Щыхьэр жэмыхьэтхэм я теплъэ гуакIуэр

Урысейм ит ислъам тхьэелъэIупIэ нэхъыщхьэу къалъытэ Мэзкуу дэт мэжджытышхуэр. Гъэ къэси хуэдэу, Хьид нэмэзыр абы щригъэкIуэкIащ муфтий Гайнутдин Равиль. ЦIыху мелуан 20-м щIигъуу жаIэ къэралым муслъымэну исым я бжыгъэр. Ауэ ахэр нэщI щикIыжкIэ, дин зезыхьэри зезымыхьэри, нэщIари мынэщIыфари, нэмэз зыщIри зымыщIри зэрепх псоми зэдагуэш гуфIэгъуэм. Псом хуэмыдэу гухэхъуэщ нэщI икIыжахэр Хьид нэмэзым зэрекIуалIэм уеплъыну. 
 Хуабжьэрыпсалъэ Iэмэпсымэхэм я фIыгъэкIэ, а псоми гуфIэгъуэ хъутIбэр зэхахыну Iэмал яIащ. Iэмэпсымэм щIытедгъэчыныхьыр илъэс къэси хуэдэу, мэжджыт кIуэцIым щIэмыхуэм я бжыгъэр мы гъэм нэхъыбэж зэрыхъуарщ. Хьид нэмэз ящIын мурадкIэ Мэзкуу дэт мэжджытышхуэм къекIуэлIахэм я бжыгъэр цIыху мин 400-м нэблэгъауэ хуагъэфащэ. Зы псы уэрышхуэ ежэхым хуэдэт абыхэм къалащхьэм и уэрамхэр щауфэбгъуам. Iэуэлъауи, зэпщэфыIи, зэдауи къахэмыкIыу, фарзым къыдэкIуэ фIыгъуэм зэришэлIа, къызыхэкIа лъэпкъкIи, бзэкIи, теплъэкIи зэщхьэщыкI цIыхухэм ислъам диным и пщIэмрэ и лъагагъымрэ наIуэ къащIыфащ а махуэм. 
 «Нэгъабэрей хьид нэмэзым сыкъыкIэрыхуати, - жеIэж зи цIэ къизымыIуа, Мэзкуу щылажьэ адыгэ щIалэм, - мыгъэрейм зыкъыкIэрызмыгъэхун си мураду, сыхьэтиблыр екIуэкI къудейуэ сыщIэкIат. АрщхьэкIэ мэжджытым убгъэдыхьэну Iэмал закъуи щыIэжтэкъым, уэрамым апхуэдизу цIыхушхуэ щызэтрихьати». 
 Хэти зэрищIэщи, щыхьэрым хамэ къэралхэм къикIа муслъымэнхэри, Азие курытым щыщхэри, Кавказым икIахэри щызэрохьэлIэ. Ауэ псом хуэмыдэжу гур еIэт Хьид нэмэзым и дахагъым мымуслъымэнхэр зэрытепсэлъыхьыжым. Уеблэмэ абы и фIыгъэкIэ ислъам диным къихьэхэри мащIэкъым. 
 Урысейм и щыхьэр етIуанэу къалъытэ Санкт-Петербург щекIуэкIа Хьид нэмэзым хэтахэри бжыгъэкIэ куэдкIэ къакIэрыхуакъым ипэрейхэм. Ахэр цIыху мин 300-м нызэрыхьэсащ. Дызэрыт илъэсыр Урысейм щыпсэу лъэпкъхэм я зэкъуэтыныгъэм и гъэу зэрыщытыр къыхигъэщу, муслъымэнхэм я махуэшхуэмкIэ ехъуэхъуащ Санкт-Петербург и къалэтет Беглов Александр.