Налшык къалэ и хьэщIэщхэр

5 мая, 2026 - 07:01
Къэбэрдей-Балъкъэрым курортхэмрэ туризмэмкIэ и министр Быф Аскэр иджыблагъэ зыщигъэгъуэзащ Налшык къалэм и курорт щIыпIэхэм щаухуэ хьэщIэщхэмрэ хьэщIэщ комплексхэмрэ я лэжьыгъэхэр здынэсам. 
Абы зригъэщIащ ухуакIуэхэр зыпэрыт проектхэм яIэну инфраструктурэхэр, пэш фондым къыхэхъуэну бжыгъэр, туристхэмрэ республикэм щыпсэухэмрэ я зыгъэпсэхупIэу, нэгузыужьыпIэу щытыну щIыпIэхэм ягъуэтыну теплъэр зыхуэдэнухэр. 
Быф Аскэр яIущIащ пэхуэщIэхэр къыхэзылъхьахэмрэ абы елэжьхэмрэ икIи тепсэлъыхьащ ахэр зыпэрыт лэжьыгъэхэр зэрагъэзащIэ щIыкIэхэм, зыхуей-зыхуэфIхэм, щызэфIагъэкIыну пIалъэхэм, Налшык къалэм и хьэщIэщ инфраструктурэм зегъэужьынымкIэ щыIэ Iэмалхэм, нэгъуэщIхэми. 
Иджыпсту зыпэрыт пэхуэщIэхэр ирагъажьэу щытмэ, ди республикэм Iэмал иIэнущ зыгъэпсэхуакIуэ, нэгузегъэужьакIуэ къакIуэ туристхэми ди щIыналъэм инвестицэ ахъшэ къыхэзылъхьэнухэми я бжыгъэм хигъэхъуэну, щыжаIащ щIыпIэ министерствэм.
 
Шэджэм къалэм и щIыпIэ зэпэщхэр
«Къалэдэсхэм я псэукIэр егъэфIэкIуэн» къэрал пэхуэщIэм ипкъ иткIэ Къэбэрдей-Балъкъэрым и щIыналъэхэм цIыхухэр куэду щызэхуэс я щIыпIэхэм зэIузэпэщ ящI. Шэджэм къалэми а проектым къыщыгъэлъэгъуа, цIыхухэм я псэукIэр егъэфIэкIуэнымрэ тыншыпIэхэр къахузэгъэпэщынымрэ хуэунэтIа Iуэхугъуэхэр жыджэру щагъэзащIэ. 
Псалъэм къыдэкIуэу, 2018-2025 гъэхэм къриубыдэу Шэджэм къалэм цIыхухэр куэду щызэхуэс и щIыпIэу 9 зэIузэпэщ ящIащ, теплъэ дахэхэр иратащ. Мы гъэми а лэжьыгъэхэм пащэнущ. 
Иджыпсту чэзур зейр урысейпсо интернет IэIэтым щытекIуа, къалэдэсу мини 3-м щIигъум япэ игъэщыпхъэу къагъэлъэгъуа щIыпIэрщ. Ар Лениным и цIэр зезыхьэ уэрамым и ипщэ лъэныкъуэм хуозэ. Абдежым щаухуэнущ спорт лIэужьыгъуэ куэдым хуэщIа утыку Iэхуитлъэхуит, топджэгу губгъуэщIэр и курыхыу щыту. 
ПэхуэщIэм къызэрыщыгъэлъэгъуамкIэ, ар къызэрыгуэкI топджэгу губгъуэу щытынукъым, атIэ стадионхэм щхьэкIэ щыIэ инфраструктурэхэр иIэнущ, спортым дихьэххэм я тыншыпIэхэр къэлъытауэ. 
КъищынэмыщIауэ, мы гъэм екIуэкIыну урысейпсо интернет IэIэтым Шэджэм къалэм хигъэхьащ «Ипщэ» хьэблэм жыг хадэ цIыкIу щыухуэнымрэ сабийхэм я джэгупIэр зэIузэпэщ щIынымрэ. 
 
  Нарткъалэ и уэрамхэр
Дызэрыт илъэсым къриубыдэу Аруан районым и щыхьэрым и автомобиль гъуэгум щыщу километр мини 3-м нэблагъэ зи кIыхьагъ уэрамхэр къызыхуэтыншэу зэрагъэпэщыжынущ. Лэжьыгъэхэр ирагъэкIуэкIынущ республикэм и бюджетым къыхэкIа мылъкукIэ. 
НобэкIэ апхуэдэ Iуэхугъуэхэр щызэхаублащ Ахъмэтым, ШэджыхьэщIэм, Лениным я цIэхэр зезыхьэ уэрамхэм. Лэжьыгъэр япэу щрагъэжьар метр 1130-рэ зи кIыхьагъ, Ахъмэтым и цIэр зезыхьэрщ. Мыбдежым техникэ хэхауэ 5 нобэ щолажьэ. ЛэжьакIуахэм ахэр къагъэсэбэпу бордюрыжьхэр къыхатхъыж, иужькIэ, гъуэгу щхьэфэр тратхъунщIыкIынущ. 
Ахэр зэрызэфIэкIыу, гъуэгу лъабжьэр ягъэбыдэнурэ, асфальтрэ бетонрэ зэхэщIауэ тIуащIэу тралъхьэжынущ, лъэс лъагъуэхэр къыхагъэщхьэхукIынущ, мывэхэмкIэ кърагъэбыдэкIыжынущ, псы жапIэхэр хуащIынущ, лэжьыгъэхэр екIуэкIыхукIи, уэрамыр зэхуэщIауэ щытынущ.
ЩЭУЕЙ Башир.
  • 14 просмотров
Поделиться:

Читать также:

17.05.2026 - 12:36 → Iэдэм и япэ лъэбакъуэхэр
14.05.2026 - 17:00 → СПОРТ ХЪЫБАРХЭР
12.05.2026 - 18:31 → Спорт хъыбархэр
08.05.2026 - 14:44 → КъэралитIым зыкъыщагъэлъагъуэ
06.05.2026 - 15:59 → Спорт хъыбархэр