Баязидрэ хьэмрэ

Iущыгъэрэ чэнджэщкIэ гъэнщIа хъыбарыжьхэм игъащIэкIи уигу къэмыкIыну гупсысэрэ кууагърэ ущрохьэлIэ. Апхуэдэхэм я щапхъэщ щIэныгъэлIышхуэ Бистамий Баязид теухуар. 
    Зэгуэрым щихъ Баязид уэрамым ирикIуэрэ пэт, хьэ гуэр къыхуэзащ. ЛIым и щыгъын кIапэхэр зыкIэщIиубыдащ, хьэр къылъэмыIэсын хуэдэу. Абдежым хьэр цIыхубзэкIэ къопсалъэри жеIэ: «Си цыр гъущэу щытамэ, укъысщымымэхъашэми хъунут. Ар псыфрэ фIейуэ щытами, уи щыгъыныр псы къабзэкIэ бжьыщIыжмэ, зэфIэкIат. Ауэ укъызэрызэпэгэкIым щхьэкIэ, тенджызиблым ярыт псыми яхуэгъэкъэбзэжынукъым уэ уи гур. Гугъущ ар къыщIэбгъэщыжыну!» Баязид хьэм елъэIуащ: «Уа, хьэ Iущ! КхъыIэ, къыздэпсэу!» «Хьэуэ, Баязид! – къритащ хьэм жэуап. - Уэрэ сэрэ дызэдэпсэуфынукъым. Сыту жыпIэмэ, сэ цIыхухэм сыкъалъагъу хъуркъым, уэ уафэм нэс удраIэтей. ИтIанэ сэ «пщэдей сшхынщ» жысIэу, зыри згъэтIылъыркъым, уэ уи гуэным гъавэ изщ». Баязид жиIащ: «Еууей! Хьэм сыдэпсэуну къысхуэмылэжьамэ, дауэ сэ Алыхьым пэгъунэгъу сыхъуу, Абы сызэрепсэлъэнур? ФIыщIэ хузощI си пагагъыр зыгъэIэса си Тхьэу къарууншэхэм лъэщхэр езыгъэущийм».