Къалэм уиутIыпщыркъым

«ГъащIэм хуэщIа инфраструктурэ» лъэпкъ пэхуэщIэм ипкъ иткIэ 2026 гъэм зэIузэпэщ ящIынущ Шэджэм щIыналъэм цIыхухэр куэду щызэхуэс, зыщагъэпсэху и щIыпIэхэр.

ЖыпIэнурамэ, Шэджэм къалэм лэжьыгъэшхуэ щызэхаублэнущ мы гъэм. Къалэдэсхэм я псэукIэр егъэфIэкIуэным хуэгъэпсауэ ди къэралым щрагъэкIуэкI урысейпсо зэхьэзэхуэм щытекIуа, «Къалэм уиутIыпщыркъым» проектыр ягъэзэщIэн щIадзэнущ. Абы щхьэкIэ, гранту кърата сом мелуан 91-р трагъэкIуэдэнущ щIыпIэхэм ящыщу япэ игъэщыпхъэу къалэдэсхэм къагъэлъэгъуа хьэблэщIэр зэIузэпэщ щIыным. Ар зыхуэзэр къалэ дэжыпIэрщ икIи гектари 2,5-рэ абы иубыдынущ. 
«Къалэм уиутIыпщыркъым» пэхуэщIэм и курыхыу щытынур абы и бульварырщ, псы IущIахэм деж зыгъэпсэхупIэхэр иIэу, спорт утыку зэхуэмыдэхэр, сабий джэгупIэ зэмылIэужьыгъуэхэр хэту. А псом къадэкIуэу, а щIыпIэм деж жыг зы миным щIигъу щагъэтIысынущ, нэгъуэщI къэкIыгъэхэри щыхасэнущ, нэр зыгъэгуфIэ теплъэ дахи иратынущ. Ар зэрызэфIэкIыу, къалэдэсхэм нэгузегъэужьыпIэрэ зэхуэсыпIэ зэпэщрэ яIэнущ, жаIащ IэщIагъэлIхэм.
Апхуэдэуи, лъэпкъ пэхуэщIэм ипкъ иткIэ, Шэджэм щIыналъэм и Шэджэм къалэм и ипщэ лъэныкъуэм, Лашынкъей, Звезднэ жылэхэм цIыхухэр куэду щызэхуэс я щIыпIэхэр зэIузэпэщ ящIынущ мы гъэм.