Къазмыхь Сэлим и дыщэ медалыр

 Алыдж-урым

Урысей Федерацэм алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэ Ямало-Ненецкэ автономнэ округым и Тарко-Сале къалэм иджыблагъэ щекIуэкIащ. Абы щызэпеуащ ди къэралым и щIыналъэхэм ящыщу 50-м щIигъум я спортсмен 500-м нэблагъэ.

  Къэбэрдей-Балъкъэрым и щIыхьыр иIэту зэпеуэм хэтащ Къазмыхь Сэлим икIи, ди гуапэ зэрыхъущи, килограмм 63-рэ зи хьэлъагъхэм я деж дыщэ медаль къыщихьащ. Ди щIалэм и тренерыр Нэгъуей Азэмэтщ.

Мыдрейуэ, махуищкIэ екIуэкIа зэхьэзэхуэм хэта бэнакIуэхэр, медалхэм къадэкIуэу, хущIэкъуащ УФ-м и командэ къыхэхам хэхуэным, адэкIэ, дунейпсо, европей зэпеуэхэм зыкъыщагъэлъэгъуэным.

Республикэм щыяпэу

Кавказ Ищхъэрэм дартсымкIэ и чемпионатрэ пашэныгъэр къыщыхьынымрэ хуэгъэпса зэхьэзэхуэ Псыхуабэ къалэм щекIуэкIащ. Абы щызэпеуащ КИФЩI-м и спортсмену, щIалэхэри хъыджэбзэхэри зэхэту, 200-м нэблагъэ.

Къэбэрдей-Балъкъэрым и лIыкIуэу зэхьэзэхуэм цIыху 13 хэтащ икIи ди республикэм и спорт тхыдэм щыяпэу гупхэм я зэпеуэм ди щIыналъэм дыщэ медаль къыхуахьащ Мэкъуауэ Силинэ, Шурдым Амир, Балъкъэр Дамир сымэ.

Апхуэдэуи, щхьэзакъуэ зэпеуэхэм къыщыхэжаныкIащ Балъкъэр Элинэ. Абы къихьащ дыжьын, домбеякъ медалхэр. ЕтIуанэ хъуахэщ Сэбан Алихъанрэ Щомахуэ Аслъэнбэчрэ. 

Зэхьэзэхуэм къыщыхэжаныкIахэм Iэмал ягъуэтащ мы гъэм екIуэкIыну урсысейпсо чемпионатымрэ зэпеуэмрэ я зэфIэкIхэр щагъэлъэгъуэну.

Ди спортсменхэм ядэлажьэр Гъубж БетIал, Шыхъуэстэн Руслан, ЛампIэжь Алим сымэщ.

     ЩЭУЕЙ Башир.