Министерствэм щрагъэблагъэ

 Къэбэрдей-Балъкъэрым СпортымкIэ и министерствэм щрагъэблэгъащ Урысей Федерацэм боксымкIэ пашэныгъэр къыщыхьыным хуэунэтIауэ мы гъэм мэлыжьыхьым Мэзкуу областым и Чехов къалэм щекIуэкIа зэхьэзэхуэм къыщыхэжаныкIа ди спортсменхэмрэ абыхэм я тренерхэмрэ. ЗэIущIэм зыкърагъэхьэлIащ республикэм и журналистхэми.

Фигу къэдгъэкIыжынщи, зэхьэзэхуэм и хьэлъагъ елъытауэ зыхэта гупым  япэ увыпIэр къыщихьащ ГъущIапщэ Альберт. Абы нэмыщI, техникэ нэхъыфI зиIэ боксеру ар абы къыщалъытащ.  Мыдрейуэ, Быф Дамир етIуанэ, Пщынокъуэ Ислъам ещанэ увыпIэхэр къахьащ. ЩIалэхэм я тренерхэр Куэшмэн Аслъэнрэ Къумыкъу Мухьэмэдрэщ.

 Иджы ди боксерхэм Iэмал ягъуэтащ УФ-м и командэ къыхэхам хэту я зэфIэкIхэр европей, дунейпсо зэхуэсхэм щагъэлъэгъуэну.

Апхуэдэуи, зэIущIэм щагъэлъэпIащ икIи УФ-м спортымкIэ и мастерым и дамыгъэхэр щратыжащ Соттаев Альбертрэ Шевердинов  Аслъэнрэ.

АдэкIэ, зэхуэсым и кIэм спортсменхэр журналистхэм  ядэгуэшащ зыхэта зэхьэзэхуэм зэрыщехъулIахэмкIэ, зэпеуэхэм  зэрызыхуагъэхьэзыр щIыкIэхэмкIэ, къапэщылъ къалэнхэмрэ плъапIэхэмкIэ, нэгъуэщIхэмкIи.

 ИужькIэ, КъБР-м спортымкIэ и министр Хьэсанэ Ислъам  спортсменхэмрэ абыхэм я тренерхэмрэ тыгъэ лъапIэхэмкIэ яхуэупсащ, фэеплъ сурэти зэгъусэу зэтрагъэхащ.

Алътуддэсхэр зэкIэ етIуанэщ

Урысейм и Кубокыр футбол цIыкIумкIэ (8х8) къэхьыным хуэунэтIа зэхьэзэхуэ Новороссийск къалэм иджыблагъэ щекIуэкIащ. Абы щызэпеуащ ди къэралым и щIыналъэхэм ящыщу 27-м я командэу 48-рэ. Къэбэрдей-Балъкъэрым икIауэ зэхьэзэхуэм хэтащ Бахъсэн къалэм и «Автозапчасть», Прохладнэ щIыналъэм и «Искра-Алътуд», Налшык и «Панда» топджэгу гупхэр.

 Абыхэм ящыщу Урысейм и Кубокым къыщыхэжаныкIар алътуддэсхэрщ. ЯпэщIыкIэ, абыхэм хагъэщIащ Краснодар щIыналъэм и «Монте» командэр, зэIущIэм и бжыгъэр 8:0-у. ИужькIэ, «Искра-Алътудыр» IущIащ Тулэ къалэм и «Экспресс офис» клубым икIи зэпеуэр зэрытемыгъэкIуауэ, 2:2-уэ иухащ. Апхуэдэ щIыкIэкIи, ди командэм япэ увыпIэр зыхэта гупым къыщихьащ.

  Финалым и Iыхьэ 16-нэм ди щIалэхэр ятекIуащ Рязань къалэм и «Гермес»-м, Iыхьэ 8-нэм – Белгород къалэм и «ОЭМК»-м, Iыхьэ плIанэм – Санкт-Петербург къалэм и «Юниор» командэм. Финалым и Iыхьэ ныкъуэм ди республикэм и лIыкIуэхэр ятекIуащ Мэзкуу къалэм и «Восток-Сервис» топджэгу гупым, зэIущIэм и бжыгъэр 2:0-у.

 АдэкIэ, «Искра-Алътуд»-р финалым щыдэддэгуащ Санкт-Петербург къалэм и «Эксклюзив» командэм. Мыбдежым, зэIущIэм хухаха зэманым ахэр зэрытегъэкIуакъым, абы и бжыгъэр 1:1-уэ и кIэм нагъэсащ. ИужькIэ, Iуэхур пенальтим хуэкIуэри, ди жагъуэ зэрыхъущи, ди клубыр къыхагъэщIащ, бжыгъэр 2:3-уэ икIи урысейпсо зэхьэзэхуэм и дыжьын медалхэр яIыгъыу ди щIалэхэм я унэ къагъэзэжащ.

  КЪУЭЖЕЙ Iэмин.