Иджыблагъэ «Волонтёр Iуэхур фIыщ» Iэнэ хъурейр екIуэкIащ. Зэхыхьэм хэтащ студентхэр, школакIуэхэр, еджапIэ нэхъыщхьэхэм я лIыкIуэхэр, хамэ къэралхэм къикIа еджакIуэхэр. Абыхэм яхутепсэлъыхьащ иджырей жылагъуэм хьэрэмыгъэншэу цIыхум дэIэпыкъуным щиIэ мыхьэнэм, граждан Iуэху еплъыкIэ пэж зэфIэгъэувэным пыщIа щхьэхуэныгъэхэм, щIалэгъуалэм я псэкупсэ-щэнгъасэ зыужьыныгъэм, нэгъуэщIхэми.
Къызэхуэсахэм фIэхъус псалъэкIэ захуигъэзащ КъБКъУ-м и Библиотекэм и унафэщI Гериевэ Аймани. Абы къыхигъэщхьэхукIащ дунейм и къэрал 80-м зыщызыубгъу волонтёр зэщIэхъееныгъэм нобэ, зэи хуэмыдэжу, мыхьэнэшхуэ зэриIэр.
«ДызыхэпсэукI лъэхъэнэм Iуэху гуапэ пщIэныр зимыуасэ щыIэкъым. Егъэджэныгъэ, щIэныгъэ Iуэхухэр дэIыгъынымкIэ центру щыт библиотекэм апхуэдэ Iуэхухэм ущытепсэлъыхьыныр игъуэ дыдэщ. Ди лэжьакIуэхэмрэ студентхэмрэ пщIэншэу куэдрэ мэлажьэ, адрейхэм ядоIэпыкъу. Мис апхуэдэ зэхущытыкIэ гуапэм гупсысэщIэхэр кърокIуэ, IуэхущIэхэм утрегъэгушхуэ», - къыхигъэщащ Гериевэ Аймани.
КъБКъУ-м гъэсэныгъэ лэжьыгъэмкIэ и управленэм и унафэщI Джэрыджэ Залинэ къызэхуэсахэм гу лъаригъэтащ: «Волонтёр Iуэхум гуапагъэу, къабзагъэу, гупцIанагъэу хэлъым гъунэ иIэкъым. Уи псэм фIэмыфIу волонтёру ущытыфынукъым. Сыт щхьэкIэ жыпIэмэ, ар гум къыбгъэдэкI лэжьыгъэщ. Ди университетым волонтёр центр ин диIэщ. Фэ къывгуроIуэ нэхъыбэм а лэжьыгъэр гулъытэншэу къызэрынэр. Iуэху гуэр къыщызэдгъэпэщкIэ, щIалэхэм абы гуащIэу халъхьэр афишэхэм къытрадзэркъым, уеблэмэ Iуэхур щекIуэкI утыкуми щыплъагъуркъым. Ауэ а нэрымылъагъу, псэемыблэж лэжьыгъэрщ еджапIэхэмрэ жылагъуэмрэ я дежкIэ уасэншэр. Ди щIалэхэмрэ пщащэхэмрэ фIыщIэшхуэ яхудощI я гу къабзагъэм папщIэ».
ИнджылызыбзэкIи урысыбзэкIи докладхэр утыку кърахьащ Индием, Бангладешым, Суданым, Пакистаным, Тыркуменистаным щыщ студентхэм. Ахэр тепсэлъыхьащ лъэпкъ зэдэIэпыкъуныгъэм и хабзэхэмрэ зыщыщ къэралхэм щыщыIэ экологие жэрдэмхэмрэ.
Налшык дэт курыт школ №19-м и еджакIуэ, «Пашэхэм я зэщIэхъееныгъэм» хэта Шэру Алия тепсэлъыхьащ Урысейм и волонтёр Iуэхур къызэрежьамрэ зэрызиужьамрэ, абы и иджырей унэтIыныгъэхэм: щэнхабзэ, экологие, къэхъукъащIэ. Алия я гугъу ищIащ хамэ къэрал студентхэр лъэпкъ куэду зэхэт ди къэралым и щэнхабзэм щызыгъэгъуазэ литературэ клубхэм я лэжьыгъэм.
«Добро» университет центрым и лэжьыгъэм къызэхуэсахэр щигъэгъуэзащ КъБКъУ-м и Педколледжым и студент Гъурф Миланэ. Иджыпсту центрым и лэжьыгъэм цIыху 1700-м щIигъу хэтщ. Проект нэхъыщхьэхэм ящыщщ Iуащхьэмахуэ районым щыIэ «Доброволецхэм я еджапIэр», «Iуащхьэмахуэ и щыгур къабзэщ» Iуэхур.
Къызэхуэсхэм ягу къагъэкIыжащ dobro.ru платформэмкIэ езым фIэфIу нэгъуэщIхэм ядэIэпыкъухэмрэ сэбэпынагъ зыпылъ Iуэху зэфIэзыххэмрэ зэрахыхьэфынур, абыхэм ящыщу нэхъ жанхэмрэ нэхъ жыджэрхэмрэ «Илъэсым и волонтёр» цIэр къыфIащ.
Зэхыхьэр щиухым, КъБКъУ-м и библиотекэм и унафэщIым хамэ къэрал щыщ цIыхухэм ядэлэжьэнымкIэ и къуэдзэ Багъ Заремэ псоми фIыщIэ яхуищIащ зэIущIэм зэрыхэтам папщIэ: «Дэтхэнэри IуэхуфIхэм зэрытегъэгушхуэн къару нобэрей зэIущIэм къызэрыхахар си фIэщ мэхъу. Мы Iэнэ хъурейр гупсысэщIэхэм я къежьапIэ ирехъу».
