Тетащ дунейм нэфIэгуфIэу

 

Налшык щекIуэкI щэнхабзэ зэхыхьэхэм, пшыхьхэм екIуа­лIэу, гъащIэр фIыуэ илъа­гъуу, нэфIэгуфIэу дунейм тета ­Гъурф Бэллэ и ныбжьэгъуу икIи и лэжьэгъуу щытахэу Мэремкъул Ларисэрэ Теувэжыкъуэ Марианнэрэ гъэ къэс мэлы­жьыхьым икухэм илъэсип-щIым щIигъуауэ фэеплъ пшыхь къызэрагъэпэщ. Ар цIыхухэм ягу къинэжащ зи псалъэр щIэщыгъуэ, гуапагъэ къызыбгъэдэкI цIыхуу. 

Мэремкъул Ларисэрэ Теувэжыкъуэ Марианнэрэ Гъурф Бэллэ щытепсэлъыхьым, я псалъэм къыхагъэщащ абы макъамэр, дахагъэр фIыуэ илъагъуу, езыми хьэл-щэн дахэ хэлъу зэрыщытар. Фэеплъ пшыхьым зыкърезыгъэхьэлIахэм абыхэм фIыщIэ хуащIащ икIи концертым нэхъ къыхэжаныкIа, Музыкэ школ №3-м щеджэ, музыкант ныбжьы­щIэхэм папщIэ Владикавказ щекIуэкIа «Наши надежды» XXI дунейпсо зэпеуэм Гран-при саугъэтыр къыщы­зыхьа Ульбашев Болэт иратащ Гъурф Бэллэ и цIэкIэ ягъэува ахъшэ саугъэтыр. КъыжыIапхъэщ, Бэллэ и къуэрылъху Алий цIыкIуи концертым зэры­хэтар, Iэгуауэ ин зэрыхуаIэтар. ХьэIупэ ДжэбрэIил и гъэсэн музыкант, пианист Гъурф Бэллэ зыпэрыхьэ Iуэхухэр сыт и лъэ­ныкъуэкIи къызыхуэтыншэу зэ­фIихырт. Дунейм ехыжа куэ­дым ятеухуа лэжьыгъэ куп­щIафIэхэр абы къыщIэнауэ радиом и архивым щахъумэ. Бэллэ и Iыхьлыхэм, лэжьэгъухэм, ныбжьэгъухэм, къэзыцIыхуу щытахэм ягу къинэжащ шыIэ зыхэлъ, щIэныгъэ зыбгъэдэлъ цIыху акъылыфIэу, и дуней ­тетыкIэкIэ щапхъэу. ХэщIыныгъэ ин зыгъуэта и унагъуэм хуэдэу, куэдым ягу къоуэ Бэллэ пасэу дунейм зэрехыжар. Лъэужь дахэ къигъэнар зэращымыгъупщэращ абы ­хуащIэжыфынур. 

Пшыхьыр ягъэдэхащ Музыкэ школ №1-м, №2-м, №3-м, Гъуаз­джэхэмкIэ сабий школ №1-м я гъэсэн 12-м. Абы къе­кIуалIэ­хэм концертыр гъэщIэгъуэн, гукъинэж зэращыхъуам шэч хэлъкъым.