Тхум щыщу зыр дыщэу

Урысей Федерацэм цIыхухъухэм алыдж-урым бэ­нэкIэмкIэ я чемпионат Суздаль къалэм мы махуэхэм щекIуэкIащ. Апхуэдэуи, ар и фэеплъу щытащ УФ-м и ЛIыхъужь генерал-лейтенант Кутузов Роман. Зэ­хьэ­зэхуэм щызэпеуащ ди къэралым и щIыналъэхэм ящыщу 49-м я спортсмену 250-м нэблагъэ. 

Къэбэрдей-Балъкъэрым и бэнакIуэхэм медалитху чемпионатым къыщахьащ, абыхэм ящыщу зыр дыщэу. Ар зыIэригъэхьащ килограмм 63-рэ зи хьэлъагъхэм я деж щыбанэ Локьяев Жамболэт икIи, абы и фIыгъэкIэ, Iэмал игъуэтащ мы гъэм Къэзахъстаным щекIуэкIыну дунейпсо зэхьэзэхуэм и зэфIэкIхэр щигъэлъэгъуэну.
КъБР-м и Iэтащхьэ КIуэкIуэ Казбек гулъытэншэу къигъэнакъым ди лъахэгъум и ехъулIэныгъэр. «Ди бэнакIуэ Локьяев Жамболэт нобэ Суздаль щытекIуащ УФ-м цIыхухъу­хэм алыдж-урым бэнэкIэмкIэ я чемпионатым… 
Си гум къыбгъэдэкIыу ди щIалэхэм я текIуэныгъэхэмкIэ сохъуэхъу, урысей спортым и щIыхьыр нэхъри лъагэу яIэтыну, сыт щыгъуи бжьыпэр яIыгъыну си гуапэщ», - щитхащ республикэм и лIыщхьэм Максым щиIэ каналым. 
А зэпеуэм дыжьын медалхэр къыщахьащ КIэмпIарэ Маратрэ (кг 130-рэ) Гъуэныбэ Iэуесрэ (кг 82-рэ). Ещанэ хъуа­хэщ КъуийцIыкIу Ахьмэдрэ (кг 77-рэ) Ульбашев Iэдэмрэ (кг 55-рэ).
Ди бэнакIуэхэм я тренерхэр Щокъал Олег, Белгъэрокъуэ Эдуард, Умар Тимур, КIыщ Мурат, Гугъуэтыж Мухьэмэд, ­ГъуаплъащIэ ТIэхьир сымэщ.