Iэдэм и япэ лъэбакъуэхэр

Краснодар крайм хыхьэ ТIуапсы районым и Новомихайловскэ къуажэм иджыблагъэ щекIуэкIащ сабийхэм футболымкIэ я урысейпсо зэхьэзэхуэр, «MOLNIA CUP» фIэщыгъэр зезыхьэр. Абы щызэпеуащ 2015 гъэм къалъхуа топджэгу ныбжьыщIэхэр, псори зэхэту а щIыналъэм и команди 7. 

Ди гуапэу къыхэдгъэ­щынщи, Краснодарым и футбол академием и «ЮМР» командэм хэту абы щыджэгуащ Къэбэрдей-Балъкъэ­рым щыщ спортсмен ныбжьыщIэ, Налшык къалэм и курыт школ №11-м и еджакIуэ Къуэжей Iэдэм. ЩIалэщIэм зэфIэкI зэрыбгъэдэлъым тренерхэм нэхъ пасэу гу лъатати, ар ирагъэблэгъат а зэхьэзэхуэм, и джэгукIэм къыкIэлъыплъын, и зэфIэкIыр ягъэунэхун мурадкIэ. ИкIи Iэдэм ахэр къызэрыщыгугъауэ къыщIэкIащ. 
«ЮМР» командэм зэIущIибл зэпеуэм щригъэкIуэкIати, зыдэджэгуа клубхэу «Искра»-м 11:0-у, «Небуг»-м 1:0-у, «Запад»-м 3:0-у, «Кубань»-м 7:0-у, «Прометей»-м 9:0-у ятекIуащ. Финалым зыщыIущIа «Небуг»-м 7:0-у къыфIахьащ икIи турнирым япэ увыпIэр щаубыдащ. 
Къуэжей Iэдэм и джэгукIар тренерхэм ягу ирихьащ икIи арэзы ­техъуащ, зэрыжаIамкIи, адэкIи ирагъэблагъэурэ къыкIэлъыплъынущ. Командэм къыдэлажьэр Вуйман Валерэщ.
ЕкIуу утыку ихьа ныбжьыщIэм и ехъулIэныгъэмкIэ дехъуэхъунщ, гу зыхуищIа футболым езым и лъагъуэ щыпхишыжыну, и цIэр лъагэу игъэIуну, дэри дигъэгуфIэну.