Налшык къалэ дэт ЩIалэгъуалэм я унэм накъыгъэм и 23-м щекIуэкIащ «ЩIэныгъэхэр зи куэд Iуащхьэмахуэ» форум иныр. Абы щызэхуэсащ Кавказ Ищхъэрэ федеральнэ щIыналъэм хыхьэ хэгъэгухэм, Урысейм и нэгъуэщI щIыпIэхэм къикIа ныбжьыщIэ 500-м щIигъу.
ЩIалэгъуалэм я унэм и гупэм иIэ утыкум щеувэкIат цIыху IэпщIэлъапщIэхэм я IэдакъэщIэкIхэр щагъэлъэгъуа жармыкIэр. Дэтхэнэми шэтыр зырыз хухэхауэ игъэлъагъуэрт идыр, къыщIигъэкIыр, ипщэфIыр, къигъэкIыр, зыхуэIэзэр. НыбжькIэ жыжьэ нэмыса хьэрычэтыщIэхэм, дизайнерхэм, IэщIагъэлIхэм, IэпэIэсэхэм зыр адрейм и Iэдакъэ къыщIэкIахэм зыщагъэгъуэзащ, зэпсэлъащ, зэрызэдэлэжьэнум теухуа зэгурыIуэныгъэ зэращIылIащ. Иджырей мардэхэм тету Iуэхур зэрахьащ. IэкIэ ящI а хъугъуэфIыгъуэ псори зрагъэлъэгъуащ КъБР-м и Iэтащхьэ КIуэкIуэ Казбекрэ нэгъуэщI къулыкъущIэхэмрэ. Iэтащхьэр щIалэгъуалэм епсэлъылIащ, я Iуэхум фIы къыпэкIуэну ехъуэхъуурэ жармыкIэр къызэхикIухьащ.
Форумыр къыщызэIуихым КIуэкIуэм жиIащ творческэ IэщIагъэхэр нобэ экономикэм и зы Iыхьэу зэрыщытыр, ди щӏалэгъуалэм я гупсысэхэр хэкум зрагъэужьу лажьэ хьэрычэт IэнатIэ зэрыхъуфынур. «Дэ къэкӏуэнур ди фӏэщ зэрыхъум и фIыгъэкIэ дыщызэхуэсащ мыбдеж. Ди мурадхэр, ди хъуэпсапӏэхэр, пщэдейм ехьэлIа гупсысэхэр ипэкӏэ дыкӏуэтэну ӏэмал къыдэзыт къарущ. Къызэхуэсахэр зи ӏэщӏагъэмкIэ, зи творческэ лэжьыгъэмкӏэ щӏэ къэзыгъэщӏ, ипэкӏэ дызыгъэкӏуатэ защIэщ.
Нобэ нэрылъагъу тщыхъуащ интеллект ӏэрыщӏыр, дронхэр, иджырей роботхэр. Икӏи фэ фхуэдэ зыужьыныгъэм щӏэхъуэпс щӏалэгъуалэращ а технологие зэхъуэкIыныгъэхэр гъащIэм щыщ зыщIыр. Сэ шэч къытесхьэркъым фэ, форумым и къызэгъэпэщакӏуэхэмрэ абы хэтхэмрэ, лэжьыгъэ купщӏафӏэ къызэрыфпэщылъым», жиIащ республикэм и Iэтащхьэм.
Мы форумыр зэпсэлъапIэ, зыгъэлъэгъуапIэ къудейтэкъым, атIэ лэжьыгъэр адэкIэ зыгъэкIуэтэн зэгурыIуэныгъэхэр щызэращIылIащ. Iыхьэ хэхахэм щынэсым щIыналъэм зиужьынымкIэ экономикэр къару лъэщу зэрыщытым теухуа зэIущIэшхуэ екIуэкIащ. Модераторхэм упщIэ къагъэувырт, абы спикерхэм жэуап иратырт. Псалъэм къыдэкIуэу жыпIэмэ, щIалэгъуалэм ящI брендхэр федеральнэ утыкум къызэрырахьэфынум, щӏыналъэхэм я зыужьыныгъэм инвестицэ къыхалъхьэн папщIэ щIапхъэхэм, абы и лъэныкъуэкIэ къэралымрэ хьэрычэтыщIэхэмрэ зэрызэдэлэжьапхъэм, нэгъуэщIхэми тепсэлъыхьащ. Зи гугъу тщIы зэIущIэм хэтащ КъБР-м и Ӏэтащхьэ КIуэкIуэ Казбек, КъБР-м экономикэ зыужьыныгъэмкӏэ и министр Рахаев Борис, «Опоры России» республикэ къудамэм и унафэщӏ Къылшыкъуэ Альберт, экспертхэу Храпко Татьянэ, Крыжановская Анжелэ, Баевэ Татьянэ, Горчаковэ Аннэ, Жоля Юлие, Суменковэ Екатеринэ сымэ.
Рахаев Борис къыхигъэщхьэхукӏащ зэчиягъэм хуэгъэпса IэщIагъэхэм зегъэужьынымкӏэ кластерымрэ ар зэпымыууэ лэжьэу къызэгъэпэщынымрэ мыхьэнэшхуэ зэраӏэр. IэщIагъэлIхэм къызэралъытэмкIэ, а IэщIагъэм республикэм зыщиужьын папщIэ, щIалэгъуалэм Iэмалрэ хэкIыпIэрэ къыхузэрагъэпэщын хуей къудейуэ аращ. А махуэм, шэджагъуэ нэужьым щӏыналъэ хьэрычэтыщӏэхэм я проектхэр утыку кърахьащ, ӏэщӏагъэлӏхэм я гъусэу щхьэж и лэжьыгъэр зэпкърихащ, нэгъуэщI унэтIыныгъэхэм хуэгъэпса Iуэхугъуэ куэд екIуэкIащ.
Зэхуэсым и кӏэух ӏыхьэ хъуащ Къэбэрдей-Балъкъэрым экономикэ зыужьыныгъэмкӏэ и министр Рахаев Борис зыхэта «КъБР-м щащӏащ» зэIущIэр. Форумым гуIэфIтещIэж хуэхъуащ фэилъхьэгъуэхэм я гъэлъэгъуэныгъэр. Къэбэрдей-Балъкъэрым щыщ дизайнер ныбжьыщӏэхэм утыку кърахьащ езыхэм я IэдакъэщIэкIхэр.
