ЛъэныкъуитIыр зэгуроIуэ

Индие къэралым и Посольствэм Егъэджэныгъэ IуэхухэмкIэ и полномочнэ министр Винай Кумар Батхула Венкатешвар лэжьыгъэ IуэхукIэ КъБКъУ-м щыIащ. Абы Индием къикIа студентхэр ди университетым зэрыщеджэм, ди лъахэм зэрыщыпсэум зыщигъэгъуэзащ, егъэджэныгъэ IэнатIэм и лъэныкъуэкIэ къэралитIыр зэрызэдэлажьэм нэхъри зегъэубгъуным и хэкIыпIэхэм тепсэлъыхьащ.

Ар кърагъэблэгъа нэужь, КъБКъУ-м и лэжьакIуэу, студенту Хэку зауэшхуэм хэкIуэдахэм я фэеплъым удз гъэгъахэр тралъхьащ. Университетым и ректор Алътуд Юрэ, еджапIэ нэхъыщхьэм и лэжьакIуэхэмрэ студентхэмрэ хьэщIэ лъапIэм и гъусэу лIыхъужьхэм зы дакъикъэкIэ яхуэщыгъуащ.

Абы иужькIэ лIыкIуэхэр университетым щIыхьащ икIи Индием къикIа къулыкъущIэм ди лъахэм исхэр зэрыпсэур ирагъэлъэгъуащ. ПэIущIэ пэшым щегъэувэкIат адыгэ, балъкъэр, урыс, Индием, нэгъуэщI къэралхэм щыщ студентхэм я зэгухьэныгъэхэм ягъэхьэзыра лъэпкъ плIанэпэхэр. Абыхэм щагъэгъуэзащ хьэщIэр. Къэбэрдей-Балъкъэрым щыпсэу лъэпкъхэм я щэнхабзэ центрхэм я лIыкIуэхэр хьэщIэхэм къыпежьащ макъамэрэ къафэкIэ.

КъБКъУ-м и ректор Алътуд Юрэрэ егъэджэныгъэ лэжьыгъэмкIэ проректор Лесев Вадимрэ министрыр щепсалъэм и гугъу ящIащ Индием щыщ студентхэр КъБР-м зэрыщеджэм арэзы къызэрищIым и фIыгъэкIэ, дяпэкIэ нэхъыбэжи къагъэкIуэну щыIэ Iэмалхэм.

ИтIанэ дипломатыр яIущIащ я хэкум щыщ студентхэм. ЩIалэгъуалэр тепсэлъыхьащ еджэным, творчествэм зэрыщыжыджэрым, щIэныгъэ конференцхэмрэ фестивалхэмрэ зэрыхэтым, апхуэдэуи зыгъэпIейтейхэмкIэ министрым еупщIащ.

ХьэщIэхэм кампусым зыщрагъэплъыхьащ. КъулыкъущIэм студент общежитхэр зригъэлъэгъуащ, тыншыгъуэ псомкIи къызэрызэгъэпэщам арэзы къищIащ. Апхуэдэуи щыIащ спорткомплексым, Прогрессивнэ материалхэмрэ аддитивнэ технологиехэмкIэ центрым, Стоматологиемрэ жьэпкъ-напэпкъ хирургиемкIэ институтым, Медицинэ колледжым, КъБКъУ-м и Медицинэ академием АккредитацэмкIэ и центрым.

А махуэм университетым и хьэщIэхэр лъэпкъ щэнхабзэ махуэшхуэм хэтащ, ди зэкъуэтыныгъэмрэ зэгурыIуэныгъэмрэ я нэщэнэу. АдыгэбзэкIэ, балъкъэрыбзэкIэ, урысыбзэкIэ уэрэдхэр жаIащ, уеблэмэ хинди уэрэдхэр ягъэзэщIащ, студент гупхэм я лъэпкъ къафэхэм Iэгуауэшхуэ хуаIэтащ.

Индием и Посольствэм и лIыкIуэхэр КъБКъУ-м къызэрыкIуар лъэныкъуитIыр егъэджэныгъэ IуэхухэмкIэ зэрызэдэлажьэм нэхъри зегъэужьынымкIэ мыхьэнэшхуэ зиIэ лъэбакъуэщ. КъулыкъущIэхэр зэгурыIуащ зэдэлэжьэныгъэм дяпэкIэ хагъэхъуэну, зэгъусэу щIэныгъэ проектхэр ягъэзэщIэну. Университетыр шэсыпIэ иуващ Индием и абитуриентхэм дзыхь къытхуащIу еджакIуэ къакIуэ зэрыхъунумкIэ, я IэщIагъэми щIэныгъэми зрагъэужьынымкIэ Iэмал псори я пащхьэ зэрыралъхьэнумкIэ.