Пасэу IэщIагъэр къыхах

Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым курыт еджа­пIэ­хэм щрагъэдж предметхэмкIэ олимпиадэ­хэм щытекIуахэмрэ къыщыхэжаныкIахэмрэ ща­гъэлъэпIащ. ПравэмкIэ, экономикэмрэ финансхэмкIэ институтым щызэхуэсащ республикэм и еджакIуэ нэхъыфIхэр, «Экономикэ», «Пра­во» (обществознание Iыхьэ), «Финанс щIэ­ныгъэ», «Экономикэ шынагъуэншагъэ», «Ту­ризмэмкIэ щIэнгъуазэ» дерсхэмкIэ щIэныгъэ куу къэзыгъэлъэгъуахэр.

Апхуэдэ акъыл зэпеуэхэр егъэкIуэкIыным и мурад нэхъыщхьэр еджакIуэхэм ябгъэдэлъ аналитикэ, щIэныгъэ, творческэ зэфIэкIхэр къаху­тэнырщ, зегъэужьынырщ, еджапIэ нэхъыщ­хьэхэм зи щIэныгъэм щыхэзыгъэхъуэну зи жэрдэм щIалэгъуалэ зэчиифIэхэр къызэщIэгъэу­Iуэнырщ.
Къызэхуэсахэм псалъэ гуапэкIэ захуигъэзащ КъБКъУ-м и проректор ГъукIэпщокъуэ Мурат. Абы къыхигъэщхьэхукIащ университетыр ди республикэм и щIэныгъэ, егъэджэныгъэ центр нэхъ ин дыдэу зэрыщытыр.
«Республикэм фимыкIыу дуней псор щызэвгъэцIыху хъуну щIыпIэщ КъБКъУ-р. Къэрал, континент зэмылIэужьыгъуэхэм къикIа студент куэ­дым я фIыгъэкIэ, ди университетыр дунейпсо щэнхабзэ зэмылIэужьыгъуагъэм я курых хъуащ, щэнхабзэ зэпыщIэныгъэхэр ди еджапIэ пэшхэм щагъэбыдэ», – къыхигъэщащ Мурат.
Проректорым игъэбелджылащ университет олимпиадэхэм щIэныгъэм и кууагъыр, къэухьым и зыужьыкIэр, гупсысэкIэм и псынщIагъыр къы­зэрыщалъытэр, абыхэм еджапIэ нэхъыщхьэм ущеджэн папщIэ мыхьэнэшхуэ зэраIэр. 
«Фи щIэныгъэр, Iэзагъыр, жанагъращ зэ­лъы­тар къыфхукъуэкIыну Iэмалхэр, ар шэч зы­хэмылъщ. Ахэр фи Iэпэгъумэ, лэжьыгъэми фы-хэзэгъэнущ, екIуу фыпсэунущ, фи унагъуэхэр зы­хуей хуэвгъэзэну Iэмал фиIэнущ», - дыщIигъуащ и псалъэхэм ГъукIэпщокъуэм.
ШколакIуэхэм ехъуэхъуащ КъБКъУ-м МенеджментымкIэ, туризмэмрэ хьэщIагъэ индустриемкIэ и институтым и унафэщI Лыджыдэ Рэ­мэзан, Урысейм и Банкым КъБР-м щиIэ IуэхущIапIэм ЭкономикэмкIэ и къудамэм и унафэщI Чеченов Вячеслав, КъБКъУ-м и факультетхэм я егъэ­джакIуэ пажэхэр. Ахэр ныбжьыщIэхэм ехъуэхъуащ здынэсам къыщымыувыIэну, IэщIагъэ яхуэхъунум быдэу егупсысу къыхахыну. 
Олимпиадэхэм щытекIуахэри къызэхуэсахэм ядэгуэшащ зыщIэтIысхьэну я мурадхэмкIэ.
Шэджэм дэт курыт еджапIэ №1-м и 10-нэ классым щIэс КIыщ Лианэ финанс щIэныгъэмрэ эко­номикэ шынагъуэншагъэмкIэ япэ увыпIэхэр къихьащ. «Обществознаниер сыдэзыхьэх пред­метщ, фIы дыдэу хэсщIыкIыу схужыIэнущ. Лэ­жьыгъэхэр гъэщIэгъуэнт икIи гугъу дыдэтэкъым. Мурад сщIащ КъБКъУ-м сыщIэтIысхьэну, тхы­дэмрэ обществознаниемкIэ егъэджакIуэ сыхъуну», - жиIащ Лианэ.
Налшык къалэ дэт курыт школ №6-м и 11-нэ клас­сым щеджэ Кравченкэ Дарье финанс щIэныгъэмкIэ олимпиадэм етIуанэ увыпIэр къыщихьащ. Ар тепсэлъыхьащ а предметым и мыхьэ­нэм: «Процент гугъукIэ» зэджэр зэрылажьэр е микрозаймхэр щIэшынагъуэр къызыгурыIуэ цIы­ху­хэр мащIэщ. Сыщогугъ дяпэкIэ финанс щIэ­­ныгъэр школхэм нэхъ зыубгъуауэ щрагъэджыну. Иджыпсту сэ предметитхум нэхъ согугъу, китаибзэри хэ­ту, сыщеджэнур къыхэхыным зэкIэ согуп­сыс. А уна­фэм си гъащIэ псор елъытауэ зэ­рыщытынур къызгуроIуэри, сыщымыуэну сы­хуейщ», - къыхигъэщащ пщащэм. 
Нэгъуей Рашид «ТуризмэмкIэ щIэнгъуазэ» (лъа­хэхутэ) олимпиадэм текIуэныгъэ къыщихьащ, обществознаниемрэ урысыбзэмкIэ зэпеуэ­хэми хэтащ.
«Лэжьыгъэхэр гугъут, ауэ эссем и темэр спэ­гъунэгъуу къыщIэкIащ, ар сэбэп къысхуэхъуауэ къыщIэкIынущ япэ увыпIэр къэсхьынымкIэ. ­КъБР-м и тхыдэм сызэрыщыгъуазэр хуабжьу сэ­бэп къысхуэхъуащ. КъБКъУ-м сыщеджэну си мурадщ, унэтIыныгъэр иджыри къыхэсхыпакъым», - къыддэгуэшащ Рашид.
КъБКъУ-м ПравэмкIэ, экономикэмрэ финанс­хэмкIэ и институтым и унафэщI Мэшыкъуэ Еленэ ныбжьыщIэхэм ехъуэхъуащ IэщIагъэр тэмэму къыхахыну, абы зэи хущIемыгъужыну: «Псом япэрауэ, фи гур хэзыгъахъуэ Iуэху къэвгъуэт, итIанэ IэщIагъэр къыхэхыным гугъу фыдехьыжынукъым. Фи гъащIэ гъуэгуанэм фыщыщыуэ, шэч къызытефхьэ къыхэмыкIыу, гушхуауэ фкIуну сынывохъуэхъу».
Фигу къэдгъэкIыжынщи, олимпиадэхэмрэ нэгъуэщI акъыл зэпеуэхэмрэ япэ увыпIэ къы­щы­зыхьахэм Зыуэ щыт къэрал экзаменхэм кърикIуа­хэм балли 5 къыхухалъхьэ, етIуанэ, ещанэ увы­пIэхэр къыщызыхьахэм профильнэ унэтIыныгъэмкIэ балли 3 къаIэрохьэ.