«Ираным щедгъэкIуэкIа Iуэхур и кIэм нэблэгъащ», - жиIэри, США-м и президент Трамп Дональд хъыбар зэбгритыкIащ. АрщхьэкIэ американхэм иджыри и нэхъуейр зэрытемыкIар псоми къагуроIуэ.
Иранымрэ США-мрэ зэгурыIуэныгъэ зэращIылIэным Iуэхур гъунэгъу хуэхъуа щхьэкIэ, лъэныкъуитIым фIэкIыпIэншагъэу къагъэувхэр нобэми зэблэкIыркъым. ЯпэщIыкIэ IэщэкIэ зэзэуэныр ягъэувыIэри, зэгурыIуэныгъэ зэращIылIэным куэд къэнэжакъым жаIэурэ, къэралитIым я лIыкIуэхэр Пакистаным щызэхуэзащ. АрщхьэкIэ Исламабад щекIуэкIа япэ зэIущIэм щытыкIэм зригъэхъуэжакъым. Уеблэмэ зэхущытыкIэр нэхъ гуащIэж хъун шынагъуэр псоми зэращхьэщытщ. Псом хуэмыдэу, США-м зыри Ормуз хыдэуапIэм димыгъэхьэну мурад зэрищIрэ.
НаIуэу къэхъумрэ абы и лъабжьэ щIэлъ нэрымылъагъумрэ хуэм-хуэмурэ къыщыщIэщу апхуэдэщ мы зэпэщIэтыныгъэм. Мэлыжьыхьым и 10-м къэралитIым я лIыкIуэхэм япэ зэIущIэр Исламабад щрагъэкIуэкIащ. Ираным къыбгъэдэкIыу зэIущIэм екIуэлIа цIыху 71-м я пашэт парламентым и спикер Галибаф Мухьэмэдрэ хамэ къэрал IуэхухэмкIэ министр Аракчи Аббасрэ. Махуэ 38-кIэ екIуэкIа зауэм хэкIуэдахэм зэрахуэщыгъуэм и дамыгъэу, иран лIыкIуэхэр фIыцIэкIэ хуэпат, уеблэмэ лагъымкIэ яукIа школакIуэхэм я хъуржынхэмрэ вакъэ цIыкIухэмрэ здахьауэ жаIэ зэгурыIуэныгъэр щызэращIылIэну щIыпIэм.
Американ лIыкIуэхэм я пашэр вице-президент Ди Вэнс Джейрэ Урысейм куэд дыдэрэ къакIуэ, США-м и президентым КъуэкIыпIэ Гъунэгъум щилIыкIуэ Уиткофф Стивенрэт. Абыхэм я гъусэт Трамп и малъхъэ Кушнер Джаред. «Сыхьэт 21-кIэ екIуэкIа зэпсэлъэныгъэм зэкIэ зыми дыхуишакъым, ауэ ар ежьакIэщ, хуэмурэ нэхъыфIым дыхуэкIуэнщ», - а еплъыкIэрщ зэIущIэ нэужьым къыжьэдашыфар Ди Вэнси Аракчии. «ЗэгурыIуэныгъэм дыхуэхьэзырщ, ауэ США-м дзыхь хуэтщIу щыткъым», - жиIат Галибаф Исламабад къэкIуэн и пэ. Нэхъ жьакIуэу къэхъуар къэзыIуэтэжхэм зэрыжаIэмкIэ, Уиткоффрэ Аракчирэ я еплъыкIэхэр зэтемыхуа къудейтэкъым, зэдауэр зэпщэфыIэным нэсыным зымащIэщ иIэжар. Сытми, зэпэщIэтыныгъэр зэрыгуащIэщ. Америкэм икIэщIыпIэкIэ Ормуз хыдэуапIэр зэIуахыжыныр Ираным пеубыд. Иужьрейм ар едэ, Оманымрэ Иранымрэ зэдагуэшыну блэкIыпщIэр иратыну унафэм арэзы техъуэхэмэ. Америкэм Ираныр бей ищIын мурад иIэкъым, дауи. Абы ищIыIужкIэ, езым Ормуз хыдэуапIэр къиувыхьу, и бийм ахъшэ езытхэм яхуимыгъэгъуну и мурадщ. Иужьрей махуэхэм зэхыдох США-м езым и кхъухьыдзэхэмкIэ Ормуз хыдэуапIэр къиувыхьауэ, Ираным дэлэжьэну зи мурадхэр игъэшынэу.
Зауэм зэрыщIидзэрэ, Ираным Урысейр щэхууи нахуэуи доIэпыкъу. Ормуз хыдэуапIэм пэгъунэгъуу псыщIагъ кхъухьи 6 щиIыгъщ Урысейм, абыхэм ящыщу 2-р атомхэкI IэмэпсымэкIэ мэлажьэ. Кхъухьхэм я къалэнщ хыдэуапIэр абы ебгъэрыкIуэнкIи хъунухэм щахъумэну.
ЕтIуанэ фIэгъэнапIэу Ираным къигъэувар ядернэ Iэщэм елэжьын щигъэтыну зэримыдэрщ. Америкэм «уран вгъэпшэрахэр псори дэ къыдэфтын хуейщ» жеIэ, модрейхэм ар ядэркъым. Дэ тщIапхъэмрэ дымыщIапхъэмрэ и унафэ дэ езым тщIыжынущ, - аращ абыхэм я гупсысэм и тегъэщIапIэр. «Зызэрытщыфхъумэн Iэщэ вгъэхьэзыру фхуэддэнукъым», - къыбжезыIэ бийм дауэ узэрепсэлъэнур? НэгъуэщI мыхьэнэ пхущIэлъхьэркъым Америкэм Ираным пиубыд унафэм.
А псом къыдэкIуэу, Трамп дзыхь зэрыхуамыщIыр къэзыгъэнаIуэхэр куэд щыхъуащ США-м. Иужьрейуэ утыку къихьахэм ящыщщ артист цIэрыIэхэу Де Ниро Робертрэ Стрип Мерилрэ. Дауи, ахэр къызыкъуэгушхукIыр демократ партырщ, итIани, я акъылэгъухэр к1уэ пэтми нэхъыбэ мэхъу.
