Спорт хъыбархэр

БоксымкIэ зэпеуэ

Урысей Федерацэм боксымкIэ пашэныгъэр къыщыхьыным хуэунэтIа зэхьэзэхуэ Мэзкуу областым и Чехов къалэм щекIуэкIащ. Абы щызэпеуащ ди къэралым и щIыналъэхэм ящыщу 74-м я спортсмену 552-рэ, я ныбжькIэ илъэс 15-16 хъухэу.

Къэбэрдей-Балъкъэрым и спортсменхэм зэхьэзэхуэм екIуу зыкъыщагъэлъэгъуащ икIи я хьэлъагъ елъытауэ зыхэта гупым япэ увыпIэр къыщихьащ ГъущIапщэ Альберт (кг 60).

Быф Дамир (кг 54-рэ) етIуанэ, Пщынокъуэ Ислъам (кг 52-рэ) ещанэ абы хъуахэщ.

Медалхэмрэ щIыхь тхылъхэмрэ къадэкIуэу, ГъущIапщэ Альберт саугъэт щхьэхуэ къратащ техникэфI къызэригъэлъэгъуам папщIэ.

Ди командэм хэтхэм ядэлажьэр Куэшмэн Аслъэн, Къумыкъу Мухьэмэд, Елгъэр Елдар сымэщ.

Атлетикэ псынщIэм зэхуешэс

Къэбэрдей-Балъкъэрым атлетикэ псынщIэмкIэ и чемпионатрэ пашэныгъэр къэхьэным хуэунэтIа зэхьэзэхуэрэ Налшык, Прохладнэ къалэхэм иджыблагъэ щекIуэкIащ. Хэгъэрейхэм нэмыщI, абы кърихьэлIащ Осетие Ищхъэрэ – Аланием, Ставрополь крайм, Къэрэшей-Шэрджэсым я командэу 23-рэ, псори зэгъусэу спортсмен 400-м нэблагъэ.

Ди республикэм и щIыхьыр яIэту зэхьэзэхуэм хэтащ КъБР-м СпортымкIэ и министерствэм Олимп джэгухэм хэтыфынухэр щагъэхьэзыр и спорт еджапIэм, Прохладнэ къалэм Олимп джэгухэм я чемпион Ласицкене Марие и цIэр зезыхьэ и спорт школым, Май къалэм и курыт еджапIэхэм я гъэсэнхэр.

Спортсменхэр зэхьэзэхуащ атлетиткэ псынщIэм хыхьэ лIэужьыгъуэу 13-мкIэ икIи Къэбэрдей-Балъкъэрым и командэхэм абыхэм къыщахьащ дыщэ медалу 42-рэ, дыжьыну 45-рэ, домбеякъыу 35-рэ.

КъБР-м и чемпионатымрэ пашэныгъэр къэхьынымкIэ зэхьэзэхуэмрэ къыщыхэжаныкIахэр хагъэхьащ республикэм и командэ къыхэхам икIи ахэр хэтынущ Кавказ Ищхъэрэм щекIуэкIыну апхуэдэ зэпеуэхэм. Ахэр мы гъэм накъыгъэм и 13-18-хэм щызэхашэнущ Ставрополь, Черкесск къалэхэм.

Медалищ къахь

Бжымрэ дискымрэ нэхъ жыжьэ дзынымкIэ урысейпсо зэхьэзэхуэ Адлер къалэм щекIуэкIащ. Абы хэтащ УФ-мрэ Белоруссиемрэ я спортсмену 500-м нэблагъэ. Къэбэрдей-Балъкъэрым и лIыкIуэхэм хъарзынэу зэхьэзэхуэм зыкъыщагъэлъэгъуащ икIи медалищ абы къыщахьащ.

Бжыр нэхъ жыжьэу дзынымкIэ екIуэкIа зэхьэзэхуэм щытекIуащ ди лъахэгъу Орлов Николай: метр 75-рэ сантиметр 56-рэ. НыбжьыщIэхэм я деж етIуанэ щыхъуащ Ерыжокъуэ Идар: метр 43-рэ сантиметр 34-рэ. Абы и ныбжьыр зэрыхъур илъэс 16-щ.

Дискыр нэхъ жыжьэ дзынымкIэ ирагъэкIуэкIа зэпеуэм етIуанэ щыхъуащ Добренький Александр: метр 52-рэ сантиметр 61-рэ.

Спортсменхэм я тренерхэр Артамонов Артуррэ Уэзрокъуэ Анзоррэщ.

Ставрополь щохьэщIэ

УФ-м боевой самбэмкIэ пашэныгъэр къыщыхьыным хуэунэтIа зэхьэзэхуэ щекIуэкIащ Ставрополь къалэм и «Юность» спорт комплексым. Къэбэрдей-Балъкъэрым щыщу зэпеуэм спортсмени 9 хэтащ икIи медалу 8 абы къыщахьащ: 4-р дыщэу, 1-р дыжьыну, 3-р домбеякъыу.

Я хьэлъагъ елъытауэ зыхэта гупхэм япэ увыпIэхэр щаубыдащ Къанымгъуэт Къантемыр, Мэшокъуэ Сэлим, Етухэ Умаррэ Уэсмэнрэ.

Дыжьын медаль къихьащ Хурэ Азэмэт. Ещанэ хъуахэщ Пронин Дамир, Къамэ Албэч, ТIыхъужь Сэлим сымэ.

Спортсменхэм ядэлажьэр БищIо Мухьэмэдрэ КъБР-м ММА-мкIэ и федерацэм и унафэщI ПщыукI Залымрэщ.

Кърымым макIуэ

УФ-м ММА-мкIэ пашэныгъэр къыщыхьыным хуэунэтIауэ ныбжьыщIэхэм я зэхьэзэхуэ Кърымым и Алуштэ къалэм щекIуэкIащ. Абы щызэпеуащ ди къэралым и щIыналъэхэм ящыщу 66-м я спортсмену 600-м щIигъу. КъБР-м и лIыкIуэу 8 абы щыIащ.

МахуищкIэ екIуэкIа зэхьэзэхуэм етIуанэ увыпIэхэр къыщахьащ Къуэший Къантемыррэ (кг 67-рэ) Уэтэр Алихъанрэ (кг 62-рэ) икIи Iэмал ягъуэтащ дунейпсо зэпеуэм я зэфIэкIхэр щагъэлъэгъуэну.

ЩIалэхэм я тренерхэр Къуэший Елдаррэ Нэгъуейалий Азэмэтрэщ.

НэхъыфIитхум яхохьэ

УФ-м мас-рестлингымкIэ пашэныгъэр къыщыхьыным хуэунэтIа зэхьэзэхуэ Чувашием и къалащхьэ Чебоксары щекIуэкIащ. Абы щызэхуэзащ ди къэралым и щIыналъэхэм ящыщу 22-м я спортсмену, щIалэхэри хъыджэбзхэри зэхэту, 300-м щIигъу.

Къэбэрдей-Балъкъэрым икIауэ зэхьэзэхуэм щыIащ спортсмен II икIи абыхэм ящыщу 6-м медалхэр къахьащ.

И хьэлъагъ елъытауэ зыхэта гупым щытекIуащ ЩоджэнцIыкIу Адалинэ. Ещанэ увыпIэхэр къахьащ Щомахуэ Аслъэн-Бэч, АфэщIыж Ричард, Бейтыгъуэн Имран, Мэкъуауэ Силинэ, ГъукIэлI Идар сымэ.

Абы нэмыщI, КъБР-м и командэр къэралым щынэхъыфIитхум хабжащ.

Зэхьэзэхуэр къызэрыхахыу щытащ, абы къыщыхэжаныкIахэм дунейпсо зэпеуэм я зэфIэкIхэр щагъэлъэгъуэнущ.

Ди командэм и тренерхэр Гъубж БетIалрэ ЛампIэжь Алимрэщ.