ЩIыналъэм и зыужьыныгъэм хуэгъэпсауэ

«Iуащхьэмахуэ» зыгъэпсэхупIэм къыщызэрагъэпэщынущ олимп, паралимп джэгухэм хыхьэ спорт лIэужьыгъуэхэм, абыхэм бгы-лыжэ, сноуборд, фристайл, ски-альпинизм хуэдэхэри яхэту, ди спортсменхэм зыщыхуагъэсэну иджырей IуэхущIапIэхэр.

Ар Къэбэрдей-Балъкъэрым дежкIэ икъукIэ мыхьэнэшхуэ зиIэ икIи зи чэзу Iуэхуу щытщ, сыту жыпIэмэ ди къуршхэм зэпымыууэ зыщагъасэ ди къэралым и командэ къыхэхам хэт спортсменхэм. Урысейм и Правительствэм и УнафэщI Мишустин Михаил апхуэдэ пщэрылъ зыхуэфащэ IэнатIэхэм яхуищIауэ щытащ Правительствэм и комиссэм хэтхэм мэлыжьыхьым и 30-м щаIущIам. Минеральные Воды къалэм щызэхэта Кавказ инвестицэ зэхуэсышхуэм зэрыщаубзыхуам тету ирагъэкIуэкIауэ аращ а зэхуэсыр.
Урысейм СпортымкIэ, Экономикэ зыужьыныгъэмкIэ и министерствэхэм Кавказ.РФ-р ящIыгъуу фокIадэм и 1-м ипэ къихуэу ягъэхьэзырынущ Iуэхум теухуа чэнджэщхэр. Премьер-министрым пщэрылъ ящищIахэм ящыщщ ди республикэм дежкIэ мыхьэнэшхуэ зиIэ нэгъуэщI зы Iуэхуи, - жиIащ КъБР-м и Iэтащхьэ КIуэкIуэ Казбек зэIущIэм щытепсэлъыхьыжым, - ар «Кавказым пхыкI лъэпкъ лъагъуэ» щIыналъэхэм зэдай турист гъуэгуанэр зэтеухуэнырщ. Ар пхокI Дагъыстэным, Шэшэным, Ингушым, Осетие Ищхъэрэ - Аланием, Къэбэрдей-Балъкъэрым, Къэрэшей-Шэрджэсымрэ Краснодар краймрэ. Дербент щыщIидзэу Сочэ деж щиухыу. Проектыр хьэзыру щытын хуейщ шыщхьэуIум и 5-м ирихьэлIэу, ар зэхэлъхьэным йолэжь Экономикэ зыужьыныгъэмкIэ, ЩIыуэпс хъугъуэфIыгъуэхэмкIэ, ФинансхэмкIэ министерствэхэр, КИФЩI-м хыхьэ щIыналъэхэмрэ Кавказ.РФ-мрэ я щIэгъэкъуэну.
КъимыдэкIэ, Кавказ Ищхъэрэм хыхьэ щIыналъэхэм зегъэу­жьынымкIэ IэмалыфIу къагъэлъэгъуащ удз гъагъэхэр гъэ­кIыныр. Мыбдежми щыхоплъэ къэрал дэIэпыкъуныгъэ зыгъуэт инвестицэ жэрдэмхэм. 
Урысейм и Правительствэм и УнафэщIым КИФЩI-м и унафэщIхэм апхуэдэуи къахуигъэлъэгъуащ УФ-м Егъэджэныгъэмрэ щIэныгъэмкIэ, Экономикэ зыужьыныгъэмкIэ и министерствэхэм ящIыгъуу, цIыхухэм курыт IэщIагъэ егъэгъуэтын IэнатIэр егъэфIэкIуэным хуэгъэза программэ фокIадэм и 1-м ипэ ­къихуэу зэхалъхьэу икIи къащтэну. АбыкIэ я мурадыр лэжьапIэ IэнатIэхэр IэщIагъэлIхэмкIэ къызэгъэпэщынырщ.