Зыужьыныгъэм и тегъэщIапIэхэр

Кавказ инвестицэ зэхуэ­сышхуэм Къэбэрдей-Балъкъэрым къыщызэригъэпэща гъэлъэгъуапIэм утыку къыщрахьахэм еплъащ ­УФ-м и Правительствэм и Уна­фэщI Мишустин Михаил.

Республикэм и Iэтащхьэ КIуэкIуэ Казбек премьер-министрыр щыгъуазэ  ищIащ инвестицэ проектхэм, абыхэм мы махуэхэм Iэ зыщIадза зэгурыIуэныгъэхэм къыщыгъэ­лъэгъуахэри яхэту. Санаторэ, хьэ­щIэщ комплексхэр ухуэ­ныр, щыIэхэр зэгъэпэщы­жыныр щыубзыхуащ абыхэм. 2030 гъэм ирихьэлIэу республикэм зэуэ цIыху минипщIым зыщагъэпсэхуфын хуэдэу ахэр зыщIэсынухэмкIэ къызэрагъэпэщынущ.
КъБР-м и Iэтащхьэм зэрыжиIамкIэ, щIыналъэм инвестицэхэр щыгъэлэжьэнымкIэ тегъэщIапIэфIщ экономикэм шэщIауэ зэрызиужьыр, ар ­къагъэлъагъуэ илъэс блэ­кIам­рэ мы гъэм и япэ ма­зэхэмрэ кърикIуахэм.
«Республикэм и хэхъуэхэр нэхъыбэ мэхъу, мы гъэм и япэ мазиплIым ахэр проценти ­111-м нэсащ, гъэ кIуам и апхуэдэ пIалъэм еплъытмэ. НэгъуэщIу жыпIэмэ, сом мелуан 854-кIэ нэхъыбэ къэдлэ­жьащ.
2019 гъэм къыщыщIэдзауэ республикэм и ВРП-м хуэ­дитIкIэ хэхъуащ. Нэхъыбэ ­мэхъу мэкъумэш хозяйствэм, ухуэ­ныгъэм, сатум фейдэуэ къахьми. Туристу ди деж илъэс кIуам щыIахэм я бжыгъэр ­мелуанитIым щIигъуащ. Мылъку нэхъыщхьэм инвестицэу къыхалъхьэр псори зэхэту сом мелард 83-м ­щIегъу, е 2024 гъэм елъытауэ проценти 102,5-рэ мэхъу. Хьэ­рычэт IэнатIэ мащIэмрэ ку­рытымрэ пэрыт IуэхущIапIэ­хэр проценти 8,3-кIэ, я щхьэ хуэлэжьэжхэр процент 16,4-кIэ нэхъыбэ хъуащ, а IэнатIэм хэтхэм я жыджэрагъым хэ­хъуэ зэпытщ», - къыхигъэщащ КIуэкIуэ Казбек, Прави­тельст­вэм и УнафэщIым гъэлъэ­гъуэ­ныгъэм зыщри­гъэ­плъы­хьым.
Абы къызэрыхигъэщамкIэ, инвестицэ жэрдэмхэр къыдаIыгъ къэрал, щIыналъэ ­къулыкъущIапIэхэм, гулъытэ щхьэхуэ егъуэт а пэхуэщIэхэм къадэкIуэ инфраструктурэми. Экономикэм и зыужьыныгъэм нэхъыбэу тегъэщIапIэ ищIыр туризм IэнатIэм ехьэ­лIауэ ящIа мурадхэр зрагъэхъулIэнырщ. Инвестицэ лэ­жьыгъэри адэкIэ зэрыщIагъэхуэбжьэнури къыхигъэщащ Iэтащхьэм.
КIуэкIуэ Казбек Мишустин Михаил фIыщIэ хуищIащ Къэ­бэрдей-Балъкъэрым, абы и социально-экономикэ зыу­жьы­ныгъэм зэпымыууэ гулъытэ къызэрыхуищIым папщIэ.