ШколакIуэхэр дихьэхат

КъБР-м и Лъэпкъ музейм щекIуэкIащ «Къэбэрдей-Балъкъэ­рым щыпсэу лъэпкъхэм я зэкъуэтыныгъэр» семинар-зэIущIэ. 

Iуэхур къызэригъэпэщащ КъБР-м и прокуратурэм и Ветеранхэм я советым и тхьэмадэ Мэшыкъуэ Хьэчим, республикэм и прокурорым балигъ мыхъуахэмрэ щIалэгъуалэмрэ ехьэлIа хабзэр зэрагъэзащIэм кIэлъыплъынымкIэ и дэIэпыкъуэгъу нэхъыжь СэвкIуий Джемэ щIыгъуу. 
Семинарым и лэжьыгъэм хэтащ «Хужьокъуэ В.Ж. и цIэр зезыхьэ гимназие №29» курыт еджапIэм и прокурор классхэм щIэсхэр. 
Къызэхуэсахэм я пащхьэм къыщыпсэлъащ Мэшыкъуэ Хьэчимрэ Лъэпкъ музейм и унафэщI нэхъыщхьэм м и къалэнхэр зыгъэзащIэ Накуэ Феликсрэ. 
Мэшыкъуэ Хьэчим къыхигъэщащ мамырыгъэрэ зэгуры­Iуэ­ныгъэрэ я кум дэлъу лъэпкъи 100-м щIигъум ящыщхэр республикэм зэрыщыпсэур, дэтхэнэми езым и щэн, хабзэ, дин зэриIэжыр. Хабзэхэр зыхъумэ нэхъыжьхэм я къалэнщ щIалэгъуалэр а лъапIэныгъэхэм пщIэ хуащIу, лъэпкъ зэпэщIэувэныгъэхэр къэгъэхъу­ным пэщIэту гъэсэныр. КъытеувыIащ лъэпкъ псоми ящыщу нобэ дзэ Iуэху хэхам къалэныр щезыхьэкIхэм я лIыгъэм. Ветераным ныбжьыщIэхэм яжриIащ ерыщу еджэну, къыхахыну IэщIагъэм ехъулIэныгъэхэр щаIэну зэригуапэр. 
Шэрджэсхэм я Iэщэхэм фIыуэ хэзыщIыкI Накуэ Феликс теп­сэлъыхьащ сэшхуэхэм, фащэхэмрэ абыхэм я тхыдэмрэ. Зэрызыкъыхуагъэза упщIэхэм жэуап зэпкърыха яритащ. Лекцэ Iыхьэм иужькIэ шэрджэс сэшхуэр зэрыбгъэIурыщIэнур яригъэлъэгъуащ. 
Семинарым и къызэгъэпэщакIуэхэм къыхагъэщащ нэхъыжьхэм я хабзэхэмрэ щапхъэмрэ щIалэгъуалэм иратыным ныбжьыщIэхэм я граждан Iуэху еплъыкIэр зэфIэувэнымкIэ мыхьэнэшхуэ зэриIэр. ЗэIущIэр еджакIуэхэм гъэщIэгъуэн ящыхъуащ.