Щапхъэ дахэ игъэлъагъуэрт

Дзэ Iуэху хэхам хэтхэм пщIэ, гулъытэ хэха яхуэфащэщи, къэралым абыхэм защIигъакъуэу къокIуэкI. Ди жагъуэ зэрыхъущи, щыIэщ а Iуэхум зи щхьэ хэ­зылъхьахэри. Абыхэм ящыщщ Жэм­тхьэлэ къуа­жэм щыщ Гъубжокъуэ Хьэз­рэталий. 

1986 гъэм накъыгъэм и 9-м къалъ­хуат Хьэзрэталий. Жылэм дэт курыт еджапIэ №1-р къиуха нэужь ар щIэтIысхьащ Къэбэрдей-Балъкъэр къэ­рал мэкъумэш академием финансхэмрэ экономикэмкIэ и къу­дамэм. 2008 гъэм къиухри, КъБР-м и ГУ ОВО-м лэжьапIэ уващ, иужьыIуэкIэ Шэ­рэдж щIыналъэм и ПФР-м щы­лэжьащ. Ар псэуащ цIыхухэр фIыуэ илъагъуу, гъащIэм щыгуфIыкIыу, захуагъэм и телъхьэу. Гъубжокъуэм къы­дэлэжьахэм ягу къинэжащ цIыху нэжэгужэу, щIэныгъэшхуэ зыбгъэ­дэлъу, зэпIэзэрыту, гулъытэ зиIэу, набдзэгубдзаплъэу. Лэжьэгъу къудей мыхъуу, куэдым ныбжьэгъу пэж яхуэхъуат. 
2025 гъэм Хьэзрэталий Хэкум къу­лыкъу хуищIэну кIуащ дзэ Iуэху хэхам. ЗэрыкIуэрэ мазэ фIэкIа мы­хъуауэ, и пщэ къыдалъхьа къалэныр игъэзащIэу фочауэ батальоным хэт щIалэр бадзэуэгъуэм и 17-м Луганск Республикэм хиубыдэ Григоровкэ ­къуажэ цIыкIум деж щыхэкIуэдащ…
Унэм абы къыщыпэплъэрт и адэ-анэр, и къуэшыр, и щхьэгъусэмрэ ­бынищымрэ. 
Гъубжокъуэм и адэ-анэм зэрыжаIэмкIэ, Хьэзрэталий быныфIым и щапхъэт, къэзылъхуахэм яхуэбзэ­IэфIт, пщIэ яхуи­щIырт, щIэгъэкъуэн яхуэхъурт. 
Ар адэ щыпкъэт, и бынхэм ятеуб­гъуауэ ипIырт. Гуныкъуэгъуэ зиIэм едэIуэфырт, чэнджэщыфIхэр иритырт, дэIэпыкъуэгъу хуэныкъуэм сы­тым дежи зыщIигъэкъуэнут, ехъу­лIэныгъэ зиIэм щыгуфIыкIыфырт. Езым зэрыжиIэмкIи, зыхуэпсэур и бынхэр арати, лъагъуныгъэрэ да­хагъэкIэ гъэнщIа дуней яхуиухуэрт. 
Зи псалъэ зыIыгъыжыф цIыху гуа­пэу дунейм тета Гъубжокъуэ Хьэзрэталий псэужамэ, и ныбжьыр илъэс 40 ирикъунут.