэ мыхьэнэ хэха зиIэ Iуэхухэр щIэм тету зэтеухуэным, мурадышхуэхэм хуэгъэпса щIыналъэ сессиер. Абы кърихьэлIахэм фIэхъус псалъэкIэ захуигъэзащ КъБР-м и Iэтащхьэ КIуэкIуэ Казбек икIи а жэрдэмыр къадэзыIыгъа псоми фIыщIэ яхуищIащ.

Зэхыхьэр екIуэкIащ Урысей Федерацэм и Президентым и полномочнэ лIыкIуэу КИФЩI-м щыIэм и аппаратымрэ «Мэшыкъуэ» щIэныгъэ центрымрэ Iуэхур къыдаIыгъыу. 
Сессиер къызэIуахащ КIуэкIуэ Казбек, УФ-м и Президентым деж щыIэ, Къэралым щекIуэкI социальнэ Iуэхухэр зыхуэдэм кIэлъыплъынымрэ ахэр къэпщытэнымкIэ управленэм и унафэщIым и къуэдзэ Се­менов Алексей, УФ-м и Президентым и ­полномочнэ лIыкIуэу КИФЩI-м щыIэм и аппаратым и департаментым и унафэщI Карпов Андрей сымэ. Зэхуэсым хэтхэм ­ви­деозэпыщIэныгъэ IэмалкIэ за­къы­хуи­гъэзащ «ЩIэныгъэ» урысей зэгухьэныгъэм и генеральнэ директорым и къуэдзэ - «Мэшыкъуэ» щIэныгъэ центрым и уна­фэщI Сериков Антон.
Зэхуэсыр къызэрагъэпэщащ КъБР-м ЩIалэгъуалэм я IуэхухэмкIэ и министерст­вэмрэ «Эльбрус» корпоративнэ университетымрэ.
УФ-м и Президентым деж щыIэ, Къэ­ралым щекIуэкI социальнэ Iуэхухэр зы­хуэдэм кIэлъыплъынымрэ ахэр къэп­щытэнымкIэ управленэм и унафэщI Харичев Александр къахуигъэхьа фIэхъус тхыгъэм къызэрыщыхигъэщамкIэ, му­рады­шхуэ­хэм хуэгъэпса щIыналъэ сес­сием и лэжьыгъэр зэрырагъажьэр и щы­хьэтщ Урысейм хыхьэ щIыпIэхэм со­циальнэ Iуэхухэм бгъэды­хьэкIэщIэ яIэ зэрыхъум.
ЩIыналъэхэм зегъэужьыным хуэщхьэпэ социальнэ Iуэхухэр зыхуэдэр къапщы­тэ­кIэрэ, IэмалыщIэхэр, гъуазэщIэхэр яубзыхунущ.
«Мэшыкъуэ» щIэныгъэ центрым къыщы­зэIуахынущ жылагъуэм дежкIэ мыхьэ­нэшхуэ зиIэ Iуэхухэм къэпщытакIуэхэм я нэIэ щытрагъэтыну щIыпIэ икIи КъБР-м щагъэзэщIэну проект хэхахэр къыщы­халъхьэну егъэджэныгъэ модуль мыгувэу щызэхэтынущ.
«ЩIалэгъуалэр а Iуэхухэм кIэлъыплъ, жаIэхэм едаIуэ къудейм къыщымынэу, мыбдежым ахэр икIи я IуэхущIэгъуу зэ­ры­щытми мыхьэнэшхуэ иIэщ, - жиIащ КIуэкIуэ Казбек. - Гулъытэ хэха хуэтщIынущ социальнэ институтхэм зегъэужьыным, лъапIэныгъэхэр убзыхуным, дыкъэзыухъуреихь дунейм и щытыкIэр егъэфIэкIуэ­ным.
Шэч къытесхьэркъым, социальнэ Iуэху­хэр дэгъэкIыным хуэгъэзауэ щыIэ иджы­рей Iэмалхэмрэ лэжьэкIэщIэхэмрэ къэдгъэсэбэпу, республикэм исхэм я псэукIэр зэредгъэфIэкIуэфынум. IуэхуфI куэд ­кърикIуэну дыпэплъэу щIыдодзэ мы лэ­жьыгъэм икIи псом хуэмыдэу абыкIэ ди щIалэгъуалэм сащогугъ».