Мэлыжьыхьым и 15-м УФ-м и ФС-м и Къэрал Думэм и зэIущIэм япэ еджэгъуэу зэдэарэзыуэ къыщащтащ Къэбэрдей-Балъкъэрым и Парламентым къыхилъхьа федеральнэ законым и проектыр.
Зи гугъу тщIыр «УФ-м автомобилрэ токкIэ лажьэ къалэ транспорткIэ цIыхухэмрэ хьэпшыпхэмрэ къешэкIыныр къызэгъэпэщынымкIэ УФ-м и хабзэубзыху акт щхьэхуэхэм зэхъуэкIыныгъэхэр хэлъхьэнымрэ теухуауэ» Федеральнэ законым и 3-нэ, 16-нэ Iыхьэхэм зэхъуэкIыныгъэхэр зэрыхалъхьэрщ. Ахэр зытеухуар Iуэхутхьэбзэхэр зэрыхуащIэр егъэфIэкIуэнырщ.
Дэфтэрым щытепсэлъыхьым, Къэрал Думэм и депутат Геккиев Заур жиIащ а Iуэхур зи къалэн комитетыр абы куууэ зэрыхэплъар, ФедерацэмкIэ Советым и комитетымрэ УФ-м и Правительствэмрэ арэзы зэрытехъуар. Жэрдэмыр къэралым и щIыналъэ псоми даIыгъащ. Абы къыщыгъэлъэгъуа Iуэхухэр зэфIэхыным щIыналъэ 12 хэтщ.
ЗэхъуэкIыныгъэхэр зытеухуар
ЗэIущIэм къызэрыщыхагъэщамкIэ, иджыпсту щыIэ хабзэм сыт щыгъуи къилъытэркъым щIыналъэхэм я административнэ-щIыналъэ ухуэкIэм хэлъ щхьэхуэныгъэхэр. Куэдрэ къохъу республикэм и кIуэцIкIэ зы къуажэм икIыу адрейм нэсын папщIэ, автобусхэр гъунэгъу щIыналъэм ихьэн хуей щыхъу. Абы тепщIыхьмэ, апхуэдэ гъуэгур щIыналъэ зэхуаку мэхъури, ар къызэгъэпэщыным елэжьыр «Росавтотранс» федеральнэ IуэхущIапIэрщ. Ауэ тлъагъур сыт? ЦIыхухэр зэрымащIэр къезышэкIхэм я дежкIэ фейдэншэ мэхъу, жылагъуэхэри щIэх-щIэхыурэ транспорт Iуэхутхьэбзэншэу къонэ.
Щапхъэ наIуэщ Къэбэрдей-Балъкъэрыр. «Налшык - Ташлы-Тала» муниципальнэ гъуэгур Осетие Ищхъэрэм и щIыналъэм IэмалыншагъэкIэ ирокIуэ, нэгъуэщI блэкIыпIэ зэрыщымыIэм къыхэкIыу. Ставрополь щIыналъэм хиубыдэ «Прохладнэ - Малакановскэ» гъуэгуми аращ и Iуэху зытетыр. Абы щыгъуэми щIэдзапIэри, къэувыIэпIэхэри, гъуэгуанэр щиухри Къэбэрдей-Балъ-
къэрым и щIыналъэрщ.
ХабзэпроектыщIэр а щытыкIэр гъэзэкIуэжыным хуэгъэпсащ. АбыкIэ «ЩIыналъэ зэхуаку гъуэгухэр» жыхуаIэм зрагъэубгъу. Иджы абы хагъэхьэну я мурадщ щIыналъэ 12-м я гъунапкъэхэм ит гъуэгухэр. Абыхэм ящыщщ: Къэбэрдей-Балъкъэрымрэ Ставропольемрэ, Къэбэрдей-Балъкъэрымрэ РСО-Аланиемрэ, Ингушымрэ РСО-Аланиемрэ, Мордовиемрэ Пензэ областымрэ, Астрахань областымрэ Къалмыкъымрэ, Марий Элрэ Кировскэ областымрэ, Марий Элрэ Чувашиемрэ, нэгъуэщIхэри. Абы щIыналъэ унафэщIхэм Iэмал къаритынущ гъуэгухэм къызэрыщрашэкIыр езыр-езыру къызэрагъэпэщыну, цIыхухэм я гугъуехьхэр нэхъ псынщIэу зэфIахыну.
Iуэху еплъыкIэ
Депутат Еремин Сергей къыхигъэщащ зи гугъу ящI Iуэхум щIыналъэ 12 къызэрызэщIиубыдам цIыхухэр зыхэта гугъуехьыр зыхуэдизыр нэрылъагъу зэрищIыр.
- Къэрал Думэм транспортымрэ а IэнатIэм зегъэужьынымкIэ и комитетыр законопроектым хэплъэри, унафэ къищтащ жэрдэмыр даIыгъыну. УФ-м и щIыналъэхэм Iэмал яIэкъым хэхъуэ мащIэ фIэкIа зимыIэ гъуэгухэм къыщешэкIыныр къызэрагъэпэщыну (абы щыгъуэми нэгъуэщI гъуэгу зэрыщымыIэм къыхэкIыу гъунэгъу щIыналъэм ихьэу). Ар зэран хуохъу цIыхухэм транспорт Iуэхутхьэбзэхэр зэрыхуащIэм и фIагъым, - жиIащ Ереминым. Апхуэдэуи абы дыщIигъуащ къыхагъэща щыщIэныгъэхэр етIуанэ еджэгъуэм зыщыхуагъэхьэзыркIэ зэрагъэзэкIуэ-
жынур.
Къэбэрдей-Балъкъэрым и жэрдэмым и мыхьэнэм тепсэлъыхьащ Марий Эл Республикэм къыбгъэдэкIыу Къэрал Думэм и депутат Казанков Сергей. Абы ди республикэм и депутатхэм фIыщIэ яхуищIащ.
- Мы законопроектым папщIэ сэ Iэ сIэтынущ. Ауэ хэхауэ къыхэзгъэщыну сыхуейщ: ар Къэбэрдей-Балъкъэрым и Парламентым къыхилъхьащ. Къэрал Думэм куэдрэ къищтэркъым щIыпIэ Парламентхэм къагъэхь законопроектхэр. Ар тэмэмуи къыщIэкIынукъым. Мы законопроектыр и щапхъэщ щIыналъэхэм щылажьэ депутатхэм цIыхухэм я щыIэкIэ-псэукIэм я нэIэ зэрытрагъэтым. Дэфтэрыр къызэращтэм Марий Эл и Сернурскэ, Горномарийскэ районхэм щыпсэухэм я гъащIэр нэхъ тынш ящищIынущ, - къыхигъэщащ къэпсэлъам.
Хабзэр къащта нэужь, транспорт ямыIэу жылагъуэ пхыдзахэм щыпсэухэм а Iуэхутхьэбзэр тыншу хузэфIах хъунущ.
