КъБР-м и Парламентым «стIол хъурей» жыпхъэм иту иджыблагъэ щекIуэкIа зэIущIэм депутатхэр щытепсэлъыхьащ Къэбэрдей-Балъкъэрым и ЖКХ-м епха гугъуехьхэм, псыкIэ, хуабэкIэ, уэздыгъэкIэ, газкIэ къызэзыгъэпэщ IуэхущIапIэхэмрэ унэхэр зэIузэпэщу щытыныр зи къалэн компаниехэмрэ я лэжьыгъэм. ЗэIущIэр и жэрдэмт УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэмкIэ комитетым.
КъБР-м и Парламентым и УнафэщIым и къуэдзэ Жанатаев Сэлим, КъБР-м и Iэтащхьэмрэ Правительствэмрэ я лIыкIуэу КъБР-м и Парламентымрэ суд IуэхущIапIэхэм-рэ щыIэ Ды-щэкI Мадинэ, депутатхэр, республикэм Ухуэныгъэмрэ псэупIэ-коммунальнэ IэнатIэмкIэ и министерствэм и лIыкIуэхэр абы хэтащ.
Къызэхуэсахэм Жанатаев Сэлим защыхуигъазэм къыхигъэщащ гугъуехьхэр къэгъэнэIуэнымрэ абыхэм тепсэлъыхьынымрэ мыхьэнэшхуэ зэриIэр. «ПсэупIэ-коммунальнэ IэнатIэм ехьэлIа Iуэхухэм ди республикэм и мызакъуэу, къэрал псор егъэпIейтей. «СтIол хъурейм» къедгъэблэгъащ мы IэнатIэм елэжь IуэхущIапIэ нэхъыщхьэхэр - щIыналъэ министерствэр, унэхэр зезыхьэ компаниехэр, ПсэупIэхэр ухуэнымкIэ щIыналъэ фондыр, КъБР-м Тарифхэмрэ псэу-пIэ кIэлъыплъыныгъэмкIэ и къэрал комитетыр. Iуэхур зы лъэбакъуэкIэ нэхъ мыхъуми дгъэкIуатэмэ, ари ехъулIэныгъэщ», - жиIащ абы.
КъБР-м и Парламентым УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэмкIэ и комитетым и унафэщI Къумал Заурбэч жиIащ «стIол хъурейр» къыщIызэрагъэпэщар зэчэнджэщыну зэрыарар. «Нобэ ЖКХ-р нэхъ гугъу дыдэу зэтеубла, абы щыгъуэми цIыхухэм я дежкIэ мыхьэнэшхуэ зиIэ IэнатIэхэм ящыщщ. Ар тэмэ-му зэрылажьэм елъытащ жылагъуэр зэIузэпэ-щу псэуныр», - къыхигъэщащ Къумалым. Абы жиIащ республикэм гугъуехь мымащIэхэр зэрыщыIэр икIи абыхэм гулъытэ хэха зэрахуэщIыпхъэр.
КъаIэта Iуэхум тепсэлъыхьу, зэIущIэм я Iуэху еплъыкIэхэр щыжаIащ КъБР-м Ухуэныгъэмрэ псэупIэ коммунальнэ IэнатIэмкIэ и министерствэм псэупIэ IэнатIэмкIэ и къудамэм и уна-фэщI Ахъсор Астемыр, экономикэ къэпщытэныгъэмкIэ къудамэм и IэщIагъэлI нэхъыщхьэ Соблыр Аленэ, Налшык къалэм и щIыпIэ администрацэм и унафэщIым и япэ къуэдзэ Тонконог Анатолий, КъБР-м Тарифхэмрэ псэупIэ кIэлъыплъыныгъэмкIэ и къэрал комитетым и унафэщIым и къуэдзэ Чимаев Тахир, «Къэбэрдей-Балъкъэр Республикэм фэтэр куэду зэхэт унэхэр щызэзыгъэпэщыж щIыналъэ оператор» фондым и унафэщI Кулиев Мустафир, «Кавказ Ищхъэрэм и Россети» ПАО-м и «Къэббалъкъэнерго» къудамэм и унафэщIым и къуэдзэ - «Энергосбыт» къудамэм и унафэщI Къэнэмэт МуIэед, «Экологистика» ООО-м и къудамэм и унафэщI Гасиев Анзор, «Газпром межрегионгаз Налшык» IуэхущIапIэм и къудамэм и унафэщI Ерыстау Лянэ, нэгъуэщIхэми.
ЗэIущIэм хэтахэм Iуэхугъуэ куэдым я гугъу ящIащ: республикэм электракъару, газ, хуабэ, псы зэрыкIуэ кIапсэхэмрэ бжьамийхэмрэ ику иту процент 62-кIэ жьы зэрыхъуам, IэнатIэр ирагъэфIэкIуэным текIуэдэну ахъшэр къазэремэщIэкIым, ЖКХ-м и IуэхущIапIэхэм я щIыхуэм зэрыхэхъуэм, цIыхухэм къагъэсэбэп Iуэхутхьэбзэхэр къызэрапщытэ Iэмэпсымэхэр зэрагъэув щIыкIэм, жьы хъуа унэхэм къыщIэгъэIэпхъукIыным пылъ гугъуехьхэм, унагъуэ, ухуэныгъэ кIэрыхубжьэрыхухэр зэрыдашым, нэгъуэщIхэми.
ЗэIущIэм къыщыхагъэщащ цIыхум коммунальнэ Iуэхутхьэбзэхэр къызэпымыуду яIэрыхьэныр и кIэм нэсу къызэрызэмыгъэпэщар. Щхьэхуэу къытеувыIащ Iуэхутхьэбзэхэм я уасэр жылагъуэм тэмэму итми, щIыхуэм я нэхъыбэр газ, уэздыгъэ, псы, нэгъуэщIхэр цIыхухэм ялъэгъэIэсыныр зи къалэн езы IуэхущIапIэхэм зэрахузэтрихьэм. Къызэхуэсахэр тепсэлъыхьащ зыуэ щыт абонент базэ къызэрызэрагъэпэщынум, уасэхэр зэрагъэув щIыкIэм, «Труженик» жыг хадэ зэгухьэныгъэм щыпсэухэм хабзэубзыху IуэхущIапIэм псы IуэхумкIэ зыкъызэрыхуагъэзам, нэгъуэщIхэми.
Гугъуехь къэзышэхэм ящыщу къыхагъэщащ щIыпIэхэм зэрызаужьым, унэщIэхэр куэду зэрыдращIейм къыхэкIыу псы, газ, хуабэ, н.къ. къэзыгъэсэбэпхэм я бжыгъэм псынщIэу къызэрыхэхъуэр. 2025 гъэм коммунальнэ Iуэхутхьэбзэхэм я уасэр процент 77-м къатащ. КъызэрагъэлъэгъуамкIэ, ар процентитIкIэ нэхъ мащIэщ ипэ ита илъэсым нэхърэ.
ЗэIущIэм къыщыхагъэщащ къагъэсэбэп псыр зыхуэдизыр къэзыгъэлъагъуэ Iэмэпсымэхэр зиIэхэр зэрымащIэр. Апхуэдэ Iэмэпсымэ тезымыгъэувахэм 2025 гъэм дыгъэгъазэм и 1-м щегъэжьауэ Iуэхутхьэбзэм щIат уасэм хухагъэхъуащ. КъызэрагъэлъэгъуамкIэ, унагъуэм ику иту псы кубометр 15 - 17 къегъэсэбэп, зы цIыхум сом 565-рэ хуозэ.
ЗэIущIэм щытепсэлъыхьащ ЖКХ-р зэрырагъэфIэкIуэну Iэмалхэми. ЩIыпIэ унафэр зезыхьэ IэнатIэхэр къыхураджащ псэупIэ-коммунальнэ IуэхущIапIэм зегъэужьыным ахъшэр щыхухахкIэ дыщIагъупхъэри къалъытэну. «СтIол хъурейм» зи гугъу щащIа IуэхущIапIэхэм я лэжьыгъэр езыгъэфIэкIуэн чэнджэщхэр щагъэбелджылащ.
