Дыгъэм и нур

Дыгъэр зэпымыууэ къауфэрэзыхь планетэхэм, абыхэм къадекIуэкI спутникхэм. Къаруушхуэ щIэлъщ абы и нурым. 

Дыгъэм и къуэпсыр цIыхум и пкъым хохьэ,  и гукъыдэжыр къеIэт, нэфIэгуфIэ ещI, и бзий хуабэхэмкIэ къодэхащIэ, уи щхьэщыгум къиувамэ, ущIэращIэу къыпщохъу. Ауэ дегупсысу пIэрэ апхуэдизу фIыуэ тлъагъу дыгъэм и зэран къызэрыдэкIми?!
 ЩIэныгъэлIхэм къызэрахутамкIэ, цIыху къэс и Iэпкълъэпкъым лышх узыр итщ. Ар къэхъеиным щхьэусыгъуэ хуэхъухэм язщ Iэпкълъэпкъым пщтыру къылъэIэсхэр. Псалъэм папщIэ, цIыхум псы пщтыркIэ зигъэпскIыреймэ е дыгъэм куэдрэ хэлъу щытмэ, Iэмал имыIэу лышх узыр къэхъеинущ икIи псынщIэ дыдэу Iэпкълъэпкъым зриубгъуэнущ.
ЦIыхум и щIыфэр хуэныкъуэщ витамин «Д». А витаминыр дыгъэ бзийхэращ зыхэлъыр. ЗэрыгурыIуэгъуэщи, дыгъэм зегъэун хуейщ, егъэлей къыхэмыкIыу. А хабзэм ебэкъуахэм ягъэунэхуащ ар зищIысыр - щIыфэр дыгъэм ес, псыбыб мэхъу. Абы дежи къыщыувыIэркъым, лышх уз шынагъуэр къохъей. Псом хуэмыдэу ар хуэлъэщ зи щIыфэм анэл куэд тетым.
 ЩIылъэм къытридзэ дыгъэ бзийр икъукIэ гуащIэщ икIи озоным имыгъэмэщIатэмэ, щIыгум зы цIыхуи, къэкIыгъи, псэущхьи къэмынэу трисыкIынут. Ауэ, зэрытщIэщи, абы дыкъезыгъэл щыIэщ. Абы щхьэкIэ къэмынэу, гъэмахуэм апхуэдизкIэ дыгъэм мэзхэр къегъэплъри, мафIэсышхуэхэр къохъу. Езы мафIэсым нэхърэ нэхъ шынагъуэжщ къыкIэлъыкIуэр. Iугъуэм, Iэгъуэблагъэм къыщымынэу, щIыпIэ жыжьэкIэ зеубгъу, абы цIыхухэр  мыбэуэфу егъэмэх, щитхьэли къохъу.
ЦIыхухэм гу лъатащ гъэ къэс гъэмахуэр кIуэ пэтми нэхъ хуабэ зэрыхъум. КъэхутакIуэхэм зэрыжаIэмкIэ, дыгъэр кIуэ пэтми ЩIым нэхъ гъунэгъу къыхуохъу, ауэ абы ущIэгужьеин хэлъкъым. Сыту жыпIэмэ, илъэс мелард бжыгъэ куэд иIэщ ар ЩIым гъунэгъу дыдэ къыхуэхъуным. АпщIондэхукIэ цIыхум и гъащIэмрэ и зэфIэкIымрэ зэрыхъунур зыщIэр хэт?! Аращи, фIыуэ тлъагъухэм щхьэкIэ, си дыгъэ, гъэфIагъыбзэр къэдвгъэгъэсэбэп, дыгъэм и зэранми зыщыдвгъэхъумэ.