Лъэпкъ щэнхабзэм зезыгъэужьа Гъуэт Хъусин къызэралъхурэ илъэс 85-рэ ирокъу

26 февраля, 2026 - 11:41
УэрэджыIакIуэ цIэрыIуэ Гъуэт Хъусин псэужамэ, и ныбжьыр илъэс 85-рэ ирикъунут. Илъэситху хъуащ ар къызэрытхэмытыжрэ, ауэ Къэрэшей-Шэрджэс, Адыгей, Къэбэрдей-Балъкъэр республикэхэм щыпсэу лъэпкъ интеллигенцэм, адыгэм щыщу абы и гуащIэм щыгъуазэ дэтхэнэми и гум ихуркъым щэнхабзэмрэ гъуазджэмрэ хэлъхьэныгъэшхуэ хуэзыщIа лIы бэлыхьыр. 
Ар 1941 гъэм мазаем и 27-м Жьакуэ къуажэм щыпсэу Азэмэт-Джэрийрэ Хъаджэтрэ я унагъуэм къыщалъхуат. И сабиигъуэр зэман хьэлъэм техуами, и адэр Хэку зауэшхуэм хэкIуадэу зеиншэу къэхъуами, а пIалъэр Хъусин и гум IэфIу къинэжат. Псом хуэмыдэу щIымахуэ пщыхьэщхьэ кIыхьхэм и анэм жиIэу щыта уэрэдыжьхэр. Абыхэм щIэдэIуурэ щIалэ цIыкIур гъуазджэм и дуней телъыджэм хыхьа хъуат, ар фIыуэ илъэгъуат. 
1959 гъэм курыт еджапIэр къиуха иужь, Хъусин и дэфтэрхэр ухуакIуэ IэщIагъэм щыхурагъаджэу Черкесск къалэм дэт училищэм щIилъхьат, арщхьэкIэ абы и насып зыхэлъыр нэгъуэщIт. А еджапIэм и унафэщI Сымхьэ СулътIан и жэрдэмкIэ, Хъусин Саратов еджакIуэ кIуауэ щытащ икIи абы уэрэд жыIэнымкIэ IэщIагъэ щызэригъэгъуэтащ. 1962-1966 гъэхэм Гъуэтым Хы хуэм флотым хэту дзэм къулыкъу щищIащ. 
Консерваториер къиуха иужь, Хъусин и Хэку къигъэзэжри, Хьэбэз къуажэм дэт макъамэ школым щылэжьащ. ИужькIэ Волгоград ирагъэблагъэри, абы илъэсиблкIэ егъэджакIуэу щыIащ, щIыналъэм и симфоние оркестрым щIыгъуу куэдрэ утыку къихьащ. 
1981 гъэм Хъусин и унагъуэм Къэрэшей-Шэрджэс Республикэм къигъэзэжри, макъамэ училищэм щылэжьэн щIидзащ. И педагогикэ лэжьыгъэм къыдэкIуэу, ар куэдрэ утыку зэхуэмыдэхэм ирагъэблэгъащ, цIыхухэм гукъинэж ящыхъуа лъэпкъ, цIыхубэ уэрэдхэр игъэзэщIащ. Апхуэдэхэщ, псалъэм и хьэтыркIэ, «Си нанэ», «Iэлъын цIыкIу», «ИстамбылакIуэ», «Гуащэгъагъ и гъыбзэ уэрэд», «Голуби», «Си къэшэн», «Гимн дикой дивизии» жыхуиIэхэр, нэгъуэщIхэри. Хъусин концертхэр щитащ Испанием, Италием, Тыркум, Польшэм, нэгъуэщI щIыпIэхэми. 
1991 гъэм Гъуэтым дзыхь къыхуащIащ республикэм щэнхабзэмкIэ и министрым и къуэдзэм и IэнатIэр. Абы пэрытыху ар хущIэкъуащ хэгъэгум и гъуазджэр сыт и лъэныкъуэкIи иригъэфIэкIуэну, къиIэтыну. ИлъэситI дэкIри, ар ягъэуващ Къэрэшей-Шэрджэсым щэнхабзэмрэ гъуазджэхэмкIэ и къэрал колледж Даур Аслъэн и цIэр зезыхьэм и унафэщIу. 
Гъуэт Хъусин и гъащIэмрэ и гуащIэмрэ гулъытэншэ хъуакъым. Ар Урысей Федерацэмрэ Къэбэрдей-Балъкъэрымрэ щIыхь зиIэ я артистт, Урысей Федерацэмрэ Къэрэшей-Шэрджэсымрэ я цIыхубэ артистт, Къэрэшей-Шэрджэс къэрал педагогикэ университетым щIыхь зиIэ и докторт. 
КъызыхэкIа лъэпкъым зи гъащIэр щхьэузыхь хуэзыщIа уэрэджыIакIуэ цIэрыIуэм насыпыфIэу зыкъилъытэжырт, и псэр дэзыхьэх Iуэхум пэрытати. Абы къытхуищIамрэ къытхуигъэнамрэ зыщыдмыгъэгъупщэмэ, ар тхъумэфмэ, ди насыпщ.
ИСТЭПАН Залинэ.
  • 13 просмотров
Поделиться: