Дохутыр дыхуэныкъуэкъым

Ерыскъы егъэлеям зэраныгъэу къыздихьыр зыхуэдизым хэт щымыгъуазэр? Сымаджэм къефыкI узхэм я нэхъыбэр къызэхэкIыр лъатэм шхын куэдыIуэ зэрыраубэрауэ хуагъэфащэ щIэныгъэлIхэм. Девгъэплъыт а Iуэхугъуэм цIыхушхуэхэр зэрыхущытам. 
 Зэгуэрым Бегъымбар лъапIэу щэлатымрэ сэламымрэ зэхам Мысыр пащтыхьым тхыгъэ хуигъэхьати, модрейм жэуап къыщритыжым, тыгъэ зыбжанэ къыдыщIигъуащ: дохутыр, Iэпыдзлъэпыдз хъуну цIыхубз, дохутыр. Бегъымбар лъапIэу щэлатымрэ сэламымрэ зэхам тыгъэр къезыгъэхьами къэзыхьами фIыщIэ яхуищIри, жиIащ: «Iэпыдзлъэпыдз дыхуейщ, хьэщIэхэр зыхуей хуэдгъэзэн папщIэ. Шыдым хьэлъэ къредгъэшэкIынщ. Ауэ дохутыр дыхуэныкъуэкъым». 
 АрщхьэкIэ дохутырым кIуэжын идакъым, и пащтыхьым апхуэдэ унафэ къызэрыхуищIам къыхэкIыу. Апхуэдэу щыхъум, узэрыхуейм хуэдизрэ щыIэ жраIэри, ар зэман хъарзынэкIэ муслъымэнхэм къахэнащ. Махуэ гуэрым дохутырыр Бегъымбар лъапIэу щэлатымрэ сэламымрэ зэхам деж кIуэри, жриIащ: «Илъэс хъуауэ сывдопсэури, и узыншагъэм теухуауэ зы цIыху къызбгъэдыхьэу къысхуэтхьэусыхакъым. Уеблэмэ си щхьэр, си дзэр е си лъатэр мэуз зыми къызжиIакъым». 
«Абы и щхьэусыгъуэр мыращ, - жиIащ Бегъымбар лъапIэу щэлатымрэ сэламымрэ зэхам. – Ахэр мымэжэлIауэ шхэну зэи тIысыркъым, щышхэкIи ирагъэлейркъым, сыт щыгъуи лъатэм и Iыхьэ гуэр нэщIу къагъанэ». 
 «Узахуэщ, - жиIащ дохутырым, - апхуэдэу фIэкIа умышхэмэ, зэи уз къоуэлIэнукъым».