Шэджэм щIыналъэм и бэнакIуэхэр

Урысей Федерацэм бэнэкIэ хуитымрэ алыдж-урым бэнэкIэмкIэ пашэныгъэхэр къыщыхьыным хуэунэтIауэ ди къэралым щекIуэкIа зэхьэзэхуэхэм Шэджэм щIыналъэм и бэнакIуэхэм ехъулIэныгъэфIхэр щызыIэрагъэхьащ: урысейпсо зэIущIитхум зэхэту дыщэ медалу 5, дыжьынрэ домбеякъыу тIурытI къыщахьащ абыхэм. 
Псалъэм къыдэкIуэу, Суздаль къалэм алыдж-урым бэнэкIэмкIэ щызэхэта зэпеуэм Дзу Аслъэн япэ, Егъэн Айрат ещанэ увыпIэхэр щаубыдащ. Зэхьэзэхуэм хэтахэр зи ныбжьыр илъэс 18 иримыкъуахэрщ. ЩIалэхэм ядэлажьэр Чыл Аслъэнрэ Къарэ Хьидрэщ.
УФ-м бэнэкIэ хуитымкIэ пашэныгъэр къыщыхьыным хуэунэтIауэ Дагъыстэным и Каспийск къалэм щызэхэта зэIущIэми шэджэмдэсхэм хъарзынэу зыкъыщагъэлъэгъуащ. Мыбы япэ увыпIэр къыщихьащ Мизиев Iэдэм, етIуанэ щыхъуащ ПщыхьэщIэ Темырлан. ЩIалэхэр зыгъасэр Нэхущ Русланщ. Зэхьэзэхуэм хэтахэр я ныбжькIэ илъэс 16-м щхьэдэмыха бэнакIуэхэрщ.
Владикавказ къалэми щекIуэкIащ бэнэкIэ хуитымкIэ апхуэдэ зэхьэзэхуэ, ауэ мыбдеж щызэпеуащ нэхъы балигъхэр - я ныбжькIэ илъэс 21-м щIимыгъуахэр. Дыщэ медаль зэпеуэм къыщихьащ Нэхущ Руслан и гъэсэн Къэжэр Ислъам.
Иркутск къалэми япэ увыпIэр УФ-м къыщихьащ Энеев Мансур. Абы и тренерыр Энеев Рустамщ. БэнэкIэ хуитымкIэ екIуэкIа зэхьэзэхуэм хэтахэр я ныбжькIэ илъэс 18-м щхьэдэмыхахэрщ.
Алыдж-урым бэнэкIэмкIэ иджыблагъэ Уфа къалэм щызэхэта урысейпсо зэпеуэм Бахъуэ Азрэт дыщэ медаль къыщихьащ, щIалэм дэлажьэр Чыл Аслъэнщ. Къарэ Хьид и гъэсэн Ажэгъуей Амир етIуанэ увыпIэр абы щиубыдащ. Хьэбылэ Идар ещанэ хъуащ, ар зыгъасэр Индрей Жантемыррэ Хьэкъул Муратрэщ.