И фильмхэр лъэпкъыбзэхэмкIэ трех

Къэбэрдей-Балъкъэрым щыщ режиссёр, сценарист, продюсер, актёр Толгуров Саид ящыщщ щIыналъэр зэрыгушхуэ, щIэныгъэ зиIэ щIалэгъуалэ жыджэрхэм. Абы трилогие трех ди щIыналъэм и щIыуэпс къулеймрэ абы щыпсэухэмрэ ятеухуауэ. Япэр – «В горах. Она» зыфIищар - балъкъэрыбзэкIэщ зэрытрихар. Ар ягу ирихьауэ жыпIэ хъунущ, абы еплъахэм къазэрыщыхъуам тепщIыхьмэ.  ЕтIуанэр - «В горах. Он» адыгэбзэкIэ триха фильмыр - Ханты-Мансийск щекIуэкIа «Дух огня» XXIV международнэ кинофестивалым щагъэлъэгъуащ. Ещанэ фильмым йолэжь.

КъэпщытакIуэхэр зэплъа фильм 83-м нэхъыфIу къалъыта 6-м язщ Толгуров Саид и лэжьыгъэр. Ди хэкуэгъу режиссёрым «Серебряная роза» саугъэт щхьэхуэри къызэрыхуагъэфэщащ, абы щIэлъ макъамэм и фIагъыр къалъытэу.  Фильмым и макъамэр зейр музыкант, композитор, цIыхубэ уэрэдхэри езым итхыжахэри зыгъэзащIэ Мэршэнкъул Астемырщ.

Кинофестивалым лэжьыгъэ нэхъыфIу къыщалъытахэм ящыщщ Мамыкин Антон и «Космос засыпает» фильмыр. Саугъэт нэхъыщхьэр хуагъэфэщащ Испанием щытраха, Лопес Гарсиа Либетард Эвэ и «Глухая» фильмым.

 Саид зэрыжиIэмкIэ, зэхуэсым IэщIагъэм щехъулIа цIыху куэд къыщицIыхуащ, фильм гъэщIэгъуэнхэми щеплъащ. Гуапэ щыхъуащ я лэжьыгъэм щытхъу къызэрыпэкIуари.

Лэжьыгъэр зытеухуам и гугъу пщIымэ, абы хэт лIыхъужьхэу Альбертрэ Эльдаррэ музыкантщ, IуэрыIуатэм и пшыналъэхэр хъумэнырщ зи ужь итыр. ЩIалэхэм къалэн къыщащIащ къуршым пэгъунэгъу къуажэм дэс, пасэрей адыгэ уэрэдыжьхэм хуэIэзэ дадэм зыхуагъэзэну. ЩIыпIэм щынэсым къащIащ лIыжьыр бгым зэрыдэкIар, и иужьрей махуэхэр абы щигъэкIуэн папщIэ. Аращ фильмым щIэдзапIэ хуэхъуар.

 «Дух огня» фестивалыр 2002 гъэм Соловьев Сергей къызэригъэпэщащ. 2023 гъэм щыщIэдзауэ абы и унафэщIщ югослав кинорежиссёр цIэрыIуэ Кустурицэ Эмир. Илъэс къэс абы нэхъри зеубгъу, цIыху нэхъыбэ къыхохьэ. Мыгъэрей зэхыхьэм и къэпщытакIуэ гупым япэу хэтащ Китайм щыщ сценарист Вэй Лу, Камерун къикIащ актрисэ, режиссёр Дамарис Ндамо, Испанием - кинокритик, продюсер Мартин Ногерэ Кристиан Хайме, Сербием - режиссёр Радованович Горан. Урысейм и лIыкIуэу жюрим хэтащ режиссёр Прошкин Андрей, актёрхэу Ярмольник Леонидрэ Урсуляк Александрэрэ, музыкант Маргулис Евгений, оператор Соловьёвэ Марие.

Толгуров Саид щеджащ Краснодар щэнхабзэмрэ гъуазджэмкIэ и къэрал университетым телерадиовещанэмкIэ и факультетымрэ Москва киномкIэ и школымрэ. «В горах. Она» и фильмыр утыку щрихьащ Великий Новгород щекIуэкIа «Новое движение» урысейпсо фестивалым. Абы лъабжьэ хуэхъуар дэнэ щIыпIэ укъыщыхутэми, укъызыхэкIам, ущалъхуа щIыналъэм узэрыхуеIэжырщ. Саид и фильмхэр треухуэ махуэ къэс гъащIэм и нэгу щыщIэкI Iуэхугъуэхэм, цIыхухэм я зэхущытыкIэхэм, хьэл-щэнхэм, ди щIыналъэм щыпсэу лъэпкъхэм къадекIуэкI хабзэхэм, щэнхабзэм. Абы и лэжьыгъэхэм утезашэркъым, гушыIэ дахэ хиухуэнащи. Ар зыщIэхъуэпсыр нэгъуэщI щIыпIэхэм щыпсэухэм Къэбэрдей-Балъкъэрыр къаригъэцIыхунырщ, ди щIыуэпсым и дахагъэр, ди цIыхухэр хьэщIагъэкIэ зэрыфIыр яригъэщIэнырщ, цIыху нэхъыбэ ди республикэм къришэлIэн папщIэ.

 Китайм щытраха фэнтези жанрым щыщ фильмхэм ар и сабиигъуэм дахьэхащ. Абы щыгъуэ и плъапIэт фильмхэр трихыну. ЯпэщIыкIэ ар Гуащэ театрым и актёру лэжьащ. ЩIыналъэ телевиденэм оператору щыкIуам, камерэр къызэрищтэу, пасэу дэзыхьэха кином хуэкIуэжащ. Саид и мурадщ Къэбэрдей-Балъкъэрым адэкIи фильмхэр щытрихыну, абы щыпсэухэм я анэдэлъхубзэмкIэ лIыхъужьхэр къигъэпсалъэу. Лъэпкъыбзэхэр зэраIэщIэхум, анэдэлъхубзэхэр хъумэн зэрыхуейм гу лъригъэтэн щхьэкIэщ ар щIищIэр.

 Иджыпсту зи ужь ит ещанэ фильмыр зытеухуар зэкIэ щэхущ. Режиссёрым щапхъэу къелъытэр Иран кинематограф, режиссёр Киаростами Аббасрэ Корее Ипщэм и режиссёр Хонг Сан-сурэ я лэжьыгъэхэр. Толгуров Саид режиссёр щIалэхэр трегъэгушхуэ мышынэу утыкушхуэхэм, фестивалхэм я лэжьыгъэхэр щагъэлъэгъуэну.

ТЕКIУЖЬ Заретэ.