Гъунапкъэ зимыIэ макъамэ

Зэраубзыхуам тету, Урысейм и цIыху минхэр гъэ къэс зэхуэзышэс мы фестивалыр мэлыжьыхьым икухэм ирагъэжьащ икIи накъыгъэм и 10 пщIондэ екIуэкIынущ. Мы гъэм ар траухуащ Прокофьев Сергей къызэралъхурэ илъэси 135-рэ, Шостакович Дмитрий – илъэси 120-рэ, фестивалым и зэхэублакIуэхэм ящыщ Лужков Юрий – илъэс 90 зэрырикъум. Фестивалыр къызэрагъэпэщащ УФ-м и Правительствэр, УФ-м ЩэнхабзэмкIэ и министерствэр, КъБР-м и Iэтащхьэ КIуэкIуэ Казбек я дэIэпыкъуэгъуу, Москварэ Урысей псомрэ я Патриарх Кирилл и арэзыныгъэкIэ.

Москва и IутIыж фестивалыр илъэс 20 и пэкIэ зэрырагъажьэрэ абы дуней псом щыщ уэрэджыIакIуэ мин бжыгъэхэр хэтащ, къэрал куэдым щыцIэрыIуэхэри, Чайковскэм и цIэкIэ къызэрагъэпэщ международнэ зэпеуэхэм я лауреат хъуахэри къызэщIиубыдэу. Абы хыхьэу, маэстрэ Гергиев Валерэ Урысейм и музыкант цIэрыIуэхэм я гъусэу къалэ 70-м щIигъу, къэралитху къызэщIэзыубыдэ концертхэр ет. ТекIуэныгъэ Иным и махуэшхуэр щагъэлъапIэм оркестрым Москва щитыну концертым цIыху мин 300-м нэблагъэ зэхуишэсыну хуагъэфащэ. 

Классикэ макъамэм дихьэххэм я кIэн къикIауэ къалъытащ мы гъэм етIуанэу ар ди республикэм къызэрытхуеблэгъар. Оркестрым игъэзэщIащ композитор цIэрыIуэхэу Дебюсси Клод, Римский-Корсаков Николай, Малер Густав сымэ я Iэдакъэ къыщIэкIа лэжьыгъэхэм щыщ. Пшыхьым зыкърезыгъэхьэлIахэр иджыри зэ щыхьэт техъуащ композитор цIэрыIуэхэм я щIэинхэм гъуазджэм и къарур нэхъри зэрызыхыуагъащIэр, макъамэм гъунапкъэ зэримыIэр.

Гергиев Валерэ журналистхэм зыкъыщытхуигъэзам жиIащ Налшык аргуэру къызэрыкIуар зэригуапэр. И гугъу ищIащ СССР-м, РСФСР-м, КъБР-м я цIыхубэ артист, Совет Союзымрэ Урысей Федерацэмрэ я Къэрал саугъэтхэм я лауреат, Санкт-Петербург щIыхь зиIэ и цIыху, а къалэм и  филармонием и Академическэ симфоние оркестрым и художественнэ унафэщIу щыта дирижёр цIэрыIуэ Темыркъан Юрэ япэщIыкIэ зэрыригъэджам, иужькIэ лэжьэгъу, ныбжьэгъу зэрызэхуэхъуам, зэрызэдэлэжьам зэрыригушхуэм, «Победа» кинотеатрым деж Темыркъаным и цIэр зезыхьэ центр къызэрыщызэIуахынум, абы теухуа тхылъым елэжьыным пищэн папщIэ гъэмахуэм къэкIуэну зэримурадым. Валерэ къыхигъэщащ ди лъэпкъэгъу дирижёр цIэрыIуэм мы пшыхьыр фэеплъ зэрыхуищIыр. 

Гергиев Валерэ жиIащ ди щIыналъэм дежкIэ мыпхуэдэ щэнхабзэ зэхыхьэхэм мыхьэнэшхуэ зэраIэр, щIэупщIэ зиIэ театр теплъэгъуэхэр ди деж щыгъэувыным, гъуазджэмрэ щэнхабзэмрэ зэфIэкI щызиIэ щIалэгъуалэм ядэIэпыкъуным республикэм и Iэтащхьэм и гъусэу зэрытепсэлъыхьар. Артист гъуэзэджэм лъэпкъхэм я зэкъуэтыныгъэр зэрылъапIэр зэрызыхищIэм и щыхьэтщ ди зэхущытыкIэхэр нэхъри игъэбыдэну зэрыхущIэкъур. Абы и щыхьэтщ Мариинскэ театрымрэ Театр Инымрэ я артистхэмрэ республикэм и артистхэмрэ зэдигъэлэжьэну зэрыхьэзырыр, оперэхэр, балетхэр зэдагъэув, камернэ концертхэр зэгъусэу ят, щэнхабзэ лэжьыгъэхэмкIэ зэхъуажэ зэрыхъунур, къайхъулIэмэ, гъэ къэси Налшык къэкIуэну зэрамурадыр.